കൊച്ചിയില്‍ ദുരൂഹ സാഹചര്യത്തില്‍ കൊല്ലപ്പെട്ട നിലയില്‍ കണ്ടെത്തിയ മിഷേല്‍ ഷാജി കേസില്‍ സിബിഐ അന്വേഷണം ഇല്ല. 2017ല്‍ ആയിരുന്നു മിഷേലിന്റെ മൃതദേഹം കൊല്ലപ്പെട്ട നിലയില്‍ കൊച്ചി കായലില്‍ നിന്ന് കണ്ടെത്തിയത്. എന്നാല്‍ കേസില്‍ സിബിഐ അന്വേഷണം വേണമെന്ന ആവശ്യം ഹൈക്കോടതി തള്ളുകയായിരുന്നു.
നിലവിലെ അന്വേഷണം എത്രയും വേഗം പൂര്‍ത്തിയാക്കണമെന്നും കോടതി അറിയിച്ചു. 2017 മാര്‍ച്ച് 5ന് ആയിരുന്നു പിറവം മുളക്കുളം സ്വദേശി മിഷേലിന്റെ മൃതദേഹം കൊച്ചി കായലില്‍ കണ്ടെത്തിയത്. കാണാതായ ദിവസം വൈകുന്നേരം 5ന് കലൂര്‍ സെന്റ് ആന്റണീസ് പള്ളിയിലെത്തി മടങ്ങുന്ന മിഷേലിന്റെ ദൃശ്യങ്ങളാണ് ഒടുവില്‍ പൊലീസിന് ലഭിച്ചത്.
അടുത്ത ദിവസം വൈകുന്നേരത്തോടെ കൊച്ചി കായലില്‍ ഐലന്റ് വാര്‍ഫിന് സമീപം മിഷേലിന്റെ മൃതദേഹം കണ്ടെത്തുകയായിരുന്നു. മിഷേല്‍ കൊല്ലപ്പെട്ടതാണെന്നാണ് മാതാപിതാക്കളുടെ ആരോപണം. ഇതേ തുടര്‍ന്നായിരുന്നു ഹൈക്കോടതിയില്‍ സിബിഐ അന്വേഷണം ആവശ്യപ്പെട്ട് മാതാപിതാക്കള്‍ ഹര്‍ജി നല്‍കിയതും.
Read more
കേസ് ആദ്യം ലോക്കല്‍ പൊലീസ് അന്വേഷിച്ചെങ്കിലും കേസില്‍ പുരോഗതി ഉണ്ടാകാതിരുന്നതിനാല്‍ ക്രൈംബ്രാഞ്ച് കേസ് ഏറ്റെടുക്കുകയായിരുന്നു. എന്നാല്‍ ക്രൈംബ്രാഞ്ച് ഇതുവരെ അന്വേഷണം പൂര്‍ത്തിയാക്കി കേസില്‍ റിപ്പോര്‍ട്ട് സമര്‍പ്പിച്ചിട്ടില്ല. ഇതേ തുടര്‍ന്നായിരുന്നു മിഷേലിന്റെ മാതാപിതാക്കള്‍ സിബിഐ അന്വേഷണം വേണമെന്ന ആവശ്യവുമായി കോടതിയെ സമീപിച്ചത്.
