ചുരുങ്ങിയ കാലത്തിനുള്ളില്‍ ബോളിവുഡിന്റെ താരറാണിയെന്ന പദവിയിലെത്തിയ നടിയാണ് വിദ്യാബാലന്‍. ബോളിവുഡിലെ നിര്‍ണ്ണായക സാന്നിദ്ധ്യമായ ഖാന്‍മാരുടെ സഹായമില്ലാതെ തന്നെ സിനിമയില്‍ സജീവ സാന്നിദ്ധ്യമായ നടിയ്ക്ക് മാധ്യമങ്ങള്‍ ഫീമെയില്‍ ആമിര്‍ ഖാന്‍ എന്ന് പേരുമിട്ടു. എന്നാല്‍ ആരാധകര്‍ക്കെന്നും ആകാംഷയുള്ള കാര്യമാണ് ഇതുവരെ ബോളിവുഡ് അടക്കിഭരിക്കുന്ന ഖാന്‍മാര്‍ക്കൊപ്പം ഈ നടി എന്തുകൊണ്ട് അഭിനയിച്ചില്ല എന്നുള്ളത് . എന്നാല്‍ ഇപ്പോള്‍ അതിന്റെ കാരണം വിദ്യാ ബാലന്‍ തന്നെ വെളിപ്പെടുത്തിയിരിക്കുന്നു.
“അവരോടുള്ള എല്ലാ ബഹുമാനത്തോടെയും കൂടി പറയട്ടെ , ഞാന്‍ ചെയ്യുന്ന തരം സിനിമകളില്‍ വളരെ സന്തോഷവതിയാണ്. എന്റെ എല്ലാ സിനിമകളും വ്യത്യസ്തവും പുതുമ നിറഞ്ഞതുമാണ്. ഖാന്‍മാര്‍ക്കൊപ്പം കിട്ടുന്ന റോളുകള്‍ ഒരു തരം ഫോര്‍മുലയ്ക്കുള്ളിലുള്ളവയായിരിക്കും”. ഗൃഹലക്ഷ്മിയുടെ അഭിമുഖത്തില്‍ വിദ്യ വ്യക്തമാക്കി.
“ഖാന്‍മാരുടെ ചിത്രങ്ങളില്‍ വളരെയധികം പരിമിതികളുള്ള കഥാപാത്രമായിരിക്കും സ്ത്രീകള്‍. അത്തരം സിനിമകള്‍ ചെയ്യാന്‍ എനിയ്ക്കു താല്‍പര്യമില്ല. പുതുമയുള്ള നിരവധി റോളുകള്‍ എന്നെ തേടി വരുമ്പോള്‍ ഞാനെന്തിന് അത്തരം റോളുകള്‍ ചെയ്യണം. ടിപ്പിക്കല്‍ റോളുകള്‍ വേഗം മടുക്കുന്നയാളാണ് ഞാന്‍. എനിയ്ക്ക് എപ്പോഴും പുതുമകള്‍ വേണം.” വിദ്യാ ബാലന്‍ പറഞ്ഞു.