പ്രശസ്ത മലയാള നടി ഊർമിള ഉണ്ണിയുടെ മകളാണ് നർത്തകിയും നടിയും മോഡലുമായ ഉത്തര ഉണ്ണി. സോഷ്യൽ മീഡിയയിലൂടെ തന്റെ വിശേഷങ്ങൾ എല്ലാം തന്നെ ഉത്തര തന്റെ ആരാധകരോട് പങ്കുവെക്കാറുണ്ട്. ഇപ്പോഴിതാ ‘റോയൽ തൊട്ടിലി’നെ പറ്റിയുള്ള വിശേഷം പങ്കുവെക്കുകയാണ് ഉത്തര ഉണ്ണി.
തന്റെ മകളായ ധീമഹിയെ താരാട്ടുപാടി ഉറക്കുന്ന ചിത്രങ്ങളാണ് ഉത്തര ഇൻസ്റ്റഗ്രാമിൽ പങ്കുവെച്ചിരിക്കുന്നത്. കുട്ടി ഉറങ്ങുന്ന തൊട്ടിൽ പാരമ്പര്യമായി കൈമാറി വന്നതാണെന്നും താനും തന്റെ അമ്മയും മുത്തച്ഛന്മാരും, മുതുമുത്തച്ഛൻ കൊച്ചപ്പൻ തമ്പുരാനും ഉറങ്ങിയിരുന്നത് ഇതേ തൊട്ടിലിൽ ആയിരുന്നെന്നും ഉത്തര പറയുന്നു.
കൂടാതെ രാജഭരണകാലത്ത് രാജകുടുംബത്തിലെ കുഞ്ഞുങ്ങളെ താരാട്ടിയുറക്കിയിരുന്ന തൊട്ടിലാണിതെന്നും ഉത്തര ചിത്രങ്ങൾ പങ്കുവെച്ചുകൊണ്ട് കുറിപ്പിൽ പറയുന്നു. മാത്രമല്ല തടികൊണ്ടുണ്ടാക്കിയ ഈ തൊട്ടിലിൽ ആരൊക്കെയാണ് നീന്തിത്തുടിച്ചതെന്ന ചരിത്രം ഇപ്പോഴും രഹസ്യമാണെന്നും ഉത്തര ഉണ്ണി പറയുന്നു.
“മകൾ ഈ ഐശ്വര്യമുള്ള തൊട്ടിലിനോട് വിടപറയാൻ സമയമായെന്നു തോന്നുന്നു. അവൾ ഇപ്പോൾ കഴിയുന്നത്ര വേഗത്തിൽ ഉരുളാൻ ശ്രമിക്കുകയാണ്. പറക്കാൻ ശ്രമിക്കുന്നതുപോലെ അവളുടെ കൈകളും കാലുകളും തൊട്ടിലിനു പുറത്തേക്ക് ഇടുകയാണ്. ഈ തൊട്ടിൽ ഞങ്ങളുടെ പൂർവികർ തലമുറകളായി കൈമാറി വന്നതാണ്. ഞാൻ, എന്റെ അമ്മ, മുത്തശ്ശി, മുത്തച്ഛൻ അങ്ങനെ ഞങ്ങൾ എല്ലാവരും കിടന്ന തൊട്ടിലാണിത്. എനിക്കറിയാവുന്ന ചരിത്രം ഇത്രമാത്രം.
View this post on Instagram
Read more
തിരുവിതാംകൂർ മഹാരാജാവ് സ്വാതിതിരുനാൾ ജനിച്ചത് എന്റെ മുത്തച്ഛൻ കൊച്ചപ്പൻ തമ്പുരാൻ താമസിക്കുന്ന അതേ കൊട്ടാരത്തിലാണ്, ചങ്ങനാശ്ശേരിയിലെ ലക്ഷ്മിപുരം കൊട്ടാരം. തടി കൊണ്ടുള്ള പുരാതനമായ ഈ തൊട്ടിലിൽ ആരൊക്കെയാണ് നീന്തിത്തുടിച്ചതെന്ന ചരിത്രം ഇപ്പോഴും ഒരു രഹസ്യമായി തുടരുന്നു. എന്നാൽ എന്റെ മകൾ ധീമഹി ഈ തൊട്ടിലിനു പുറത്ത് അവളെ കാത്തിരിക്കുന്ന ലോകത്തേക്ക് പറന്നിറങ്ങാൻ പോവുകയാണ്” എന്നാണ് ഉത്തര ഉണ്ണി ഇൻസ്റ്റഗ്രാമിൽ ചിത്രങ്ങൾ പങ്കുവെച്ചുകൊണ്ട് പറഞ്ഞത്.
