കൊല്ലം മൈനാഗപ്പള്ളിയിൽ കാറിടിച്ച് സ്കൂട്ടർ യാത്രിക കൊല്ലപ്പെട്ട സംഭവത്തിൽ കൂടുതൽ ദൃശ്യങ്ങൾ പുറത്ത്. കേസിലെ പ്രതിയായ അജ്മൽ അമിത വേഗത്തിൽ കാറോടിച്ചു പോകുന്ന ദൃശ്യങ്ങളാണ് പുറത്ത് വന്നിരിക്കുന്നത്. നാട്ടുകാർ പിന്തുടർന്നപ്പോൾ പകർത്തിയ ദൃശ്യങ്ങളാണിവ.
എതിരെ വന്ന മറ്റൊരു കാറിലും അജ്മൽ ഓടിച്ച കാർ ഇടിച്ചിരുന്നു. ഇതും ദൃശ്യങ്ങളിൽ വ്യക്തമാണ്. ഇന്നലെ വൈകിട്ട് മൈനാഗപ്പള്ളി ആനൂർക്കാവിലാണ് അപകടമുണ്ടാകുന്നത്. സ്കൂട്ടർ യാത്രികരായ കുഞ്ഞുമോൾ എന്ന സ്ത്രീ മരിക്കുകയും സഹയാത്രികയായ ഫൗസിയക്ക് പരിക്കേൽക്കുകയും ചെയ്തിരുന്നു.
അതേസമയം അപകടത്തിൽ കാറിലുണ്ടായിരുന്ന കരുനാഗപ്പളളി സ്വദേശി അജ്മലിനെയും നെയ്യാറ്റിൻകര സ്വദേശി ഡോക്ടർ ശ്രീക്കുട്ടിയെയും പൊലീസ് നരഹത്യക്കുറ്റം ചുമത്തി അറസ്റ്റ് ചെയ്തു. അമിത വേഗതയിലെത്തിയ കാർ ഇടിച്ചു തെറിപ്പിക്കുകയായിരുന്ന് എന്ന് സ്കൂട്ടർ ഓടിച്ചിരുന്ന ഫൗസിയ വെളിപ്പടുത്തിയിരുന്നു. റോഡിലേക്ക് വീണ കുഞ്ഞുമോൾ എഴുന്നേൽക്കാൻ ശ്രമിച്ചെങ്കിലും കാർ മുന്നോട്ടെടുത്തതിനാൽ ശരീരത്തിലൂടെ കയറിയിറങ്ങുകയായിരുന്നു.
