2020-ൽ അഞ്ചു ശതമാനം ജി.ഡി.പി വളർച്ച കൈവരിക്കാൻ ഇന്ത്യ വളരെയധികം ബുദ്ധിമുട്ടുമെന്ന് അമേരിക്കൻ സാമ്പത്തിക ശാസ്ത്രജ്ഞൻ സ്റ്റീവ് ഹാൻകെ. കഴിഞ്ഞ ഏതാനും പാദങ്ങളിൽ ഗണ്യമായ ഇടിവ് ഉണ്ടായത് ക്രെഡിറ്റ് ചോർച്ച മൂലമാണ്. ഇത് ഒരു ചാക്രിക പ്രശ്‌നമാണെന്ന് സ്റ്റീവ് ഹാൻകെ പറഞ്ഞു.
നേരത്തെ ഇന്ത്യയിൽ സുസ്ഥിരമല്ലാത്ത വായ്പാ കുതിച്ചുചാട്ടം അനുഭവപ്പെട്ടു, ഇതിപ്പോൾ തിരിച്ചടിയാവുകയും വൻതോതിൽ നിഷ്ക്രിയ വായ്പകളുടെ കൂമ്പാരമായി ബാങ്കുകൾ, പ്രത്യേകിച്ച് ദേശസാൽകൃത ബാങ്കുകൾ മാറി, നിലവിൽ ജോൺസ് ഹോപ്കിൻസ് സർവകലാശാല (യു.എസ്.എ) പ്രായോഗിക സാമ്പത്തിക ശാസ്ത്രം പഠിപ്പിക്കുന്ന സ്റ്റീവ് ഹാൻകെ ചൂണ്ടിക്കാട്ടി.
“ഇന്ത്യയിലെ മാന്ദ്യം ക്രെഡിറ്റ് ചോർച്ചയുമായി ബന്ധപ്പെട്ടതാണ്, ഇത് ഒരു ചാക്രിക പ്രശ്നമാണ് – ഒരു ഘടനാപരമായ പ്രശ്നമല്ല … തൽഫലമായി, 2020 ൽ ജിഡിപി വളർച്ചാ നിരക്ക് 5 ശതമാനമാക്കാൻ ഇന്ത്യ ബുദ്ധിമുട്ടും,” അദ്ദേഹം പറഞ്ഞു.
ഇന്ത്യ ഇതിനകം തന്നെ വളരെയധികം സംരക്ഷണവാദികളാണെന്നും അദ്ദേഹം അഭിപ്രായപ്പെട്ടു. ലോകത്തെ അതിവേഗം വളരുന്ന പ്രധാന സമ്പദ്‌വ്യവസ്ഥയായി ഈയിടെ പ്രശംസിക്കപ്പെട്ടിരുന്ന ഇന്ത്യ, 2019-20 സെപ്റ്റംബർ പാദത്തിൽ വളർച്ചാ നിരക്ക് ആറ് വർഷത്തെ ഏറ്റവും താഴ്ന്ന നിരക്കായ 4.5 ശതമാനമായി കുറഞ്ഞു. നിക്ഷേപത്തിന്റെ മാന്ദ്യം ഉപഭോഗത്തിലേക്ക് വ്യാപിച്ചതും ഗ്രാമീണ കുടുംബങ്ങൾക്കിടയിലെ സാമ്പത്തിക സമ്മർദ്ദവും തൊഴിലവസരങ്ങൾ ദുർബലമായതുമാണ് ഇതിന് പ്രധാന കാരണങ്ങൾ.
വലിയ സാമ്പത്തിക പരിഷ്കാരങ്ങൾ കൊട്നുവരുന്നതിൽ മോദി സർക്കാർ പരാജയപ്പെട്ടുവെന്നും മുൻ അമേരിക്കൻ പ്രസിഡന്റ് റൊണാൾഡ് റീഗന്റെ സാമ്പത്തിക ഉപദേഷ്ടാക്കളുടെ സമിതിയിൽ സേവനമനുഷ്ഠിച്ചിട്ടുള്ള സ്റ്റീവ് ഹാൻകെ പറഞ്ഞു.
കർശനവും ആവശ്യമുള്ളതുമായ സാമ്പത്തിക പരിഷ്കാരങ്ങൾ കൊണ്ടുവരുന്നതിൽ മോദി സർക്കാരിന് ഒരു താൽപ്പര്യവുമില്ലെന്ന് സാമ്പത്തിക ശാസ്ത്രജ്ഞൻ സ്റ്റീവ് ഹാൻകെ അഭിപ്രായപ്പെട്ടു. പകരം, മോദി സർക്കാർ രാജ്യത്തെ അസ്ഥിരപ്പെടുത്തുന്നതും സ്ഫോടനാത്മകവുമായ രണ്ട് കാര്യങ്ങളിൽ ശ്രദ്ധ കേന്ദ്രീകരിച്ചിരിക്കുന്നു: വംശീയത, മതം.
“ഇതൊരു മാരകമായ മിശ്രണം ആണ്. മോദിയുടെ കീഴിൽ ഇന്ത്യ ഇതിനകം തന്നെ ലോകത്തിലെ ഏറ്റവും വലിയ ജനാധിപത്യത്തിൽ നിന്ന്” ലോകത്തിലെ ഏറ്റവും വലിയ പൊലീസ് സ്റ്റേറ്റായി മാറുകയാണെന്ന് പലരും വിശ്വസിക്കുന്നു, ” വാഷിംഗ്ടണിലെ കാറ്റോ ഇൻസ്റ്റിറ്റ്യൂട്ടിലെ സീനിയർ ഫെലോയും ട്രബിൾഡ് കറൻസി പ്രോജക്ടിന്റെ ഡയറക്ടറുമായ പ്രശസ്ത സാമ്പത്തിക ശാസ്ത്രജ്ഞൻ പറഞ്ഞു.