Connect with us
https://southlive.in/wp-content/uploads/2018/08/728-x-90-pix.jpg

SPOTLIGHT

പ്ലാസ്റ്റിക് ഗ്രഹമായി മാറുന്ന ഭൂമി

, 9:00 am

ഡോ. ജോസ് ജോസഫ്

ആധുനിക സമൂഹത്തെ ഗ്രസിച്ചിരിക്കുന്ന വലിച്ചെറിയല്‍ സംസ്‌കാരത്തെക്കുറിച്ച് ലോകത്തിന് ആദ്യമായി മുന്നറിയിപ്പ് നല്‍കിയത് അമേരിക്കന്‍ സാമൂഹിക ചിന്തകനായിരുന്ന ആല്‍വിന്‍ ടോഫ്‌ളറായിരുന്നു. ടോഫ്‌ളര്‍ 1970ല്‍ പ്രസിദ്ധീകരിച്ച ‘ഫ്യൂച്ചര്‍ ഷോക്ക്’ എന്ന പുസ്തകം അമേരിക്കന്‍ സമൂഹം പുതുമ നശിച്ച ഏതു ഉത്പന്നവും ഉപയോഗത്തിന് ശേഷം വലിച്ചെറിയുന്ന ‘വലിച്ചെറിയല്‍ സമൂഹമായി’ പരിണമിച്ചതായി കണ്ടെത്തി. ധാരാളിത്തം മുഖമുദ്രയാക്കിയ നഗരവത്കൃത സമൂഹങ്ങളിലാണ് ഈ വലിച്ചെറിയല്‍ സംസ്‌കാരം കൂടുതല്‍ പ്രകടം. പ്ലാസ്റ്റിക് നിര്‍മിതമായ ലക്ഷക്കണക്കിന് ബാര്‍ബി പാവകളെ കുട്ടികള്‍ ആദ്യത്തെ ആകര്‍ഷണം തീരുന്നതോടെ വലിച്ചെറിയുന്നത് ടോഫ്‌ളര്‍ ഉദാഹരണമായി ചൂണ്ടിക്കാട്ടുന്നു.

1950കളില്‍ തുടക്കം കുറിച്ച ഈ വലിച്ചെറിയല്‍ സംസ്‌കാരത്തിന് ഭൂമിയെ മുഴുവനും ഒരു മാലിന്യകൂമ്പാരമാക്കി മാറ്റിയതിലുള്ള പങ്ക് ചെറുതല്ല. പ്ലാസ്റ്റിക്കിന്റേയും പ്ലാസ്റ്റിക് ഉത്പന്നങ്ങളുടേയും കണ്ടുപിടുത്തം ഈ വലിച്ചെറിയല്‍ സംസ്‌കാരത്തെ ഭൂമി മുഴുവന്‍ വ്യാപിപ്പിച്ചു. ഭൂമി അതിവേഗം ഒരു പ്ലാസ്റ്റിക് ഗ്രഹമായി മാറിക്കൊണ്ടിരിക്കുകയാണെന്ന് ഗവേഷണ പഠനങ്ങള്‍ വ്യക്തമാക്കുന്നു. പ്ലാസ്റ്റിക് ഉത്പന്നങ്ങളുടെ ഏകദേശം 50 ശതമാനത്തോളം ഒറ്റത്തവണത്തെ ഉപയോഗത്തിന് ശേഷം വലിച്ചെറിയപ്പെടുന്നു. പരിഹാരം വഴുതി മാറുന്ന ഗുരുതരമായ പരിസ്ഥിതി പ്രശ്‌നമായി പ്ലാസ്റ്റിക് മലിനീകരണം മാറിയതുകൊണ്ടാണ് ഇന്ത്യ ആതിഥ്യം വഹിക്കുന്ന ഈ വര്‍ഷത്തെ ലോക പരിസ്ഥിതി ദിനാഘോഷത്തിന്റെ മുഖ്യവിഷയമായി ‘പ്ലാസ്റ്റിക്കിനെ തോല്‍പ്പിക്കുക’ എന്ന മുദ്രാവാക്യം തിരഞ്ഞെടുത്തിരിക്കുന്നത്.

