ബേസിൽ ജോസഫ് സംവിധാനം ചെയ്ത ‘കുഞ്ഞിരാമയണം’ എന്ന ചിത്രത്തിലൂടെ തിരക്കഥാകൃത്തായി അരങ്ങേറ്റം കുറിച്ച വ്യക്തിയാണ് ദീപു പ്രദീപ്. വിപിൻ ദാസ് സംവിധാനം ചെയ്ത പൃഥ്വിരാജ്- ബേസിൽ ജോസഫ് ചിത്രം ‘ഗുരുവായൂരമ്പല നടയിൽ’ എന്ന ചിത്രത്തിനും തിരക്കഥ രചിച്ചിരിക്കുന്നത് ദീപു പ്രദീപ് ആണ്.
ഇപ്പോഴിതാ സിനിമയിലൂടെ രാഷ്ട്രീയം പറയാൻ പാടില്ല എന്ന് വിശ്വസിക്കുന്ന വ്യക്തിയാണ് താനെന്ന് പറഞ്ഞിരിക്കുകയാണ് ദീപു പ്രദീപ്. എല്ലാത്തിലുമുപരി സിനിമ ഒരു വിനോദമാണെന്നും പ്രേക്ഷകരോട് രാഷ്ട്രീയം പറഞ്ഞിട്ട് പ്രത്യേകിച്ച് ഒരു കാര്യവുമില്ലെന്നും ദീപു പ്രദീപ് പറയുന്നു.
“ഞാൻ സിനിമയിലൂടെ രാഷ്ട്രീയം പറയാൻ ശ്രമിക്കാത്ത ഒരാളാണ്. എല്ലാത്തിലുമുപരി സിനിമ ഒരു വിനോദമാണ്. അത് കാണാനായി എത്തുന്ന പ്രേക്ഷക‍ർ പലതാണ്. പല പ്രായത്തിലുള്ള, പല കാഴ്ച്ചപ്പാടുകളുള്ളവരാണ് സിനിമ കാണാൻ വരുന്നവർ. അത്തരം പ്രേക്ഷകരോട് രാഷ്ട്രീയം പറഞ്ഞിട്ട് പ്രത്യേകിച്ച് ഒരു കാര്യവുമില്ല. എന്നാൽ തിരക്കഥയെഴുതുമ്പോൾ തിരക്കഥാകൃത്ത് ചിന്തിക്കാത്ത ചില വ്യാഖ്യാനങ്ങളൊക്കെ വരും. എന്തുകൊണ്ട് ഇങ്ങനെയൊരു സംഭഷണം വന്നു, എന്നുള്ള ചോദ്യങ്ങളൊക്കെ ഉയ‍ർന്നേക്കാം.
ഞാൻ എന്ന വ്യക്തി ആരെയെങ്കിലും വേദനിപ്പിക്കുന്നതോ മോശം പരാമ‍ർശം നടത്തുന്നതോ ആയ കാര്യങ്ങൾ ഒരിക്കലും ഒരു സിനിമയിലൂടെ പറയാൻ പാടില്ല. അത് തെറ്റാണ് എന്നാണ് ഞാൻ വിശ്വസിക്കുന്നത്. അതിനുവേണ്ടി ഒരിക്കലും സിനിമ എന്ന മാധ്യമത്തെ ഉപയോഗിക്കാൻ പാടില്ല.
തിരക്കഥയെഴുതുമ്പോൾ പൊളിറ്റിക്കലി കറക്ടാണോ എന്നത് ഞാൻ പ്രത്യേകം ശ്രദ്ധിക്കാറുണ്ട്. അക്കാര്യത്തിൽ മറ്റുള്ളവരുടെ അഭിപ്രായങ്ങളും ഞാൻ സ്വീകരിക്കാറുണ്ട്. അതുകൊണ്ടുതന്നെ ഏട്ടും ഒൻപതും തവണവരെ ഡ്രാഫ്റ്റുകൾ എടുത്ത തിരക്കഥകളുണ്ടായിട്ടുണ്ട്.” എന്നാണ് റിപ്പോർട്ടറിന് നൽകിയ അഭിമുഖത്തിൽ ദീപു പ്രദീപ് പറഞ്ഞത്.
അതേസമയം പേരില്ലൂർ പ്രീമിയർ ലീഗ്, പദ്മിനി, ദി പ്രീസ്റ്റ് എന്നിവയാണ് ദീപു പ്രദീപ് തിരക്കഥയെഴുതിയ മറ്റ് ചിത്രങ്ങൾ.
