പത്തനംതിട്ട ഏനാത്ത് മകളെ കടന്നുപിടിച്ച 59-കാരൻ്റെ മൂക്കിടിച്ച് തകർത്ത് അമ്മ. തന്റെ മകളെ ഉപദ്രവിക്കാൻ ശ്രമിച്ച രാധാകൃഷ്‌ണൻ എന്നയാളുടെ മൂക്കാണ് അമ്മ തകർത്തത്. മകളുടെയും തന്റെയും സ്വയരക്ഷയെ കരുതിയാണ് മർദിച്ചതെന്ന് അമ്മ പറഞ്ഞു. അതേസമയം സംഭവത്തിൽ അമ്മയ്‌ക്കെതിരെയും പൊലീസ് കേസ് എടുത്തു.
അടൂരിൽ പഠിക്കുന്ന പ്ലസ് ടു വിദ്യാർത്ഥിനിയെയാണ് 59-കാരനായ രാധാകൃഷ്‌ണൻ കടന്ന് പിടിക്കാൻ ശ്രമിച്ചത്. മദ്യലഹരിയിലായിരുന്ന ഇയാൾ ബസിൽ യാത്ര ചെയ്യുകയായിരുന്ന പെൺകുട്ടിയെ മോശമായി സ്പ‌ർശിച്ചു. തുടർന്ന് കുട്ടിയെ പിന്തുടർന്ന് ശല്യം ചെയ്യുകയായിരുന്നു. വിവരമറിഞ്ഞെത്തിയ കുട്ടിയുടെ മാതാവ് ഇയാളെ ചോദ്യം ചെയ്യുകയും മൂക്കിടിച്ച് തകർക്കുകയുമായിരുന്നു.
തുടർന്ന് സ്ഥലത്തെത്തിയ പോലീസ് രാധാകൃഷ്ണനെ കസ്റ്റഡിയിലെടുത്തു. ഇയാൾക്കെതിരേ പോക്സോ വകുപ്പുകൾ ചുമത്തിയാണ് കേസെടുത്തിരിക്കുന്നത്. അതേസമയം അമ്മയുടെ പേരിലും പൊലീസ് കേസ് എടുത്തിട്ടുണ്ട്. വൈദ്യപരിശോധനയിൽ ഇയാളുടെ മൂക്കിൻ്റെ പാലത്തിനുണ്ടായ പൊട്ടൽ അക്രമത്തിലുണ്ടായതാണെന്ന നിഗമനത്തിലാണ് ഐപിസി 325-ാം വകുപ്പ് ചുമത്തി അമ്മയുടെ പേരിൽ കേസെടുത്തത്.