ആധുനിക മനുഷ്യജീവിതം സുഖപ്രദവും സൗകര്യപ്രദവുമാക്കുന്നതില്‍ പ്ലാസ്റ്റിക് ഉത്പന്നങ്ങള്‍ വഹിക്കുന്ന പങ്ക് തള്ളിക്കളയാനാവില്ല. പ്ലാസ്റ്റിക് ഒഴിവാക്കിക്കൊണ്ടുള്ള ജീവിതം ചിന്തിക്കാനുമാവില്ല. എന്നാല്‍ ലോകം അഭിമുഖീകരിക്കുന്ന ഏറ്റവും ഗുരുതരമായ പാരിസ്ഥിതിക പ്രശ്‌നങ്ങളിലൊന്നായി ഇന്ന് പ്ലാസ്റ്റിക് മലിനീകരണം മാറിയിരിക്കുകയാണ്. പൊതുജനാരോഗ്യ സംരക്ഷണത്തിനും മനുഷ്യശരീരത്തിനും പരിസ്ഥിതിക്കും ഏറ്റവും വലിയ ഭീഷണികളിലൊന്നാണ് ഇന്ന് പ്ലാസ്റ്റിക് മലിനീകരണം.

കരയും കടലും ഒരുപോലെ ഇന്ന് പ്ലാസ്റ്റിക് മലിനീകരണത്തിന്റെ വെല്ലുവിളികള്‍ നേരിടുകയാണ്. 1950നു ശേഷം ലോകത്ത് ഇതുവരെ 830 കോടി മെട്രിക് ടണ്‍ പ്ലാസ്റ്റിക് ഉത്പാദിപ്പിച്ചുവെന്നാണ് കണക്ക്. ഇതില്‍ കേവലം ഒമ്പതു ശതമാനം മാത്രമാണ് പുനഃചംക്രമണം ചെയ്യപ്പെട്ടത്. 12 ശതമാനം കത്തിച്ചു ചാമ്പലാക്കി. ബാക്കി 79 ശതമാനം പ്ലാസ്റ്റിക്കും കരയിലെ മാലിന്യകൂമ്പാരങ്ങളിലും പരിസ്ഥിതിയിലും വിഷമാലിന്യമായി അവശേഷിക്കുകയാണ്. ഏകദേശം 630 കോടി മെട്രിക് ടണ്‍ പ്ലാസ്റ്റിക് മാലിന്യമാണ് കരയിലേയും കടലിലേയും ആവാസവ്യവസ്ഥകള്‍ക്ക് വന്‍ഭീഷണി ഉയര്‍ത്തി വിഷമാലിന്യമായി പരിസ്ഥിതിയില്‍ നിലനില്‍ക്കുന്നത്. ഉത്പാദിപ്പിക്കുന്ന പ്ലാസ്റ്റിക്കിന്റെ 42 ശതമാനവും പാക്കിംഗിനാണ് ഉപയോഗിക്കുന്നത്. ഇങ്ങനെ ഉപയോഗിക്കുന്ന പ്ലാസ്റ്റിക്കിന്റെ 50 ശതമാനത്തിലേറെയും ഒറ്റത്തവണത്തെ ഉപയോഗത്തിനുശേഷം വലിച്ചെറിയപ്പെടുന്നു.

പ്ലാസ്റ്റിക് വാണിജ്യാടിസ്ഥാനത്തില്‍ ഉത്പാദിപ്പിക്കാനുള്ള സാങ്കേതിക വിദ്യ കണ്ടുപിടിച്ചത് 1939 ലാണെങ്കിലും ഇതിന്റെ ഉപയോഗം വ്യാപകമായത് രണ്ടാം ലോക മഹായുദ്ധത്തിന് ശേഷമാണ്. 1950 ല്‍ രണ്ട് ദശലക്ഷം ടണ്‍ മാത്രമായിരുന്ന പ്രതിവര്‍ഷ പ്ലാസ്റ്റിക് ഉത്പാദനം 2015ല്‍ 380 ദശലക്ഷം ടണ്ണായി ഉയര്‍ന്നു. അരലക്ഷം കോടി പ്ലാസ്റ്റിക് ബാഗുകളാണ് ഓരോ വര്‍ഷവും ലോകത്ത് വിറ്റഴിക്കപ്പെടുന്നത്. ഇതിന്റെ പകുതിയില്‍ ഏറെയും ഒറ്റത്തവണത്തെ ഉപയോഗത്തിനു ശേഷം വലിച്ചെറിയപ്പെടുന്നു. ഓരോ മിനിറ്റിലും 10 ലക്ഷം പ്ലാസ്റ്റിക് കുപ്പികളാണ് വിറ്റഴിക്കപ്പെടുന്നത്. 20-ാം നൂറ്റാണ്ടില്‍ മൊത്തം ഉത്പാദിപ്പിച്ചതിനേക്കാള്‍ കൂടുതല്‍ പ്ലാസ്റ്റിക് കഴിഞ്ഞ 10 വര്‍ഷത്തിനിടയില്‍ ലോകത്ത് ഉത്പാദിപ്പിച്ചു.

