ജംഷഡ്പൂരിനെതിരെ നടന്ന ഐഎസ്എല്‍ മത്സരത്തിനിടെ സ്വന്തം ഗോള്‍കീപ്പറുമായി കൂട്ടിയിടിച്ചു തലക്കു പരിക്കേറ്റ പ്രതിരോധ താരം റൂയിവ ഹോര്‍മിപാമിന് സീസണ്‍ മുഴുവന്‍ നഷ്ടമാകാന്‍ സാധ്യതയുണ്ടെന്ന് പരിശീലകന്‍ ഇവാന്‍ വുകോമനോവിച്ച്. താരത്തിന്റെ പരിക്ക് മോശമാണെന്നും അദ്ദേഹം ആശുപത്രിയില്‍ ചികിസ്തയിലാണെന്നും വുകോമനോവിച്ച് പറഞ്ഞു.
‘തീര്‍ച്ചയായും നല്ല അവസ്ഥയാണെന്ന് തോന്നുന്നില്ല. ഞാന്‍ കേട്ട കാര്യങ്ങള്‍ എന്നെ സങ്കടത്തിലാഴ്ത്തുന്നു. അദ്ദേഹത്തെ ആശുപത്രിയിലേക്ക് മാറ്റി. സാഹചര്യങ്ങള്‍ വിലയിരുത്തേണ്ടതുണ്ട്. അവസ്ഥ മോശമാണെങ്കില്‍ ഈ സീസണ്‍ മുഴുവനായും അദ്ദേഹത്തിന് നഷ്ടമാകും. അങ്ങനെയാകരുതെന്നു പ്രതീക്ഷിക്കുന്നു.’
‘അദ്ദേഹത്തിന് സര്‍ജറിക്ക് വിധേയമാകേണ്ടിവന്നാല്‍ അവസ്ഥ മോശമാകും. വളരെയധികം പുരോഗമിച്ചു മുന്നേറുന്ന താരമായിരുന്നു അദ്ദേഹം. സീസണ്‍ അവസാനം വരെ അദ്ദേഹം ഞങ്ങള്‍ക്കൊപ്പം വേണമെന്ന് ആഗ്രഹമുണ്ട്. പക്ഷെ സാഹചര്യമനുസരിച്ചിരിക്കും കാര്യങ്ങള്‍’ വുകോമനോവിച്ച് പറഞ്ഞു.
ഇന്നലെ നടന്ന മത്സരത്തില്‍ ജംഷെഡ്പൂര്‍ എഫ്സിയോട് ഏകപക്ഷീയമായ മൂന്നു ഗോളുകള്‍ക്കാണ് ബ്ലാസ്റ്റേഴ്സ് തോല്‍വി വഴങ്ങിയത്. ഗ്രെഗ് സ്റ്റുവാര്‍ട്ടിന്റെ രണ്ട് പെനാല്‍റ്റി ഗോളുകളും ഡാനിയല്‍ ചിമയുടെ ഗോളുമാണ് ജംഷദ്പൂരിനെ വിജയത്തിലേക്ക് നയിച്ചത്. മൂന്നു പോയിന്റുകള്‍ നേടി ജംഷെഡ്പൂര്‍ രണ്ടാം സ്ഥാനത്തേക്കുയര്‍ന്നപ്പോള്‍ കേരളാ ബ്ലാസ്റ്റേഴ്സ് അഞ്ചാം സ്ഥാനത്തേക്ക് കൂപ്പുകുത്തി. ഈ മാസം പതിനാലിന് ഈസ്റ്റ് ബെംഗാളിനെതിരെയാണ് ബ്ലാസ്റ്റേഴ്‌സിന്റെ അടുത്ത മത്സരം.