ശ്രീജിവിന്റെ കസ്റ്റഡി മരണത്തിന് കാരണക്കാരായ പൊലീസ് ഉദ്യോഗസ്ഥര്‍ക്കെതിരെ എത്രയും പെട്ടെന്ന് നടപടിയെടുത്തില്ലെങ്കില്‍ കൊല്ലം പൊലീസ് കമ്മീഷണര്‍ ഓഫീസിനുമുന്നില്‍ സത്യാഗ്രഹമിരിക്കുമെന്ന് പിസി ജോര്‍ജ്ജ് എംഎല്‍എ. ശ്രീജിവിന്റെ കൊലപാതകത്തിന് ഉത്തരവാദിയെന്ന് പൊലീസ് കംപ്ലയിന്റ് അതോറിറ്റി കണ്ടെത്തിയ അന്നത്തെ പാറശ്ശാല സര്‍ക്കിള്‍ ഇന്‍സ്‌പെക്ടറും ഇന്ന് ചവറ സര്‍ക്കിള്‍ ഇന്‍സ്‌പെക്ടറുമായ ഗോപകുമാറിനെ ക്രമസമാധാന ചുമതലയില്‍ നിന്ന് പിന്‍വലിക്കണമെന്നും പിസി ജോര്‍ജ്ജ് ആവശ്യപ്പെട്ടു.
ഒരു കൊലപാതകക്കേസിലെ പ്രധാനപ്രതിയെന്ന് ആരോപിക്കുന്നയാള്‍ കേസന്വേഷണ ചുമതലകളില്‍ തുടരുന്നത് അംഗീകരിക്കാനാകില്ലെന്നും അദ്ദേഹം വ്യക്തമാക്കി.ആദ്യമായാണ് ഒരു എംഎല്‍എ ശ്രീജിവിന്റെ കൊലപാതകത്തില്‍ കുറ്റാരോപിതരായ പൊലീസുകാര്‍ക്കെതിരെ നടപടി വേണമെന്ന് ആവശ്യവുമായി രംഗത്തുവരുന്നത്.
Read more
ശ്രിജവിന്റെ കൊലപാതകത്തില്‍ അന്വേഷണം ആവശ്യപ്പെട്ട് കഴിഞ്ഞ രണ്ടുവര്‍ഷത്തിലേറെയായി ശ്രീജിത്ത് സെക്രട്ടേറിയറ്റിന് മുന്നില്‍ സമരം നയിക്കുകയായിരുന്നു.സോഷ്യല്‍ മീഡിയ യുവത്വം പ്രക്ഷോഭം നടത്തിയതിനെ തുടര്‍ന്ന് സര്‍ക്കാര്‍ സംഭവത്തില്‍ വീണ്ടും ഇടപെട്ടിരുന്നു. തുടര്‍ന്ന് ശ്രീജിവിന്റെ മരണം സിബിഐ അന്വേഷിക്കുമെന്നും സര്‍ക്കാര്‍ അറിയിച്ചിരുന്നു.
