കൊല്ലത്ത് മാധ്യമപ്രവര്‍ത്തകരെ ആക്രമിക്കുകയും കൊലവിളി മുഴക്കുകയും ചെയ്ത പ്രതി പിടിയില്‍. കൊല്ലം പുളിക്കട കോളനി സ്വദേശി ജോണിയെയാണ് പൊലീസ് അറസ്റ്റ് ചെയ്തത്. സംഭവത്തിന് പിന്നാലെ കൊല്ലം ഈസ്റ്റ് പൊലീസ് ആണ് പ്രതിയെ അറസ്റ്റ് ചെയ്തത്. ഇയാള്‍ക്കെതിരെ പൊലീസ് വിവിധ വകുപ്പുകള്‍ പ്രകാരം കേസെടുത്തിട്ടുണ്ട്.
ഐപിസി 294 ബി, 341, 477,506 എന്നീ വകുപ്പുകള്‍ ചുമത്തിയാണ് പൊലീസ് പ്രതിയ്‌ക്കെതിരെ കേസെടുത്തിട്ടുള്ളത്. ഇന്നലെ വൈകുന്നേരമാണ് കേസിന് ആസ്പദമായ സംഭവം. കൊല്ലം ചിന്നക്കടയ്ക്ക് സമീപമുള്ള 24 ഓഫീസിന് സമീപം ലൈവ് റിപ്പോര്‍ട്ടിംഗിനിടെയാണ് റിപ്പോര്‍ട്ടര്‍ അരുണ്‍ രാജിനും സംഘത്തിനും നേരെ ആക്രമണമുണ്ടായത്.
അസഭ്യം പുലമ്പി അടുത്തെത്തിയ പുളിക്കട കോളനി സ്വദേശി ജോണി ഭീഷണി മുഴക്കുകയും ആക്രമിക്കാന്‍ തുനിയുകയുമായിരുന്നു. കത്തിയും ബിയര്‍ കുപ്പിയും വീശിയാണ് ഇയാള്‍ മാധ്യമപ്രവര്‍ത്തകരെ ആക്രമിക്കാന്‍ ശ്രമിച്ചത്. പിന്നാലെ 24 ഓഫീസിലും അതിക്രമിച്ച് കയറി ഇയാള്‍ ഭീഷണി മുഴക്കി. ഒടുവില്‍ ഈസ്റ്റ് പൊലീസ് സ്ഥലത്തെത്തി പ്രതിയെ കീഴ്‌പ്പെടുത്തുകയായിരുന്നു.
Read more
സംഭവത്തില്‍ പത്രപ്രവര്‍ത്തക യൂണിയന്‍ കൊല്ലം ജില്ലാ കമ്മിറ്റി പ്രതിഷേധിച്ചു. സ്വതന്ത്ര മാധ്യമപ്രവര്‍ത്തനത്തിന് തടസമുണ്ടാക്കുന്ന സാമൂഹ്യ വിരുദ്ധര്‍ക്കെതിരെ നടപടി എടുക്കണമെന്ന് പത്രപ്രവര്‍ത്തക യൂണിയന്‍ ജില്ലാ കമ്മിറ്റി ആവശ്യപ്പെട്ടു.
