വിവാഹങ്ങളോട് അനുബന്ധിച്ച് നടക്കുന്ന സാമൂഹ്യ വിരുദ്ധ പ്രവര്‍ത്തനങ്ങള്‍ കര്‍ശനമായി നടപടിയെടുക്കണമെന്ന് സംസ്ഥാന മനുഷ്യാവകാശ കമ്മീഷന്‍. കണ്ണൂര്‍ മോഡല്‍ അതിക്രമങ്ങള്‍ ആവര്‍ത്തിക്കാതിരിക്കാനും സാമൂഹ്യ വിരുദ്ധ പ്രവര്‍ത്തനങ്ങള്‍ തടയാനും ഒരു പ്രവര്‍ത്തന പദ്ധതിക്ക് അടിയന്തിരമായി രൂപം നല്‍കാന്‍ സംസ്ഥാന പൊലീസ് മേധാവി നടപടിയെടുക്കണമെന്ന് സംസ്ഥാന മനുഷ്യാവകാശ കമ്മീഷന്‍ ആവശ്യപ്പെട്ടു.
നടപടികള്‍ സ്വീകരിച്ച ശേഷം സംസ്ഥാന പൊലീസ് മേധാവി നാലാഴ്ചക്കകം റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ജുഡീഷ്യല്‍ അംഗം കെ. ബൈജു നാഥ് ആവശ്യപ്പെട്ടു. തോട്ടടയില്‍ വിവാഹ വീടിന് സമീപം ബോംബ് പൊട്ടി ഏച്ചൂര്‍ സ്വദേശി ജിഷ്ണു കൊല്ലപ്പെട്ട പശ്ചാത്തലത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.
വിവാഹത്തോട് അനുബന്ധിച്ച് നടക്കുന്ന സംഘര്‍ഷങ്ങള്‍ സ്ഥിരം സംഭവമായി മാറിയിരിക്കുകയാണെന്ന് കമ്മീഷന്‍ ഇടക്കാല ഉത്തരവില്‍ പറഞ്ഞു. ഇത്തരം മൃഗീയ വിനോദങ്ങള്‍ ജീവന്‍ കവര്‍ന്നെടുക്കുന്ന അവസ്ഥയില്‍ വരെ എത്തിയത് അത്യന്തം ദൗര്‍ഭാഗ്യകരമാണ്.
Read more
സാമുദായിക സൗഹാര്‍ദ്ദം തകര്‍ത്ത്, സമാധാനത്തോടെ ജീവിക്കാനുള്ള അവകാശം ഇല്ലാതാക്കുന്ന തരത്തിലേക്ക് ഇത്തരം പ്രവണതകള്‍ വളര്‍ന്ന പശ്ചാത്തലത്തില്‍ അതിശക്തമായ നടപടികള്‍ അനിവാര്യമായി മാറിയിരിക്കുകയാണെന്ന് കെ ബൈജു നാഥ് ഉത്തരവില്‍ പറഞ്ഞു.