സിമന്റും സ്റ്റീലും കഴിഞ്ഞാല്‍ മനുഷ്യനിര്‍മിത വസ്തുക്കളില്‍ ഏറ്റവും കൂടുതല്‍ വളര്‍ച്ച രേഖപ്പെടുത്തിയ ഉത്പന്നമാണ് പ്ലാസ്റ്റിക്. ഇന്ത്യയില്‍ പ്ലാസ്റ്റിക് നിര്‍മാണത്തില്‍ ഏര്‍പ്പെട്ടിരിക്കുന്ന 30,000ലേറെ വ്യവസായ യൂണിറ്റുകളുണ്ട്. മതിയായ മലിനീകരണ നിയന്ത്രണ സംവിധാനങ്ങളില്ലാത്ത ചെറുകിട യൂണിറ്റുകളാണ് ഏറെയും. ഇന്ത്യയില്‍ മുന്‍സിപ്പല്‍ ഖരമാലിന്യങ്ങളുടെ 10-12 ശതമാനം വരെ പ്ലാസ്റ്റിക് മാലിന്യമാണ്. ചൈനയാണ് ലോകത്ത് ഏറ്റവും കൂടുതല്‍ പ്ലാസ്റ്റിക് മാലിന്യം ഉത്പാദിപ്പിക്കുന്ന രാജ്യം. പ്ലാസ്റ്റിക് മാലിന്യം മോശപ്പെട്ട രീതിയില്‍ കൈകാര്യം ചെയ്യുന്ന ലോകത്തെ 20 രാജ്യങ്ങളുടെ പട്ടികയില്‍ ഇന്ത്യയുമുണ്ട്. ഇന്ത്യയില്‍ മെട്രോ നഗരങ്ങളില്‍ ഒതുങ്ങി നിന്നിരുന്ന പ്ലാസ്റ്റിക് മാലിന്യപ്രശ്‌നം ഇന്ന് മുന്‍സിപ്പല്‍ പട്ടണങ്ങളിലേക്കും വിദൂര ഗ്രാമങ്ങളിലേക്കുമെല്ലാം വ്യാപിച്ചിട്ടുണ്ട്.

പരിസ്ഥിതിയിലേക്ക് വലിച്ചെറിയപ്പെടുന്ന പ്ലാസ്റ്റിക് മാലിന്യം പെട്ടെന്ന് വിഘടിക്കുന്നില്ല. കാര്യമായ മാറ്റമൊന്നുമില്ലാതെ അത് നൂറ്റാണ്ടുകളോളം പ്രകൃതിയില്‍ തങ്ങിനില്‍ക്കും. പരിസ്ഥിതി മലിനീകരണത്തിന്റെ ഏറ്റവും ദൃശ്യമായ സൂചകങ്ങളില്‍ ഒന്നാണ് പ്ലാസ്റ്റിക് മാലിന്യം. ഫോസില്‍ എണ്ണകളില്‍ നിന്നോ പ്രകൃതിവാതകത്തില്‍ നിന്നോ കല്‍ക്കരിയില്‍ നിന്നോ ആണ് പ്ലാസ്റ്റിക്കിന്റെ ഉത്പാദനം. പ്ലാസ്റ്റിക്കിന്റെ ഉത്പാദനപ്രക്രിയയില്‍ തന്നെ വന്‍തോതില്‍ ദോഷകരമായ മാലിന്യങ്ങള്‍ പുറന്തള്ളപ്പെടുന്നു. ഒരു കിലോഗ്രാം പ്ലാസ്റ്റിക് ഉല്‍പാദിപ്പിക്കുമ്പോള്‍ രണ്ടു മുതല്‍ മൂന്നുകിലോഗ്രാം വരെ കാര്‍ബണ്‍ ഡയോക്‌സൈഡ് അന്തരീക്ഷത്തിലേക്ക് വിസര്‍ജ്ജിക്കപ്പെടുന്നു. ലോകത്ത് ഉത്പാദിപ്പിക്കുന്ന ഫോസില്‍ ഇന്ധനങ്ങളുടെ എട്ട് ശതമാനത്തോളമാണ് പ്ലാസ്റ്റിക് നിര്‍മാണത്തിന് വേണ്ടി ഉപയോഗിക്കുന്നത്.

