മലയാള സിനിമയിലെ യുവതാരങ്ങളും സാങ്കേതിക വിദഗ്‌ധരും പ്രതിഫലം ഉയർത്തിയതോടെ നിർമാതാക്കൾ പ്രതിസന്ധിയിൽ. പ്രതിഫലം താങ്ങാനാകാതെ ചില മുൻനിര താരങ്ങളുടെ ചിത്രങ്ങൾ നിർമാതാക്കൾ ഉപേക്ഷിച്ചിരിക്കുകയാണ്. പ്രൊഡ്യൂസേഴ്‌സ് അസോസിയേഷൻ താരങ്ങൾ പ്രതിഫലം കുറയ്ക്കണമെന്നാവശ്യപ്പെട്ട് അഭിനേതാക്കളുടെ സംഘടനയായ അമ്മയ്ക്ക് കത്തു നൽകി.
നിലവിൽ നാലുകോടിയ്ക്ക് മുകളിലാണ് എല്ലാ മുൻനിര നായകരുടെയും പ്രതിഫലം. ആകെ ചിലവ് അഞ്ച് കോടിയിലധികം വരുന്ന മലയാളത്തിൽലെ ഏറ്റവും പുതിയ ചിത്രത്തിന് ഒരു യുവതാരം ആവശ്യപ്പെട്ടത് അഞ്ചു കോടി രൂപയാണ്.
ഹിറ്റ് സിനിമകളിലെ നായകനായ കൗമാരതാരം ആവശ്യപ്പെടുന്നത് ഒന്നരക്കോടി രൂപയാണ്. ഛായാഗ്രാഹകരിൽ ചിലർ ദിവസവേതനം ആക്കി. പ്രശസ്ത യുവ ഛായാഗ്രാഹകൻ ഒരു ദിവസത്തിന് ആവശ്യപ്പെടുന്നത് സഹായികളുടെ പ്രതിഫലം കൂടാതെ ഒരുലക്ഷം രൂപയാണ്.
പ്രതിഫലത്തിന് പകരം പ്രധാന സംഗീതസംവിധായകർ ഇപ്പോൾ മ്യൂസിക് റൈറ്റ്സ് ആണ് വാങ്ങുന്നത്. മുമ്പ് നിർമാതാവായിരുന്നു മ്യൂസിക് റൈറ്റ്സ് വിറ്റിരുന്നത്. എന്നാൽ ഇപ്പോൾ സംഗീതസംവിധായകർ ഇത് വൻതുകയ്ക്ക് മ്യൂസിക് കമ്പനികൾക്ക് വിൽക്കുകയാണ് ചെയ്യുന്നത്.
