നമ്മുടെ ശരീരത്തിന്റെ പിൻഭാഗത്ത്, വയറിനു പിന്നിൽ ഒളിഞ്ഞിരിക്കുന്ന ഒരു ചെറിയ അവയവമാണ് പാൻക്രിയാസ്. ഭക്ഷണം നന്നായി ദഹിപ്പിക്കാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും ഇത് സഹായിക്കുന്നു. എന്നാൽ ഈ ചെറിയ അവയവത്തിൽ ചിലപ്പോൾ അപകടകരമായ മാറ്റങ്ങൾ സംഭവിക്കാം. പാൻക്രിയാസിലെ കോശങ്ങൾ അനിയന്ത്രിതമായി വളർന്ന് ഒരു ട്യൂമർ രൂപപ്പെടുന്ന അവസ്ഥയാണ് പാൻക്രിയാറ്റിക് കാൻസർ.
ആദ്യഘട്ടത്തിൽ ഈ രോഗം പലപ്പോഴും ശ്രദ്ധയിൽപ്പെടാതെ പോകും. എന്നാൽ രോഗം തീവ്രമായാൽ ചില പ്രധാന ലക്ഷണങ്ങൾ പ്രകടമാകാം. പാൻക്രിയാറ്റിക് കാൻസർ ഉണ്ടെന്ന് സൂചിപ്പിക്കുന്ന പ്രധാന ലക്ഷണങ്ങൾ എന്തൊക്കെയാണെന്ന് നോക്കാം:
1. തുടർച്ചയായ മഞ്ഞപ്പിത്തം: മഞ്ഞപ്പിത്തം എന്നത് ചർമ്മവും കണ്ണിന്റെ വെള്ളയും മഞ്ഞ നിറത്തിലാകുന്ന ഒരു അവസ്ഥയാണ്. ശരീരത്തിൽ ബിലിറൂബിൻ എന്ന മഞ്ഞനിറമുള്ള വസ്തുവിന്റെ അളവ് അധികമാകുമ്പോൾ ഇത് സംഭവിക്കുന്നു. പാൻക്രിയാറ്റിക് കാൻസർ പോലുള്ള ചില രോഗങ്ങളിൽ, കരളിനെയും ചെറുകുടലിനെയും ബന്ധിപ്പിക്കുന്ന ബൈൽഡക്ട് എന്ന കുഴലിൽ ട്യൂമർ ഉണ്ടാകുകയും അത് ബിലിറൂബിന്റെ ഒഴുക്ക് തടയുകയും ചെയ്യുന്നു. ഇത് രക്തത്തിൽ ബിലിറൂബിൻ കെട്ടിക്കിടക്കാൻ ഇടയാക്കുകയും മഞ്ഞപ്പിത്തത്തിന് കാരണമാകുകയും ചെയ്യുന്നു. ഇരുണ്ട നിറത്തിലുള്ള മൂത്രം, മലത്തിന് നിറവ്യത്യാസം, ചർമ്മത്തിനും കണ്ണുകൾക്കും മഞ്ഞനിറം എന്നിവയാണ് ഇതിന്റെ പ്രധാന ലക്ഷണങ്ങൾ. ഇത്തരം ലക്ഷണങ്ങൾ കണ്ടാൽ ഉടൻ തന്നെ ഒരു ഡോക്ടറെ കണ്ട് പരിശോധിപ്പിക്കേണ്ടത് അത്യാവശ്യമാണ്.
2. പുറത്തും വയറിനും തുടർച്ചയായ വേദന: പുറംഭാഗത്തും വയറിനുള്ളിലും തുടർച്ചയായി അനുഭവപ്പെടുന്ന വേദന പാൻക്രിയാറ്റിക് കാൻസറിന്റെ ഒരു സൂചനയായിരിക്കാം. പലപ്പോഴും വേദന വയറിന്റെ മുകൾ ഭാഗത്തു നിന്നാരംഭിച്ച് പുറത്തേക്ക് വ്യാപിക്കുന്നു, ഈ വേദന സാധാരണയായി കടുത്തതും ദീർഘനേരം നീണ്ടുനിൽക്കുന്നതുമായിരിക്കും.പാൻക്രിയാസിലെ ട്യൂമർ വളരുമ്പോൾ ചുറ്റുമുള്ള നാഡികളിൽ സമ്മർദം ചെലുത്തുകയും ഇത് കഠിനമായ വേദനയ്ക്ക് കാരണമാവുകയും ചെയ്യും. വേദന ഇടയ്ക്കിടെ വരുകയാണെങ്കിലോ, പ്രത്യേക ഭാഗങ്ങളിൽ മാത്രം അനുഭവപ്പെടുകയാണെങ്കിലോ ഉടൻ തന്നെ ഒരു ഡോക്ടറെ കണ്ട് പരിശോധിപ്പിക്കേണ്ടത് അത്യാവശ്യമാണ്.