അന്തരീക്ഷത്തില്‍ ഹരിതഗൃഹ വാതകങ്ങളുടെ അളവ് കൂടുന്നതിലും ആഗോളതാപനത്തിലും പ്ലാസ്റ്റിക് നിര്‍മാണത്തിനും വലിയ പങ്കുണ്ട്. പ്ലാസ്റ്റിക് നിര്‍മാണത്തിനുവേണ്ടി എണ്ണ സംസ്‌കരിക്കുമ്പോള്‍ കാര്‍ബണ്‍ മോണോക്‌സൈഡ്, ഹൈഡ്രജന്‍ സള്‍ഫൈഡ്, മീതേന്‍, ഓസോണ്‍, ബെല്‍സീന്‍ തുടങ്ങിയ വാതകങ്ങളും അന്തരീക്ഷത്തിലേക്ക് വിസര്‍ജ്ജിക്കപ്പെടുന്നു. ശ്വസിക്കുന്ന അന്തരീക്ഷ വായു മലിനീകരിക്കുന്നതിന് പുറമേ ആഗോളതാപനം ത്വരിതപ്പെടുത്തുന്നതിലും ഈ വാതകങ്ങള്‍ വലിയ പങ്ക് വഹിക്കുന്നു. പ്ലാസ്റ്റിക് നിര്‍മാണ പ്രക്രിയയില്‍ ഉപയോഗിക്കുന്ന രാസവസ്തുക്കളും പ്ലാസ്റ്റിക്കിന്റെ ഘടകങ്ങളായ ബെന്‍സീനും വിനൈല്‍ ക്ലോറൈഡും മനുഷ്യരില്‍ അര്‍ബുദത്തിന് കാരണമാകും.

പ്ലാസ്റ്റിക് മണ്ണും ജലവും വായുവും ഒരുപോലെ മലിനീകരിക്കുന്നു. പ്ലാസ്റ്റിക് കൂടിച്ചേര്‍ന്ന ഖരമാലിന്യങ്ങളുടെ സംസ്‌കരണം പ്രയാസമേറിയതാണ്. ‘ലാന്റ്ഫില്ലു’കളില്‍ ശേഖരിക്കപ്പെടുന്ന പ്ലാസ്റ്റിക് മാലിന്യകൂമ്പാരം വര്‍ഷങ്ങളോളം വിഘടിക്കാതെ പൊതുജനാരോഗ്യത്തിന് ഭീഷണി ഉയര്‍ത്തും. ഇന്ത്യയെ പോലുള്ള രാജ്യങ്ങളില്‍ ജനസംഖ്യാപെരുപ്പം കാരണം പ്ലാസ്റ്റിക് മാലിന്യം ശേഖരിച്ചു വെച്ച ലാന്റ് ഫില്ലറുകള്‍ക്ക് സമീപം സുരക്ഷിതമായ ‘ബഫര്‍സോണ്‍’ നിലനിര്‍ത്താന്‍ സാധിക്കാറില്ല. ഇത് സമീപവാസികളുടെ ആരോഗ്യത്തെ ദോഷകരമായി ബാധിക്കും. ഉപയോഗത്തിനു ശേഷം വലിച്ചെറിയപ്പെടുന്ന പ്ലാസ്റ്റിക് മാലിന്യം കുന്നുകൂടി ജലനിര്‍ഗമനചാലുകളിലെ വെള്ളത്തിന്റെ ഒഴുക്ക തടസ്സപ്പെടുത്തും.

