തന്റെ ജയില്‍ ജീവിതം ആസ്പദമാക്കി ഒരുക്കുന്ന സിനിമ ‘യുടി 69’ന്റെ ട്രെയ്‌ലര്‍ പുറത്തുവിട്ടിരിക്കുകയാണ് രാജ് കുന്ദ്ര. ജയിലില്‍ ആയതിന് ശേഷം മാസ്‌ക് വച്ച് പുതച്ചുമൂടിയിരിക്കുന്ന വസ്ത്രം ധരിച്ചാണ് കുന്ദ്ര പൊതുവിടങ്ങളില്‍ എത്താറുള്ളത്. ട്രെയ്‌ലര്‍ ലോഞ്ചില്‍ വച്ച് താരം തന്റെ മാസ്‌ക് അഴിച്ചുമാറ്റിയിരുന്നു.
ഈ വേദിയില്‍ വച്ച് രാജ് കുന്ദ്ര പറഞ്ഞ വാക്കുകളാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. സിനിമ ചെയ്യാന്‍ ശില്‍പ്പ ഷെട്ടി പിന്തുണ നല്‍കിയോ എന്ന ചോദ്യത്തിന്, ഇങ്ങനൊരു സിനിമ ചെയ്യണമെന്ന് പറഞ്ഞപ്പോള്‍ ശില്‍പ്പ ചെരുപ്പ് എടുത്ത് തന്നെ എറിയുകയാണ് ആദ്യം ചെയ്തത് എന്നാണ് രാജ് കുന്ദ്ര പറയുന്നത്.
”അവളില്‍ നിന്നും കുറച്ച് മാറി നിന്നാണ് ഇങ്ങനൊരു സിനിമ ചെയ്യാന്‍ ആഗ്രഹിക്കുന്നുവെന്ന് ഞാന്‍ പറഞ്ഞത്. അവളുടെ അടുത്ത് പോയി നിന്ന് പറയാന്‍ ഞാന്‍ ധൈര്യപ്പെട്ടില്ല. എന്റെ കൈയ്യില്‍ ഒരു തിരക്കഥ ഉണ്ടെന്നും അവളുടെ അഭിപ്രായത്തിനായി കാത്തിരിക്കുകയാണെന്നും ഞാന്‍ അവളോട് പറഞ്ഞു.”
”എന്നാല്‍ അവള്‍ ഒരു ചെരുപ്പെടുത്ത് എന്റെ മുഖത്തേക്ക് എറിഞ്ഞു. എന്റെ ഈ ആശയം കുഴപ്പം പിടിച്ചതാണെന്ന് അവള്‍ക്ക് തോന്നി. ഒരുപക്ഷെ ഇങ്ങനൊരു സിനിമ നടക്കില്ലെന്ന് അവള്‍ക്ക് തോന്നിക്കാണും. സിനിമയെ കുറിച്ച് സംവിധായകന്‍ ഷാനവാസ് അലി പറഞ്ഞപ്പോഴാണ് അവള്‍ക്ക് ബോധ്യപ്പെട്ടത്.”
”സംവിധായകന്‍ സിനിമയെ കുറിച്ച് ചെറിയൊരു വിശദീകരണം നല്‍കി. അവള്‍ ഇതിനെ കുറിച്ച് മനസിലാക്കി. വളരെ മാനുഷികമായ ഒരു കഥയാണെന്ന് അവള്‍ക്ക് തോന്നി. അവള്‍ എന്നെ പിന്തുണച്ചു. ‘നീ അഭിനയിക്കുമോ?’ എന്ന് അവള്‍ എന്നോട് ചോദിച്ചു.”
Read more
”ജയിലില്‍ പോയി കുറച്ച് അഭിനയിക്കേണ്ടി വന്നതിനാല്‍ എനിക്ക് സിനിമയിലും അഭിനയിക്കാന്‍ പറ്റുമെന്ന് അവളോട് പറഞ്ഞു” എന്നാണ് രാജ് കുന്ദ്ര പറയുന്നത്. അതേസമയം, അശ്ലീലച്ചിത്ര നിര്‍മ്മാണക്കേസില്‍ 2021ല്‍ ആണ് രാജ് കുന്ദ്ര ജയിലിലാകുന്നത്. 63 ദിവസത്തിന് ശേഷമാണ് കുന്ദ്രയ്ക്ക് ജാമ്യം ലഭിച്ചത്. ഈ സംഭവമാണ് സിനിമയുടെ പ്രമേയം.
