മോഹന്‍ലാല്‍പൃഥ്വിരാജ് കൂട്ടുകെട്ടില്‍ പുറത്തിറങ്ങിയ സൂപ്പര്‍ഹിറ്റ് ചിത്രം ലൂസിഫറിന് രണ്ടാം ഭാഗം വരുമെന്ന് ഊഹാപോഹങ്ങളുണ്ടായിരുന്നു. സിനിമയുടെ അവസാന ക്യാരക്ടര്‍ പോസ്റ്റര്‍ റിലീസ് ചെയ്തതോടെ ഈ സന്ദേഹങ്ങള്‍ക്ക് ആക്കം കൂടുകയും ചെയ്തു. മോഹന്‍ലാല്‍ അവതരിപ്പിക്കുന്ന ഖുറേഷി അബ്‌റാം എന്ന അധോലോക നായകയെയാണ് പൃഥ്വിരാജ് അവസാന പോസ്റ്ററിലൂടെ അവതരിപ്പിച്ചത്. അവസാനം ആരംഭത്തിന്റെ തുടക്കം എന്ന അടിക്കുറിപ്പും. സിനിമയുടേതായി 30 ക്യാരക്ടര്‍ പോസ്റ്ററുകള്‍ പുറത്തിറങ്ങി അവസാനമാണ് ഇതെത്തിയത്.
പ്രതീക്ഷകള്‍ പാഴാവില്ല എന്ന സൂചന തന്നെയാണ് തുടര്‍ന്നും കിട്ടിക്കൊണ്ടിരിക്കുന്നത്. ഇപ്പോള്‍ ലൂസിഫര്‍ 2 ന്റെ പ്രതീക്ഷയിലേക്ക് വിരല്‍ചൂണ്ടിയിരിക്കുന്നത് ചിത്രത്തിന്റെ തിരക്കഥാകൃത്തും നടനുമായ മുരളി ഗോപിയാണ്. ഫെയ്‌സ്ബുക്കില്‍ “കാത്തിരിപ്പ് അധികം നീളില്ല” എന്ന മുരളി ഗോപിയുടെ പോസ്റ്റ് ആരാധകരെ ആവേശത്തിലാഴ്ത്തിയിരിക്കുകയാണ്. ഖുറേഷി അബ്‌റാമിന്റെ ജീവിതം പറയുന്ന കഥ വരുന്നു എന്നു തന്നെയാണ് ഇതിനെ ആരാധകര്‍ വിലയിരുത്തുന്നത്.
Read more
പൃഥ്വിരാജ് ആദ്യമായി സംവിധാനം ചെയ്ത ചിത്രം 100 കോടിയും പിന്നിട്ട് കുതിക്കുകയാണ്. ആദ്യ 8 ദിവസങ്ങള്‍ കൊണ്ട് 100 കോടി നേടി ചരിത്രം സൃഷ്ടിച്ച ചിത്രം 13 ദിവസം കൂടി കഴിഞ്ഞ് 21ാം ദിവസം എത്തിയപ്പോള്‍ 150 കോടി ഗ്രോസ്സ് കളക്ഷന്‍ നേടിയെന്നും ഔദ്യോഗികമായ റിപ്പോര്‍ട്ടുകള്‍ വന്നിരുന്നു. 100 ലധികം തിയേറ്ററുകളില്‍ ചിത്രം ഇപ്പോഴും പ്രദര്‍ശനം തുടരുന്നതിനാല്‍ കളക്ഷന്‍ 200 കോടി കടന്നേക്കുമെന്നാണ് പ്രതീക്ഷ.
