സൂപ്പര്‍ ഹിറ്റ് ചിത്രം ‘ആടുജീവിത’ത്തിന് ശേഷം റിലീസ് ചെയ്ത പൃഥ്വിരാജിന്റെ ബോളിവുഡ് സിനിമയാണ് ‘ബഡേ മിയാന്‍ ഛോട്ടേ മിയാന്‍’. അക്ഷയ് കുമാറിന്റെയും ടൈഗര്‍ ഷ്രോഫിന്റെയും വില്ലനായി പൃഥ്വിരാജ് വേഷമിട്ട ചിത്രം ഇനി ഒ.ടി.ടിയില്‍ കാണാം. ചിത്രം നെറ്റ്ഫ്‌ളിക്‌സില്‍ സ്ട്രീമിംഗ് ആരംഭിച്ചു.
അലി അബ്ബാസ് സഫര്‍ സംവിധാനം ചെയ്ത ചിത്രത്തില്‍ ഡോ. കബീര്‍ എന്ന കഥാപാത്രമായാണ് പൃഥ്വിരാജ് വേഷമിട്ടത്. 350 കോടി ബജറ്റിലൊരുക്കിയ ചിത്രത്തിന് തിയേറ്ററില്‍ നിന്നും 95.48 കോടി രൂപ മാത്രമേ നേടാനായിട്ടുള്ളു. ചിത്രത്തിനെതിരെ ആദ്യ ദിനത്തില്‍ തന്നെ നെഗറ്റീവ് അഭിപ്രായങ്ങള്‍ ആയിരുന്നു ഉയര്‍ന്നത്.
ചിത്രവുമായി ബന്ധപ്പെട്ട് പൃഥ്വിരാജിനെതിരെ ട്രോളുകളും ഉയരുന്നുണ്ട്. ഡേറ്റ് ക്ലാഷിനെ തുടര്‍ന്ന് ദുല്‍ഖര്‍ സല്‍മാന്‍ വേണ്ടെന്ന് വച്ച സിനിമയായിരുന്നു ബഡേ മിയാന്‍. തുടര്‍ന്ന് ആയിരുന്നു ചിത്രം പൃഥ്വിരാജിലേക്ക് എത്തിയത്. ഇതാണ് ട്രോളുകളില്‍ നിറയുന്നത്.
ബഡേ മിയാന്‍ അടക്കം പൃഥ്വിരാജ് ഇതുവരെ വേഷമിട്ട എല്ലാ ബോളിവുഡ് ചിത്രങ്ങളും പരാജയമായിരുന്നു. അയ്യ, ഔറംഗസേബ്, നാം ശബ്ന എന്നിവയാണ് പൃഥ്വിരാജിന്റെ മറ്റ് സിനിമകള്‍. അതേസമയം, സൊനാക്ഷി സിന്‍ഹ, മാനുഷി ചില്ലര്‍, അലയ എഫ് എന്നിവരായിരുന്നു ചിത്രത്തിലെ നായികമാര്‍.
വഷു ഭഗ്‌നാനി, ജാക്കി ഭഗ്‌നാനി, ദീപ്ഷിഖ ദേശ്മുഖ്, ഹിമാന്‍ഷു കിഷന്‍ മെഹ്‌റ, അലി അബ്ബാസ് സഫര്‍ എന്നിവര്‍ ചേര്‍ന്നാണ് ചിത്രം നിര്‍മ്മിച്ചത്. അലി അബ്ബാസ് സഫറും ആദിത്യ ബസുവുമാണ് ചിത്രത്തിന്റെ തിരക്കഥ ഒരുക്കിയത്.
