കാസ്റ്റിംഗ് കൗച്ച് അനുഭവം തുറന്നു പറഞ്ഞ് നടി കൗശികി റാത്തോഡ്. കരിയറിന്റെ തുടക്കകാലത്ത് തന്നോട് വിട്ടുവീഴ്ച ചെയ്യാന് പലരും ആവശ്യപ്പെട്ടിട്ടുണ്ട് എന്നാണ് കൗശികി തുറന്നു പറഞ്ഞിരിക്കുന്നത്. തന്നെ തീര്ത്തും അസ്വസ്ഥയാക്കിയ സംഭവമാണത്. ഓഡിഷന് പൂര്ത്തിയാക്കി, കരാര് ഒപ്പിടുന്നതിന് മുമ്പാണ് തനിക്ക് മുമ്പില് നിബന്ധന വച്ചത് എന്നാണ് കൗശികി പറയുന്നത്.
ഇന്ഡസ്ട്രി വളരെയധികം മാറിയിട്ടുണ്ട്, പക്ഷേ മാറിയിട്ടില്ലാത്ത ഒരു കാര്യം നമ്മള് ചെയ്യുന്ന ജോലിക്ക് പകരമായി വിട്ടുവീഴ്ച ചെയ്യാന് പറയുക എന്നതാണ്. താന് ഓഡിഷനുകളില് പങ്കെടുക്കാന് തുടങ്ങിയ സമയത്ത്, ഒരു തെന്നിന്ത്യന് പ്രോജക്റ്റില് അവസരം ലഭിച്ചപ്പോഴാണ് ആദ്യത്തെ അനുഭവമുണ്ടായത്.
തീര്ത്തും അസ്വസ്ഥമാക്കിയ ഒന്നായിരുന്നു ആ അനുഭവം. ഓഡിഷന് എല്ലാം പൂര്ത്തിയായി, അവര് താനുമായി കരാര് ഒപ്പിടുന്നതിന് മുമ്പ് അവരുടേതായ ചില നിബന്ധനകള് ചേര്ക്കുകയും തന്നോട് വിട്ടുവീഴ്ച ചെയ്യാന് ആവശ്യപ്പെടുകയും ചെയ്തു. മുമ്പ് അത്തരം സംഭവങ്ങളെ കുറിച്ച് കേട്ടു പരിചയം മാത്രമുള്ള ആളായിരുന്നു താന്.
അവര് പറഞ്ഞത് കേട്ട് താന് ഞെട്ടിപ്പോയി. അപ്പോള് തന്നെ അവരുടെ ഓഫര് നിരസിച്ചു, പക്ഷേ അവരുടെ വാക്കുകള് തന്നെ മാനസികമായി ബാധിച്ചു. എന്നാല് തനിക്ക് ഇങ്ങനെ ഒരു അനുഭവമുണ്ടെന്ന് കരുതി എല്ലാവരും മോശക്കാരാണെന്ന് താന് വിശ്വസിക്കുന്നില്ല. നല്ലതും ചീത്തയും തമ്മില് വേര്തിരിച്ചറിയാന് നമ്മള് പഠിക്കേണ്ടതുണ്ട്.
Read more
വിട്ടുവീഴ്ച ചെയ്യല് മാത്രമാണ് ഇന്ഡസ്ട്രിയില് ഉയര്ച്ചയിലേക്ക് എത്താനുള്ള ഒരേയൊരു മാര്ഗ്ഗം എന്നത് തെറ്റായ ധാരണയാണെന്ന് ആളുകള് മനസിലാക്കണം എന്നാണ് കൗശികി പറയുന്നത്. ‘കൃഷ്ണ ചാലി ലണ്ടന്’, ‘ഗുഡിയ ഹമാരാ സഭി പെ ഭാരി’, ‘സ്റ്റോറി 9 മന്ത്സ് കി’ തുടങ്ങിയ മിനിസ്ക്രീന് ഷോകളിലൂടെ ശ്രദ്ധ നേടിയ താരമാണ് കൗശികി.