ഇന്ന് ലാലിഗയിൽ തകർപ്പൻ തിരിച്ച് വരവാണ് റയൽ മാഡ്രിഡ് നടത്തിയത്. എതിരില്ലാത്ത മൂന്ന് ഗോളുകൾക്കാണ് ലെഗാനസിനെ അവർ പരാജയപ്പെടുത്തിയത്. നാളുകൾ ഏറെയായി മോശമായ പ്രകടനമായിരുന്നു കിലിയൻ എംബപ്പേ നടത്തിയിരുന്നത്. എന്നാൽ ഇന്ന് മികച്ച പ്രകടനം നടത്തി, ടീമിന് വേണ്ടി ഒരു ഗോളും സ്വന്തമാക്കി. വിനിയുടെ അസിസ്റ്റിൽ നിന്നാണ് എംബപ്പേ ഗോൾ നേടിയത്. കൂടാതെ ഫെഡെ വാൽവെർദെ, ജൂഡ് ബെല്ലിങ്ങ്ഹാം എന്നിവരാണ് റയൽ മാഡ്രിഡിന് വേണ്ടി മറ്റു ഗോളുകൾ നേടിയ താരങ്ങൾ.
പൊസിഷനുകളിൽ മാറ്റം വരുത്തിക്കൊണ്ടായിരുന്നു ഈ മത്സരത്തിൽ ആഞ്ചലോട്ടി ടീമിനെ ഇറക്കിയിരുന്നത്. അതായത് ഇടതുവിങ്ങിൽ എംബപ്പേ കളിക്കുകയായിരുന്നു. സെന്റർ സ്ട്രൈക്കർ റോളിൽ വിനീഷ്യസും അദ്ദേഹത്തിന്റെ തൊട്ടു പിറകിൽ ബെല്ലിങ്ങ്ഹാമും അണിനിരന്നു. വലത് വിങ്ങിലായിരുന്നു ഗുലറുടെ സ്ഥാനം. എന്ത് കൊണ്ടാണ് താരങ്ങളുടെ പൊസിഷനിൽ മാറ്റം വരുത്തിയത് എന്ന് പരിശീലകനായ കാർലോ അഞ്ചലോട്ടി പറഞ്ഞു.
കാർലോ അഞ്ചലോട്ടി പറയുന്നത് ഇങ്ങനെ:
Read more
” സ്ട്രൈക്കർമാരുടെ പൊസിഷനുകളിൽ ഞങ്ങൾ മാറ്റം വരുത്തുകയായിരുന്നു. എംബപ്പേയെ ഔട്ട് വൈഡിലേക്ക് മാറ്റി, അദ്ദേഹം മികച്ച രൂപത്തിൽ കളിച്ചിട്ടുണ്ട്. വിനീഷ്യസ് സെന്ററിലും മികച്ച പ്രകടനം നടത്തി. മത്സരം നല്ല രൂപത്തിൽ തന്നെയാണ് ടീം നിയന്ത്രിച്ചിട്ടുള്ളത്. കഴിഞ്ഞ ഒസാസുനക്കെതിരെയുള്ള മത്സരത്തിൽ തന്നെ ശുഭ സൂചനകൾ ലഭിച്ചിരുന്നു. ഇന്നത്തെ മത്സരത്തിലൂടെ ഞങ്ങൾ അത് സ്ഥിരീകരിക്കുകയും ചെയ്തു. നിലവിൽ വിനീഷ്യസും എംബപ്പേയും ഏറെ ഇംപ്രൂവ് ആവുന്നുണ്ട് ” കാർലോ ആഞ്ചലോട്ടി പറഞ്ഞു.
