പ്രാവുകളുമായി സമ്പർക്കം പുലർത്തുന്നവർ ഇനി ശ്രദ്ധ പാലിക്കേണ്ടതാണ്. പ്രാവിൻ്റെ കാഷ്ഠമായും തൂവലുമായും ദീർഘനേരം സമ്പർക്കം പുലർത്തുന്നത് വിട്ടുമാറാത്ത ശ്വാസകോശ രോഗങ്ങൾക്ക് കാരണമാകുമെന്ന് കണ്ടെത്തിയിരിക്കുകയാണ് ഒരു പഠനം.
ഡൽഹിയിലെ സർ ഗംഗാറാം ആശുപത്രിയിലെ ഡോക്ടർമാരാണ് ഇക്കാര്യം കണ്ടെത്തിയത്.പ്രാവുകൾക്ക് ഭക്ഷണം കൊടുക്കുന്നതും അവയുമായി അടുത്തിടപഴകുന്നതും മനുഷ്യർക്ക് കാര്യമായ ആരോഗ്യപ്രശ്നങ്ങൾ ഉണ്ടാക്കുമെന്നാണ് ഡോക്ടർമാർ അടുത്തിടെ നടത്തിയ ഒരു പഠനം പറയുന്നത്.
ഡൽഹിയിൽ നിന്നുള്ള 11 വയസ്സുകാരനെ ചുമ കാരണം ഹോസ്പിറ്റൽ പ്രവേശിപ്പിച്ചിരുന്നു. കുട്ടിക്ക് ഹൈപ്പർസെൻസിറ്റിവിറ്റി ന്യൂമോണിറ്റിസ് ഉണ്ടെന്ന് കണ്ടെത്തുകയും ചെയ്തു. ഇത് പ്രാവിൻ്റെ പ്രോട്ടീനുകളോടുള്ള അലർജിയെ തുടർന്നാണെന്നാണ് വിദഗ്ദർ പറഞ്ഞത്.
എച്ച്‌പി ഒരു വിട്ടുമാറാത്ത ശ്വാസകോശ രോഗമാണെന്നും ഇവ അവയവങ്ങൾക്ക് കേടുപാടുകൾ ഉണ്ടാകുകയും ശ്വസിക്കാൻ പ്രയാസമുണ്ടാക്കുമെന്നും പറയുന്നു. മുതിർന്നവരിൽ ഈ അവസ്ഥ വളരെ കൂടുതലും കുട്ടികളിൽ അപൂർവവുമാണ്. ഒരു വർഷം ഒരു ലക്ഷം ജനസംഖ്യയിൽ 2-4 പേരെ ഇത് ബാധിക്കാറുമുണ്ട്.