ശസ്ത്രക്രിയ കഴിഞ്ഞതോടെ നടന് അജിത്ത് ആശുപത്രി വിട്ടു. ചെന്നൈയിലെ അപ്പോളോ ആശുപത്രിയില്‍ ആയിരുന്നു അജിത്ത് ചികിത്സ തേടിയത്. പതിവ് ചെക്കപ്പിനിടെ ചെവിയുടെ താഴ്ഭാഗത്ത് നീര്‍ക്കെട്ട് കണ്ടെത്തുകയായിരുന്നു. തുടര്‍ന്നാണ് താരത്തിന് ശസ്ത്രക്രിയ നടത്തിയത്.
ആശുപത്രിയില്‍ പ്രവേശിപ്പിച്ച സമയത്ത് താരത്തിന്റെ ആരോഗ്യവസ്ഥയെ കുറിച്ച് മറ്റ് വിവരങ്ങള്‍ ഒന്നും എത്താത്തതിനാല്‍ പരിഭ്രാന്തരായ ആരാധകര്‍ ആശുപത്രിക്ക് മുന്നില്‍ തടിച്ചു കൂടിയിരുന്നു. പിന്നാലെ നടന് ബ്രെയ്ന്‍ ട്യൂമര്‍ ആണെന്ന് കണ്ടെത്തിയതായി സോഷ്യല്‍ മീഡിയയില്‍ പ്രചാരണങ്ങള്‍ നടന്നിരുന്നു.
എന്നാല്‍ താരത്തിന് ബ്രെയ്ന്‍ ട്യൂമര്‍ അല്ലെന്ന് വ്യക്തമാക്കി താരത്തിന്റെ മാനേജര്‍ രംഗത്തെത്തിയിരുന്നു. ആശുപത്രി വിട്ട താരം ഇനി പുതിയ ചിത്രം ‘വിഡാമുയര്‍ച്ചി’യുടെ ചിത്രീകരണത്തിനായി മാര്‍ച്ചില്‍ തന്നെ അജിത്ത് അസര്‍ബൈജാനിലേക്ക് പോകും എന്നും മാനേജര്‍ സുരേഷ് ചന്ദ്ര അറിയിച്ചു.
വിഡാമുയര്‍ച്ചിയുടെ പ്രധാന താരങ്ങളുടെ രംഗങ്ങളടക്കം ചിത്രീകരിക്കാന്‍ ബാക്കിയുണ്ട്. മഗിഴ് തിരുമേനിയുടെ സംവിധാനത്തില്‍ ഒരുങ്ങുന്ന ആക്ഷന്‍ ചിത്രമാണിത്. ഇനി 15 ദിവസങ്ങള്‍ കൂടി മാത്രമേ ഷൂട്ടിംഗ് ഉള്ളൂ. പ്രധാന ചില രംഗങ്ങളാണ് ഇനി ചിത്രീകരിക്കാനുള്ളത്.
