എല്ലാക്കാലത്തും ബിജെപിയുമായി ഒത്തുകളിക്കാന്‍ കോണ്‍ഗ്രസിന് ഒരുകാലത്തും പ്രയാസമുണ്ടായിട്ടില്ലെന്ന് മുഖ്യമന്ത്രി പിണറായി വിജയന്‍. അതിന്റെ ഒരുപാട് അനുഭവങ്ങള്‍ ഉള്ള ജില്ലയാണ് പാലക്കാടെന്നും അദ്ദേഹം പറഞ്ഞു.
കോണ്‍ഗ്രസും ബിജെപിയും തമ്മിലുള്ള ‘ഡീലിന്’ 1960 മുതല്‍ പാലക്കാട് സാക്ഷ്യംവഹിച്ചിട്ടുണ്ട്. 1960ല്‍ പട്ടാമ്പിയില്‍ ഇ എം എസ് മത്സരിച്ചപ്പോള്‍ ജനസംഘം സ്ഥാനാര്‍ഥിയെ പിന്‍വലിച്ച് കോണ്‍ഗ്രസിന് പിന്തുണ നല്‍കി. ജനസംഘം നേതാവ് ദീന്‍ദയാല്‍ ഉപാധ്യായ നേരിട്ടുവന്ന് ഇ എം എസിനെതിരെ പ്രചാരണം നടത്തി.
1971ല്‍ എ കെ ജി പാലക്കാട് പാര്‍ലമെന്റ് മണ്ഡലത്തില്‍ മത്സരിച്ചപ്പോള്‍ കോണ്‍ഗ്രസും ബിജെപിയും തമ്മില്‍ അന്തര്‍ധാരയുണ്ടാക്കി. പക്ഷേ, രണ്ട് തെരഞ്ഞെടുപ്പുകളിലും അവര്‍ക്ക് വിജയിക്കാനായില്ല. 2016ല്‍ നേമത്തും 2024ല്‍ തൃശൂര്‍ പാര്‍ലമെന്റ് തെരഞ്ഞെടുപ്പിലും കോണ്‍ഗ്രസ് വോട്ടുകള്‍ ബിജെപിക്ക് നല്‍കി. നേമത്തെ ബിജെപി അക്കൗണ്ട് പൂട്ടിച്ചത് എല്‍ഡിഎഫാണെന്നും മുഖ്യമന്ത്രി പറഞ്ഞു.
കോണ്‍ഗ്രസും ബിജെപിയുമായുള്ള ആത്മബന്ധം നാടിനുവേണ്ടിയല്ല. അവരുടെ നിക്ഷിപ്ത താല്‍പ്പര്യത്തിനുവേണ്ടിയുള്ളതാണ്. 2016നുശേഷം കോണ്‍ഗ്രസും ബിജെപിയും ഒരേ മനസ്സോടെയാണ് പ്രവര്‍ത്തിക്കുന്നതെന്നും മുഖ്യമന്ത്രി പറഞ്ഞു.