വെള്ളകെട്ടുണ്ടാകുന്നതോടെ ജലനിര്‍ഗ്ഗമന ചാലുകള്‍ കൊതുകുകളുടെ പ്രജനന കേന്ദ്രമായി മാറും. ലാന്‍ഡ്ഫില്ലുകളില്‍ കുമിഞ്ഞുകൂടുന്ന പ്ലാസ്റ്റിക് മാലിന്യത്തില്‍ നിന്നും ഭൂഗര്‍ഭ ജലത്തിലേക്ക് വാര്‍ന്നിറങ്ങുന്ന ഈയം, കാഡ്മിയം തുടങ്ങിയ ഘനലോഹങ്ങള്‍ ജലസ്രോതസുകളെ മലിനീകരിക്കും. ടൂറിസത്തിലൂടെ വന്യജീവി സങ്കേതങ്ങളില്‍ എത്തിച്ചേരുന്ന പ്ലാസ്റ്റിക് മാലിന്യം വന്യമൃഗങ്ങളുടെ ഉദരങ്ങളിലെത്തി അവയില്‍ ആരോഗ്യപ്രശ്‌നങ്ങള്‍ സൃഷ്ടിക്കുന്നു.

പ്രത്യുത്പാദന തകരാറുകള്‍, തലച്ചോറിന്റേയും നാഡീവ്യൂഹത്തിന്റേയും പ്രവര്‍ത്തനത്തിലുള്ള തകരാറുകള്‍, കാന്‍സര്‍, ഹൃദത്തത്തിന്റേയും ശ്വാസകോശത്തിന്റേയും രോഗങ്ങള്‍, പൊണ്ണത്തടി, ഹോര്‍മോണ്‍ തകരാറുകള്‍, നേരത്തെയുള്ള പ്രമേഹം എന്നിങ്ങനെ പ്ലാസ്റ്റിക് മാലിന്യം മനുഷ്യശരീരത്തില്‍ സൃഷ്ടിക്കുന്ന ആരോഗ്യപ്രശ്‌നങ്ങള്‍ നിരവധിയാണ്. പല പ്ലാസ്റ്റിക്കുകളിലും മനുഷ്യശരീരത്തിനും പൊതുജനാരോഗ്യത്തിനും ഹാനികരമായ ഫ്താലേറ്റുകള്‍, ബിപിഎ ബൈഫസ്ഫിനോള്‍-എ എന്നീരാസഘടകങ്ങള്‍ അടങ്ങിയിട്ടുണ്ട്.

മനുഷ്യ ഹോര്‍മോണുകളുടേയും പ്രത്യുത്പാദന അവയവങ്ങളുടേയും പ്രവര്‍ത്തനത്തിന് ദോഷകരമാണ് ഈ രണ്ടു രാസവസ്തുക്കളും. ഇവയടങ്ങിയ പ്ലാസ്റ്റിക് പാത്രങ്ങളില്‍ ചൂടുള്ള ഭക്ഷണപദാര്‍ത്ഥങ്ങള്‍ സൂക്ഷിക്കുകയോ ചൂടാക്കുകയോ ചെയ്യുമ്പോള്‍ ഈ രണ്ടു രാസവസ്തുക്കളും ഭക്ഷണത്തിലേക്ക് വാര്‍ന്നിറങ്ങും. അമേരിക്കയില്‍ നടത്തിയ ഒരു പഠനത്തില്‍ ആറുവയസിനു മുകളിലുള്ള 95 ശതമാനം മൂത്രനാഡികളിലും ബിപിഎ എന്ന രാസവസ്തുവിന്റെ സാന്നിധ്യം കണ്ടെത്തിയിട്ടുണ്ട്. കുട്ടികളുടെ വളര്‍ച്ചയെ മുരടിപ്പിക്കുന്നതോടൊപ്പം തലച്ചോറിന്റെ പ്രവര്‍ത്തനത്തിനും ഹാനികരമാണ് ബിപിഎ. അതേസമയം ഫ്താലേറ്റുകളുടെ കൂടിയ സാന്നിധ്യം കുട്ടികളില്‍ പൊണ്ണത്തടിക്ക് കാരണമാകും.

