കങ്കണ റണൗട്ട് ചിത്രം “തലൈവി”യുടെ റിലീസ് നീട്ടി വച്ചു. കോവിഡ് വ്യാപനം വീണ്ടും രൂക്ഷമാകുന്ന സൗഹചര്യത്തിലാണ് ചിത്രത്തിന്റെ റിലീസ് നീട്ടി വച്ചിരിക്കുന്നത്. എ.എല്‍ വിജയ് സംവിധാനം ചെയ്യുന്ന ചിത്രം ഏപ്രില്‍ 23ന് ആണ് റിലീസ് ചെയ്യാനിരുന്നത്. കോവിഡ് വ്യാപനത്തെ തുടര്‍ന്ന് ബോളിവുഡ് ചിത്രങ്ങളുടെ റിലീസ് നീട്ടി വയ്ക്കുകയാണ്. തലൈവി മുമ്പ് പ്രഖ്യാപിച്ചിരുന്നതു പോലെ തന്നെ ഏപ്രില്‍ 23ന് എത്തും എന്നായിരുന്നു ആദ്യമെത്തിയ റിപ്പോര്‍ട്ടുകള്‍.
എന്നാല്‍ തുടര്‍ന്ന് റിലീസ് മാറ്റുകയാണെന്ന് അണിയറപ്രവര്‍ത്തകര്‍ അറിയിച്ചു. ബഹുഭാഷാ ചിത്രമായ എത്തുന്ന തലൈവി എല്ലായിടത്തും ഒരേ ദിവസം തന്നെ റിലീസ് ചെയ്യണമെന്ന് ആഗ്രഹിക്കുന്നു. അതിനാല്‍ കൊവിഡ് വര്‍ധിക്കുന്ന ഈ സാഹചര്യത്തില്‍ ഏപ്രില്‍ 23ന് നിശ്ചയിച്ചിരുന്ന ചിത്രത്തിന്റെ റിലീസ് മാറ്റി വയ്ക്കുകയാണ് എന്ന് അണിയറപ്രവര്‍ത്തകര്‍ അറിയിച്ചു.
റിലീസ് മാറ്റുന്ന ഈ സാഹചര്യത്തിലും നിങ്ങള്‍ നല്‍കുന്ന പിന്തുണ തുടരുമെന്ന് പ്രതീക്ഷിക്കുന്നതായും അണിയറപ്രവര്‍ത്തകര്‍ അറിയിച്ചു. തലൈവിയുടെതായി പുറത്തിറങ്ങിയ ടീസറും ട്രെയ്‌ലറും ചിത്രങ്ങളുമെല്ലാം ഏറെ ശ്രദ്ധ നേടിയിരുന്നു. നേരത്തെ തലൈവി റിലീസു ചെയ്തു കൊണ്ട് താന്‍ ബോളിവുഡിനെ രക്ഷിക്കാന്‍ ഒരുങ്ങുകയാണെന്ന കങ്കണയുടെ ട്വീറ്റ് സോഷ്യല്‍ മീഡിയയില്‍ ചര്‍ച്ചയായിരുന്നു.
അരവിന്ദ് സാമിയാണ് ചിത്രത്തില്‍ എംജിആര്‍ ആയി വേഷമിടുന്നത്. ബാഹുബലി, മണികര്‍ണിക, ഭജരംഗി ഭായിജാന്‍ എന്നിവയ്ക്ക് തിരക്കഥയൊരുക്കിയ കെ വി വിജയേന്ദ്ര പ്രസാദ് ആണ് ചിത്രത്തിന് തിരക്കഥ ഒരുക്കുന്നത്. നീരവ് ഷാ ഛായാഗ്രഹണവും ജി വി പ്രകാശ് സംഗീതവും നിര്‍വഹിക്കും. മദന്‍ കര്‍കിയാണ് ഗാനങ്ങള്‍ ഒരുക്കുന്നത്.
