ഹോളിവുഡ് താരം ബെര്‍ണാഡ് ഹില്‍ അന്തരിച്ചു. 79 വയസ് ആയിരുന്നു. ഞായാറാഴ്ച രാവിലെയാണ് നടന്റെ മരണം സംഭവിച്ചത് എന്ന് ഇദ്ദേഹത്തിന്റെ ഏജന്റ് ലൂ കോള്‍സണ്‍ അറിയിച്ചു. ‘ടൈറ്റാനിക്’ ചിത്രത്തിലെ ക്യാപ്റ്റന്റെ വേഷം ചെയ്ത് ഏറെ ശ്രദ്ധ നേടിയ താരമാണ് ബെര്‍ണാഡ് ഹില്‍.
ദ ലോര്‍ഡ് ഓഫ് റിംഗ്‌സ് പോലുള്ള ചിത്രങ്ങളിലൂടെയും പ്രശസ്തനാണ് ഇദ്ദേഹം. ദ റെസ്‌പോണ്ടര്‍ എന്ന ടിവി പരമ്പരിലാണ് അവസാനം അഭിനയിച്ചത്. ഈ പരമ്പര ഞായറാഴ്ച പ്രദര്‍ശനം തുടങ്ങിയ അവസരത്തിലാണ് ബെര്‍ണാര്‍ഡ് ഹില്ലിന്റെ അപ്രതീക്ഷിത വിയോഗം.
5 പതിറ്റാണ്ട് നീണ്ടുനിന്ന അഭിനയ ജീവിതമായിരുന്നു ഹില്ലിന്റെത്. 11 ഓസ്‌കര്‍ പുരസ്‌കാരങ്ങള്‍ നേടിയ രണ്ടു ചിത്രങ്ങളില്‍ അഭിനയിച്ച ഒരേയൊരു താരവും ബെര്‍ണാഡ് ഹില്‍ ആയിരുന്നു. ടൈറ്റാനിക്കും ലോര്‍ഡ് ഓഫ് ദ റിംഗ്‌സുമാണ് ആ ചിത്രങ്ങള്‍.
1944 ല്‍ മാഞ്ചസ്റ്ററില്‍ ജനിച്ച ബെര്‍ണാര്‍ഡ് ഹില്‍ ‘ഇറ്റ് കുഡ് ഹാപ്പെന്‍ റ്റു യു’ എന്ന ചിത്രത്തിലൂടെയാണ് അഭിനയരംഗത്തേയ്ക്ക് എത്തിയത്. സിനിമ കൂടാതെ നാടകങ്ങളിലും ടിവി ഷോകളിലും അദ്ദേഹം അഭിനയിച്ചിട്ടുണ്ട്.