ഒളിമ്പിക്സിലെ 11ആം ദിനത്തിലേക്കു കടക്കുമ്പോള്‍ ഇന്ത്യ ഇന്ന് വീണ്ടും മെഡൽ വേട്ടയ്ക്ക് ഇറങ്ങുന്നു. ഇന്നലെ ഇന്ത്യൻ താരം ലക്ഷ്യസെൻ സെമിയിൽ പൊരുതി വീണതോടെ ബാഡ്മിന്റണിൽ വെള്ളി, സ്വർണം മെഡലുകൾ നേടാൻ സാധിക്കില്ല. ഇന്നാണ് ശേഷിക്കുന്ന മൂന്നാം സ്ഥാന മത്സരം നടക്കുന്നത്. വീണ്ടുമൊരു മെഡല്‍ കൂടി അക്കൗണ്ടിലേക്കു ചേര്‍ക്കാമെന്ന പ്രതീക്ഷയിലാണ് ലക്ഷ്യ. വൈകീട്ട് ആറു മണിക്കാണ് ലക്ഷ്യയുടെ വെങ്കല മെഡല്‍ പോരാട്ടം. മലേഷ്യയുടെ ലീ സി ജിയയാണ് ലക്ഷ്യയുടെ എതിരാളി.
ഇന്ത്യയ്ക്ക് മറ്റു ഇനങ്ങളിലും ഇന്ന് മെഡൽ സാധ്യതയ്ക്ക് വകയുണ്ട്. ഷൂട്ടിംഗ് ഇനത്തിലെ സ്‌കീറ്റ് മിക്‌സഡ് വിഭാഗത്തില്‍ അനന്ത്ജീത് സിങ്, മഹേശ്വരി ചൗഹാന്‍ സഖ്യമാണ് ഇന്ത്യക്കു വേണ്ടി ഇന്നിറങ്ങുക. ഇവരുടെ യോഗ്യതാ മല്‍സരം ഉച്ചയ്ക്കു 12.30 മുതലാണ്. ഫൈനലിലേക്കു യോഗ്യ നേടാന്‍ കഴിഞ്ഞാല്‍ ഇന്ത്യന്‍ ജോടിക്കു മെഡല്‍ സാധ്യതയുണ്ട്. ഇന്ത്യയുടെ പ്രധാന മെഡൽ നേട്ട മത്സരങ്ങളിൽ ഒന്നാണ് ഗുസ്‌തി. ഇന്നാണ് ഗുസ്‌തി മത്സരങ്ങൾ നടത്താൻ നിശ്ചയിച്ചിരിക്കുന്നത്. ഇന്ത്യൻ താരം നിഷ ദഹിയയാണ് രാജ്യത്തെ പ്രതിനീകരിച്ച് ഗോദയിൽ ഇറങ്ങുക. 68 കിഗ്രാം ഫ്രീസ്റ്റൈല്‍ ഗുസ്തിയുടെ പ്രീക്വാര്‍ട്ടറില്‍ ആണ് അവരുടെ ആദ്യ മത്സരം. ഇതില്‍ ജയിച്ചാല്‍ ക്വാര്‍ട്ടറിലും നിഷ ഇറങ്ങും. ക്വാര്‍ട്ടറും കടക്കാനായാല്‍ സെമി ഫൈനല്‍ മല്‍സരങ്ങളും നടക്കാനുണ്ട്. ഇന്ന് തന്നെ ആണ് മൂന്നു റൗണ്ടുകളും നടത്താൻ നിശ്ചയിച്ചിരിക്കുന്നത്.
Read more
മെഡല്‍പട്ടികയില്‍ ഇന്ത്യ ഇപ്പോള്‍ 57ാം സ്ഥാനത്താണുള്ളത്. മൂന്നു വെങ്കല മെഡലുകളാണ് ഇപ്പോള്‍ ഇന്ത്യയുടെ സമ്പാദ്യം. കഴിഞ്ഞ ഒളിമ്പിക്സുകളിലെ കണക്കുകൾ വെച്ച് നോക്കുകയാണെങ്കിൽ ഇത്തവണത്തെ ഒളിമ്പിക്സ് ഇന്ത്യയ്ക്ക് അത്ര മികച്ചതല്ലാ. കഴിഞ്ഞ ഒളിമ്പിക്സിൽ ഒരു സ്വർണവും, രണ്ട് വെള്ളിയും, നാല് വെങ്കലവും നേടി ഇന്ത്യ ഏഴു മെഡലുകളുമായി 48 സ്ഥാനത്ത് നിന്നായിരുന്നു ഒളിമ്പിക്സ് യാത്ര അവസാനിപ്പിച്ചത്. ഇത്തവണ ഇനിയും മെഡൽ നേടാനാവും എന്ന പ്രതീക്ഷയിലാണ് ഇന്ത്യൻ ജനത.