പലര്‍ക്കും പ്ലാസ്റ്റിക് കത്തിച്ച് ശല്യം ഒഴിവാക്കുന്നത് നിത്യജീവിതത്തില്‍ സാധാരണശീലങ്ങളില്‍ ഒന്നാണ്. ഖരമാലിന്യം ശേഖരിക്കാന്‍ സര്‍ക്കാര്‍ സംവിധാനങ്ങള്‍ ഫലപ്രദമല്ലാത്ത പ്രദേശങ്ങളില്‍ പ്ലാസ്റ്റിക് കത്തിക്കുന്നത് പലര്‍ക്കും ലളിതമായ ഒരു പരിഹാരമാര്‍ഗമാണ്. മറ്റു ഖരമാലിന്യങ്ങള്‍ കത്തിക്കുന്നതില്‍ കൂടുതല്‍ ചൂട് പ്ലാസ്റ്റിക് മാലിന്യങ്ങള്‍ കത്തിക്കുമ്പോഴുണ്ടാകും. പ്ലാസ്റ്റിക് കത്തിക്കുമ്പോള്‍ പുറന്തള്ളപ്പെടുന്ന ഡയോക്ലിന്‍ മനുഷ്യര്‍ക്കും മൃഗങ്ങള്‍ക്കും ഒരുപോലെ ഹാനികരമാണ്. ചുമ, മനംപുരട്ടല്‍, മന്ദത, ശ്വസതടസ്സം തുടങ്ങിയവയാണ് ഡയോക്ലിന്‍ ശ്വസിക്കുന്നതു കൊണ്ട് പെട്ടെന്നുണ്ടാകുന്ന ആരോഗ്യപ്രശ്‌നങ്ങള്‍ പ്ലാസ്റ്റിക് കത്തിക്കുമ്പോള്‍ പുറന്തളളപ്പെടുന്ന സോളിക്ലോറിനേറ്റഡ് ബൈ ഫിനൈല്‍സ്,ഓസോണ്‍ എന്നിവയും ആരോഗ്യത്തിന് ഹാനികരമാണ്.

ജൂണ്‍ 5 ലോക പരിസ്ഥിതി ദിനം

ജൂണ്‍ 5 ലോക പരിസ്ഥിതി ദിനം. ലോകമെങ്ങും പരിസ്ഥിതി നശിച്ചുകൊണ്ടിരിക്കുമ്പോള്‍ ഇത് സംരക്ഷിക്കേണ്ടതിന്റെ ആവശ്യകതയാണ് ഈ ദിനം വിളിച്ചോതുന്നത്. കാസര്‍ഗോട്ടുകാരനായ അബ്ദുള്‍ കരീം തന്റെ ജീവിതത്തിലൂടെ കാണിച്ച് തന്നത് എങ്ങനെ പരിസ്ഥിതിക്കായി ജീവിക്കാമെന്നാണ്. പരിസ്ഥിതി സംരക്ഷണം എന്ന ലക്ഷ്യത്തിനായി 32 ഏക്കറുള്ള തന്റെ ഭൂമി കാടാക്കി മാറ്റുകയാണ് ഇദ്ദേഹം ചെയ്തത്.

Posted by SouthLive Malayalam on Monday, 4 June 2018

വെള്ളത്തിന്റെയോ സൂര്യപ്രകാശത്തിന്റെയോ പ്രവര്‍ത്തനങ്ങളാല്‍ നഗ്നനേത്രങ്ങള്‍ക്ക് ദൃശ്യമാവാത്ത സൂക്ഷ്മകണങ്ങളായി പ്ലാസ്റ്റിക് വിഭജിക്കപ്പെടുന്നു.മൈക്രോപ്ലാസ്റ്റിക് എന്നറിയപ്പെടുന്ന ഈ സൂക്ഷ്മ പ്ലാസ്റ്റിക് കണങ്ങള്‍ പരിസ്ഥിതിയില്‍ സര്‍വ്വവ്യാപിയാണ്. കുടിക്കുന്ന വെള്ളത്തിലും ഭക്ഷിക്കുന്ന മത്സ്യത്തിലും ഉപ്പിലുമെല്ലാം മൈക്രോപ്ലാസ്റ്റികിന്റെ സാന്നിധ്യമുണ്ട്. സമുദ്രങ്ങളിലും ജലാശയങ്ങളിലും മണ്ണിലുമെല്ലാം ഇത് സര്‍വ്വവ്യാപിയാണ്. ഒരിക്കല്‍ ഒരു ജീവിയുടെ ഉദരത്തില്‍ പ്രവേശിച്ചുകഴിഞ്ഞാല്‍ ഒരു മാറ്റവുമില്ലാതെ മൈക്രോപ്ലാസ്റ്റിക് ശരീരത്തില്‍ തുടരും. വളരെ ചെറുതായതിനാല്‍ അരിച്ചെടുക്കുന്നതില്‍ നിന്നും ശുചീകരണ പ്ലാന്റുകളില്‍ നിന്നുമെല്ലാം മൈക്രോപ്ലാസ്റ്റിക് രക്ഷപ്പെടും. ചെറിയ കഷണങ്ങളായി വിഭജിക്കപ്പെടുന്ന പ്ലാസ്റ്റിക് മാലിന്യ കൂമ്പാരമാണ് മൈക്രോപ്ലാസ്റ്റികിന്റെ പ്രധാന ഉറവിടം. പ്ലാസ്റ്റിക് മാലിന്യം പൊടിഞ്ഞുണ്ടാകുന്ന മൈക്രോപ്ലാസ്റ്റിക്കിന്റെ സാന്നിധ്യം കേരളത്തിലെ കുട്ടനാടന്‍ ജലാശയങ്ങളില്‍ അപകടകരമായ അളവിലാണെന്ന് അടുത്ത കാലത്ത് നടത്തിയ ചില പഠനങ്ങള്‍ സൂചിപ്പിക്കുന്നു. മത്സ്യങ്ങളുടെ പ്രജനനം, പൊതുജനാരോഗ്യം എന്നിവക്കെല്ലാം മൈക്രോപ്ലാസ്റ്റിക് മലിനീകരണം ഭീഷണിയാണ്.

