മാതാപിതാക്കളുടെയും വിദ്യാര്‍ത്ഥികളുടെയും ആശങ്കകള്‍ വെബിനാര്‍ വഴി അഭിസംബോധന ചെയ്തതിന് പിന്നാലെ അധ്യാപകര്‍ക്കായി വെബിനാര്‍ പ്രഖ്യാപിച്ച് എച്ച്ആര്‍ഡി മന്ത്രി രമേഷ് പൊക്രിയാല്‍. മെയ് 14-ന് ഉച്ചയ്ക്ക് 12 മണിക്കാണ് സോഷ്യല്‍ മീഡിയയില്‍ മന്ത്രി ലൈവിലെത്തുക.
അധ്യാപകര്‍ക്ക് തങ്ങളുടെ ആശങ്കകളും ചോദ്യങ്ങളും സോഷ്യല്‍ മീഡിയയിലൂടെ മന്ത്രിയോട് ചോദിക്കാം. മെയ് 11-ന് സര്‍വകലാശാല വൈസ് ചാന്‍സലര്‍മാര്‍ക്കായും വെബിനാര്‍ സംഘടിപ്പിക്കുന്നുണ്ട്. അസോസിയേഷന്‍ ഓഫ് ഇന്ത്യന്‍ യൂണിവേഴ്‌സിറ്റിയുടെ പേജില്‍ ഇക്കാര്യം അറിയിച്ചിരുന്നു.
മെയ് 5-നാണ് വിദ്യാര്‍ത്ഥികള്‍ക്കായി വെബിനാര്‍ സംഘടിപ്പിച്ചത്. നീറ്റ്, ജെഇഇ പരീക്ഷാ തിയതികള്‍ അന്ന് പ്രഖ്യാപിച്ചിരുന്നു. സ്‌കൂള്‍ വിദ്യാര്‍ത്ഥികളുടെ സിലബസ് വെട്ടി കുറയ്ക്കുമെന്നും അറിയിച്ചിരുന്നു.