തന്റെ ഭക്ഷണത്തിൽ വിഷം കലർത്തി ഇല്ലാതാകാൻ ശ്രമിച്ചതിനെ കുറിച്ച് തുറന്ന് പറഞ്ഞിരിക്കുകയാണ് ടെന്നീസ് ഇതിഹാസം നൊവാക് ജോക്കോവിച്ച്. 2022 ഇൽ നടന്ന സംഭവത്തിൽ വമ്പൻ വെളിപ്പെടുത്തലുമായാണ് താരം ഇപ്പോൾ രംഗത്ത് എത്തിയിരിക്കുന്നത്. 2022 ഓസ്ട്രേലിയൻ ഓപ്പണിൽ പങ്കെടുക്കാനായി മെൽബണിൽ എത്തിയപ്പോൾ ഹോട്ടലിൽ വിഷം കലർത്തിയ ഭക്ഷണം നൽകിയതായി ജോക്കോവിച്ച് പറഞ്ഞത്.
കോവിഡ് വാക്‌സിൻ എടുക്കാത്തതിന് തുടർന്ന് ജോക്കോവിച്ചിന് ഓസ്ട്രേലിയൻ വിസ ലഭിച്ചിരുന്നില്ല. അത് കൊണ്ട് അന്ന് ഓസ്ട്രേലിയൻ ഓപ്പണിൽ പങ്കെടുക്കാൻ ജോക്കോവിച്ചിന് സാധിച്ചില്ല. വിസ റദ്ദാക്കിയ ഓസ്ട്രേലിയൻ ഭരണകൂടത്തിന്‍റെ നടപടിയെ ചോദ്യം ചെയ്ത് താരം അവിടെ തന്നെ തുടർന്നപ്പോൾ ആണ് ഹോട്ടലിൽ നിന്ന് നൽകിയ ഭക്ഷണത്തിൽ നിന്ന് വിദബാധയേറ്റത്.
നൊവാക് ജോക്കോവിച്ച് പറയുന്നത് ഇങ്ങനെ:
” സെർബിയയിൽ തിരിച്ചെത്തി നടത്തിയ പരിശോധനയിലാണ് ഞാൻ ഇത് കണ്ടെത്തിയത്. അപ്രതീക്ഷിതമായി ചില ആരോഗ്യപ്രശ്നങ്ങൾ അലട്ടിയത് മൂലമായിരുന്നു പരിശോധന. ഞാൻ ഇത് ആരോടും പറഞ്ഞില്ല. ശരീരത്തിൽ ഉയർന്ന അളവിൽ മെറ്റലിന്‍റെയും ഈയത്തിന്‍റെയും മെർക്കുറിയുടെയും സാന്നിധ്യം കണ്ടെത്തി. ഇതോടെ വിഷം ഉള്ളിൽ ചെന്നതായി ഡോക്ടർമാർ സ്ഥിരീകരിച്ചു”
നൊവാക് ജോക്കോവിച്ച് തുടർന്നു:
” ഇത് ആ ഹോട്ടലിൽ നിന്ന് തന്നെയാണോ എന്ന ചോദ്യം ശാസ്ത്രീയമായി തെളിയിക്കപ്പെട്ടില്ലെങ്കിലും വിഷം ഉള്ളിലെത്താൻ അന്ന് വേറെ സാധ്യതകൾ ഞാൻ കാണുന്നില്ല” നൊവാക് ജോക്കോവിച്ച് പറഞ്ഞു.