3. ചൊറിച്ചിൽ: പല കാരണങ്ങളാൽ ചർമ്മം ചൊറിഞ്ഞേക്കാം. അതിൽ ഒന്ന് പാൻക്രിയാറ്റിക് കാൻസറാണ്. പാൻക്രിയാറ്റിക് കാൻസർ ബാധിച്ചവരിൽ ശരീരത്തിൽ ബിലിറൂബിൻ അടിഞ്ഞുകൂടുന്നത് കൊണ്ട് മഞ്ഞപ്പിത്തം ഉണ്ടാകുകയും അത് തീവ്രമായ ചൊറിച്ചിലിന് കാരണമാവുകയും ചെയ്യാം.
4. *പെട്ടെന്ന് ഭാരം കുറയുക– *ഭക്ഷണക്രമത്തിലോ വ്യായാമത്തിലോ മാറ്റമില്ലാതെ പെട്ടെന്ന് ഭാരം കുറയുന്നത് ഗുരുതരമായ ആരോഗ്യപ്രശ്നങ്ങളുടെ ലക്ഷണം ആകാം. കാൻസർ പോലുള്ള രോഗങ്ങൾ കൂടുതൽ ഊർജം ഉപയോഗിക്കുകയും, ട്യൂമർ വയറിൽ അമർന്ന് ആഹാരം കഴിക്കാൻ ബുദ്ധിമുട്ടുണ്ടാക്കുകയും ചെയ്യുന്നത് ഇതിന് കാരണമാകാം. പാൻക്രിയാസിന്റെ പ്രശ്നങ്ങൾ ദഹനത്തെ ബാധിക്കുകയും ഭാരം കുറയ്ക്കാൻ ഇടയാക്കുകയും ചെയ്യും.
5. പ്രമേഹം: കുടുംബ ചരിത്രമോ പ്രീഡയബറ്റിക് ലക്ഷണങ്ങളോ ഇല്ലാതിരുന്നിട്ടും ചിലർക്ക് പെട്ടെന്ന് പ്രമേഹം വരുന്നത് വളരെ ഗുരുതരമായ ആരോഗ്യ പ്രശ്നങ്ങളുടെ ലക്ഷണമായിരിക്കാം. ഉദാഹരണത്തിന്, ഇൻസുലിൻ ഉത്പാദിപ്പിക്കുന്ന കോശങ്ങളെ ബാധിക്കുന്ന കാൻസർ പോലുള്ള രോഗങ്ങൾ കാരണം ഇങ്ങനെ സംഭവിക്കാം. ഇൻസുലിൻ ഉത്പാദനം തടസ്സപ്പെടുമ്പോൾ രക്തത്തിലെ പഞ്ചസാരയുടെ അളവ് കൂടുകയും ശരീരത്തിന് ഗ്ലൂക്കോസ് ഉപയോഗിക്കാൻ ബുദ്ധിമുട്ട് അനുഭവപ്പെടുകയും ചെയ്യും.
6. ക്ഷീണം, തളർച്ച :ക്ഷീണം, തളർച്ച എന്നത് നമുക്ക് പലപ്പോഴും അനുഭവപ്പെടുന്ന ഒരു സാധാരണ പ്രശ്നമാണ്. എന്നാൽ, ഇതിനൊപ്പം അടിവയറ്റിൽ വേദന, മൂത്രത്തിന്റെ നിറം മാറൽ തുടങ്ങിയ മറ്റ് ലക്ഷണങ്ങൾ ഉണ്ടായാൽ അത് പാൻക്രിയാറ്റിക് കാൻസർ പോലുള്ള ഒരു ഗുരുതരമായ അസുഖത്തിന്റെ ലക്ഷണമായിരിക്കാം. അതിനാൽ, ഇത്തരം ലക്ഷണങ്ങൾ അനുഭവപ്പെടുന്നവർ താമസിയാതെ ഒരു ഡോക്ടറെ കണ്ട് പരിശോധിപ്പിക്കേണ്ടത് വളരെ പ്രധാനമാണ്.
Dr Jeesemon JoseLead
Read more
Consultant Department of Medical Gastroenterology and Hepatology
