ട്രാഫിക് നിയമം ലംഘിച്ചതിന്റെ പേരില്‍ നടന് വിജയ്ക്ക് പിഴ. ടിന്റഡ് ഫിലിം ഒട്ടിച്ച വാഹനം ഉപയോഗിച്ചതിനാണ് പിഴ. 500 രൂപയാണ് നടന് ട്രാഫിക് പൊലീസ് ചുമത്തിയ പിഴ. കഴിഞ്ഞ ദിവസം പനയൂരില്‍ ആരാധകരെ കാണാനായി വിജയ് എത്തിയിരുന്നു.
ആരാധകരെ കാണാന്‍ താരം എത്തിയതിന്റെ വീഡിയോകളും ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു. ഇതിന് പിന്നാലെയാണ് നടന്റെ ട്രാഫിക് നിയമ ലംഘനം പൊലീസിന്റെ ശ്രദ്ധയില്‍പ്പെട്ടത്. ചെന്നൈ ട്രാഫിക് പൊലീസ് നടനെതിരെ പിഴ ചുമത്തുക ആയിരുന്നു.
അതേസമയം, ‘വാരിസ്’ ആണ് വിജയ്‌യുടെതായി റിലീസിന് ഒരുങ്ങുന്നത്. അടുത്ത വര്‍ഷം രശ്മിക മന്ദാനയാണ് ചിത്രത്തില്‍ നായിക. ശരത് കുമാര്‍, പ്രകാശ് രാജ്, ശ്യാം, യോഗി ബാബു, പ്രഭു, ജയസുധ, ശ്രീകാന്ത്, ഖുശ്ബു, സംഗീത കൃഷ്ണ തുടങ്ങിയവരും അഭിനയിക്കുന്നു.
വിജയ്‌യുടെ കരിയറിലെ 66-ാം സിനിമയാണിത്. ദേശീയ അവാര്‍ഡ് ജേതാവായ വംശിപൈഡിപ്പള്ളി ആണ് ചിത്രം സംവിധാനം ചെയ്യുന്നത്. ശ്രീ വെങ്കടേശ്വര ക്രിയേഷന്‍സിന്റെ ബാനറില്‍ ദില്‍ രാജുവും ശിരീഷും ചേര്‍ന്നാണ് ചിത്രം നിര്‍മ്മിക്കുന്നത്. സംക്രാന്തി റിലീസ് ആയി ചിത്രം തിയേറ്ററുകളിലെത്തും.
Read more
അജിത്തിന്റെ ‘തുനിവ്’ ചിത്രത്തോടാണ് വാരിസ് മത്സരിക്കാന്‍ ഒരുങ്ങുന്നത്. എട്ട് വര്‍ഷങ്ങള്‍ക്ക് ശേഷമാണ് അജിത്ത് ചിത്രവും വിജയ് ചിത്രവും ക്ലാഷ് റിലീസ് ആയി തിയേറ്ററില്‍ എത്താന്‍ പോകുന്നത്. നേരത്തെ 2014ല്‍ ജനുവരി 10 വിജയ് ചിത്രം ‘ജില്ല’യും അജിത്തിന്റെ ‘വീരം’ എന്ന ചിത്രവുമാണ് ക്ലാഷ് റിലീസ് ആയി എത്തിയത്.