ആനുപാതികമല്ലാത്ത വിധം പ്ലാസ്റ്റിക് മലിനീകരണത്തിന്റെ ഭീഷണി നേരിടുന്നത് സമുദ്ര ആവാസവ്യവസ്ഥയും സമുദ്രജീവികളുമാണ്.വൃത്തിയാക്കാനാവാത്ത വിധം സമുദ്രങ്ങളില്‍ പ്ലാസ്റ്റിക് മാലിന്യങ്ങള്‍ കുമിഞ്ഞു കൂടുന്നതായി പഠനങ്ങള്‍ തെളിയിക്കുന്നു. 8000-ലധികം സ്പീഷിസ് സമുദ്രജീവികളില്‍ പ്ലാസ്റ്റിക് മാലിന്യത്തിന്റെ അവശിഷ്ടങ്ങള്‍ കണ്ടെത്തിയിട്ടുണ്ട്. ഓരോ വര്‍ഷവും കുറഞ്ഞത് 80 ലക്ഷം ടണ്‍ പ്ലാസ്റ്റിക് മാലിന്യമെങ്കിലും സമുദ്രങ്ങളില്‍ എത്തിച്ചേരുന്നു. സമുദ്രത്തില്‍ ഒഴുകി എത്തുന്ന ചപ്പുചവറുകളില്‍ 60-90 ശതമാനവും വിവിധ തരം പ്ലാസ്റ്റിക് പോളിമറുകളാണ്. പ്ലാസ്റ്റിക് മലിനീകരണം ഇന്നത്തെ രീതിയില്‍ നിയന്ത്രണമില്ലാതെ തുടര്‍ന്നാല്‍ 2050-ഓടെ കടലിലുള്ള എല്ലാ മത്സ്യത്തിനേക്കാളും കൂടുതല്‍ തൂക്കത്തില്‍ പ്ലാസ്റ്റിക് ഉണ്ടാകും. 2050-ആകുമ്പോഴേക്കും 99 ശതമാനം കടല്‍പ്പക്ഷികളുടെയും ഉദരത്തില്‍ പ്ലാസ്റ്റിക് മാലിന്യം കടന്നെത്തിയിട്ടുണ്ടാകും. പല സമുദ്രജീവികള്‍ക്കും പ്ലാസ്റ്റിക് മാലിന്യത്തെ ഭക്ഷണത്തില്‍ നിന്നും വേര്‍തിരിച്ചറിയാനാവില്ല. പ്ലാസ്റ്റിക് മാലിന്യം വയറില്‍ നിറയുന്നതോടെ പല സമുദ്രജീവികളും വിശപ്പറിയുന്നില്ല. പ്ലാസ്റ്റിക് ദഹിക്കാതെ ഉള്ളില്‍ കുടുങ്ങി കിടക്കുന്നതിനാല്‍ അവയ്ക്ക് ഭക്ഷണം കഴിക്കാനാവുകയില്ല.

