ഒളിഞ്ഞുനോട്ടത്തിന്റെയും സദാചാരപോലീസിങ് മോഡല്‍ പ്രവര്‍ത്തനങ്ങളുടെയും കഥകള്‍ നിത്യേനയെന്നോണം കേള്‍ക്കുന്ന നാടാണ് കേരളം. ഒരാണും ഒരു പെണ്ണും ഒന്നിച്ച് നടന്നാലോ ഇരുന്നാലോ, പിന്നെ ചോദ്യങ്ങളായി, സംശയങ്ങളായി. ഒരു പെണ്‍കുട്ടി രാത്രിയെങ്ങാനും ഫെയ്‌സ്ബുക്കില്‍ പ്രത്യക്ഷപ്പെട്ടാല്‍ പിന്നെ അവള്‍ക്ക് “താന്തോന്നി”യെന്ന പേര് നല്‍കി ആദരിക്കുകയും ചെയ്യും. ചാറ്റിങ്ങിനെത്തിയാലോ ആഗ്രഹപൂര്‍ത്തീകരണത്തിന് അനുമതി തേടലായി പിന്നെ അടുത്തത്. പെണ്‍കുട്ടികളുടെ ഫോട്ടോകള്‍ കണ്ട് നിര്‍വൃതി അടയുന്ന കൂട്ടരും ഈ സോഷ്യല്‍ മീഡില ലോകത്ത് ധാരാളം.
ഇങ്ങനെയൊക്കെ സംഭവിക്കുന്ന നാട്ടില്‍ സ്വന്തം ഭാര്യ മുലയൂട്ടുന്ന ചിത്രം ഫെയ്‌സ്ബുക്കില്‍ പോസ്റ്റ് ചെയ്യുക. എങ്ങിനെയായിരിക്കും സദാചാര മലയാളി ഇതിനോട് പ്രതികരിക്കുക? സ്ത്രീയുടെ വസ്ത്രം അല്‍പം മാറിയാലോ, ശരീരം കണ്ടാലോ ഉടന്‍ തന്നെ അശ്ലീലതയെന്ന് മാര്‍ക്കിടുന്ന നമ്മുടെ മഞ്ഞക്കണ്ണടകള്‍ മാറ്റാതെ നമുക്കാ ചിത്രം കാണാന്‍ സാധിക്കുമോ? സാധിക്കുമെങ്കില്‍ നിങ്ങളീ ചിത്രവും കുറിപ്പും കാണുക. ഇല്ലെങ്കില്‍ ഈ ചിത്രത്തെയും കുറിപ്പുനെയും മലീമസമാക്കുന്ന നിങ്ങളുടെ മഞ്ഞക്കണ്ണടയുമായി മാറിനില്‍ക്കുക.
https://www.facebook.com/photo.php?fbid=1828465370560595&set=a.521092361297909.1073741827.100001914501777&type=3&theater
സ്വന്തം കുഞ്ഞിനെ മുലയൂട്ടുന്ന അതിമനോഹരമായ ചിത്രം ഫെയ്‌സ്ബുക്കില്‍ പ്രസിദ്ധീകരിച്ച് മാതൃകയായിരിക്കുകയാണ് കണ്ണൂര്‍ പയ്യന്നൂര്‍ സ്വദേശിയായ ബിജുവും ഭാര്യ അമൃതയും. മുലയൂട്ടലിന്റെ ആവശ്യകതയെ കുറിച്ച് ആളുകളെ ബോധവാന്മാരാക്കാനാണ് ദമ്പതികള്‍ ഈ ധീരമായ ശ്രമം നടത്തിയത്.
“എന്റെ അമ്മുക്കുട്ടി അമ്മയും കുട്ടിയുമായി” എന്ന തലക്കെട്ടോടെയാണ് ഫോട്ടോ ബിജു പോസ്റ്റ് ചെയ്തിരിക്കുന്നത്. മുലയൂട്ടുമ്പോള്‍ ശ്രദ്ധിക്കേണ്ട 12 കാര്യങ്ങള്‍ ഭംഗിയായി അദ്ദേഹം ഈ പോസ്റ്റില്‍ വിശദീകരിക്കുകയും ചെയ്യുന്നു. മനോഹരമായ ഈ പോസ്റ്റിനെ തേടി ഇതിനോടകം തന്നെ ധാരാളം അഭിനന്ദനങ്ങളും പ്രോല്‍സാഹനങ്ങളും തേടിയെത്തി. ഇതൊരു മഹത്തായ ഉദ്യമമാണെന്നും ഞങ്ങള്‍ നിങ്ങളെ ബഹുമാനിക്കുന്നെന്നുമാണ് സോഷ്യല്‍ മീഡിയയില്‍ ആളുകള്‍ പ്രതികരിച്ചത്. എന്നാല്‍ പോസ്റ്റ് കണ്ട സദാചാരവാദികള്‍ തെറിവിളികളും പരിഹാസവും വാരിവിതറിയപ്പോളും ഈ ദമ്പതികള്‍ തങ്ങള്‍ ചെയ്ത ശരിയില്‍ ഉറച്ചു നില്‍ക്കുക തന്നെയാണ്.
കണ്ണൂരില്‍ കുട്ടികള്‍ക്ക് വേണ്ടിയുള്ള ക്രിയേറ്റീവ് സ്‌കൂള്‍ നടത്തുകയാണ് ബിജു. അമൃത ക്ലിനിക്കല്‍ സൈക്കോളജി ബിരുദധാരിയാണ്.