കടലുകളില്‍ സമുദ്രപ്രവാഹങ്ങള്‍ കൂടിച്ചേരുന്ന ഇടങ്ങളില്‍ പ്ലാസ്റ്റിക് മാലിന്യങ്ങള്‍ തിരകളില്‍ ചുഴറ്റിയെറിഞ്ഞ് വലിയ ദ്വീപുകളായ് പരിണമിക്കുന്നു. ഇത് കടലുകളില്‍ വലിയ വിസ്തൃതിയിലുള്ള പ്ലാസ്റ്റിക് ദ്വീപുകള്‍ക്ക് രൂപം നല്‍കും. മഹാസമുദ്രങ്ങളില്‍ ഇപ്പോള്‍ തന്നെ അഞ്ചോളം വന്‍ പ്ലാസ്റ്റിക് ദ്വീപുകളുണ്ട്. ഉത്തര പസഫിക് സമുദ്രത്തിന്റെ മധ്യത്തിലാണ് ഏറ്റവും വലിയ പ്ലാസ്റ്റിക് ദ്വീപ്. ഈ പ്ലാസ്റ്റിക് ദ്വീപിന് മെക്‌സിക്കോയെക്കാളും വലിപ്പമുണ്ട്. കടല്‍പ്പക്ഷികളും കടലാമകളും പവിഴപ്പുറ്റുകളുമെല്ലാം കടലിലെ പ്ലാസ്റ്റിക് മലിനീകരണത്തിന്റെ ഭീഷണി നേരിടുന്നു. ആത്യന്തികമായി മൈക്രോപ്ലാസ്റ്റിക്കായി വിഭജിക്കപ്പെടുന്ന പ്ലാസ്റ്റിക്മാലിന്യം കടല്‍ ജീവികളുടെ രക്തപ്രവാഹത്തിലും അവിടെ നിന്ന് അവയെ ഭക്ഷിക്കുന്ന മത്സ്യങ്ങളിലുമെത്തിച്ചേരുന്നു. ഈ മത്സ്യം ഭക്ഷിക്കുന്ന മനുഷ്യരില്‍ ഈ പ്ലാസ്റ്റിക് മലിന്യം കുമിഞ്ഞുകൂടുന്നതാണ് ആത്യന്തിക ഫലം. ബ്രിട്ടണില്‍ വിപണിയ്‌ലെത്തുന്ന മുപ്പതുശതമാനം മത്സ്യങ്ങളിലും പ്ലാസ്റ്റിക്കിന്റെ സാന്നിധ്യമുണ്ടെന്നാണ് അടുത്തകാലത്ത് കണ്ടെത്തിയിരുിക്കുന്നത്.

2050-ഓടെ പരിസ്ഥിതിയിലേക്കു തള്ളപ്പെടുന്ന പ്ലാസ്റ്റിക് മാലിന്യത്തിന്റെ തൂക്കം 1200 കോടി മെട്രിക് ടണ്ണായി വര്‍ധിക്കുമെന്നാണ് കണക്കാക്കിയിരിക്കുന്നത്.സമുദ്രങ്ങളിലെ പ്ലാസ്റ്റിക് മാലിന്യം നീക്കം ചെയ്യുന്നതിനും അപകടകരമായ പ്ലാസ്റ്റിക് ഉത്പന്നങ്ങള്‍ നിയന്ത്രിക്കുന്നതിനും പാരിസ് കാലാവസ്ഥ ഉടമ്പടിയുടെ മാനങ്ങളുള്ള ഒരു അന്താരാഷ്ട്ര കരാര്‍ വേണമെന്നാണ് പരിസ്ഥിതി സംഘടനകളുടെ ആവശ്യം. ജൈവികമായി വിഘടിക്കുന്ന പ്ലാസ്റ്റിക്, പ്ലാസ്റ്റിക് വിഘടിപ്പിക്കുന്ന എന്‍സൈം തുടങ്ങിയ കണ്ടുപിടുത്തങ്ങള്‍ പ്രതീക്ഷ പകരുന്നുണ്ടെങ്കിലും പരിസ്ഥിതിയിലേക്ക് ഇതിനകം തള്ളിയിടപ്പെട്ട പ്ലാസ്റ്റിക് മാലിന്യം ഒരു ആഗോള പ്രശ്‌നമായി മാറിയിട്ടുണ്ട്. ആവശ്യമുണ്ടെങ്കില്‍ മാത്രം പ്ലാസ്റ്റിക് ഉപയോഗിക്കുകയും വലിച്ചെറിയല്‍ സംസ്‌കാരം ഉപേക്ഷിക്കുകയും ചെയ്താല്‍ പ്ലാസ്റ്റിക് മലിനീകരണത്തിന്റെ തീവ്രത അല്പമെങ്കിലും കുറക്കാം.

Advertisement