സംസ്ഥാന സര്‍ക്കാരിന്റെ കേരളീയം പരിപാടിക്കെതിരെ രാപ്പകല്‍ സമരം പ്രഖ്യാപിച്ച് ആര്‍എസ്പി. 31ന് വൈകുന്നേരം 4മുതല്‍ പിറ്റേന്ന് 12 മണി വരെയാണ് ആര്‍എസ്പി സെക്രട്ടേറിയറ്റിന് മുന്നില്‍ രാപ്പകല്‍ സമരം നടത്തുന്നത്. അതേ സമയം സംസ്ഥാന സര്‍ക്കാരിനെതിരായ പ്രതിപക്ഷ പ്രതിഷേധങ്ങളില്‍ ആര്‍എസ്പി സംസ്ഥാന സെക്രട്ടറി ഷിബു ബേബി ജോണ്‍ വിയോജിപ്പ് വ്യക്തമാക്കി കൊണ്ടാണ് സ്വന്തം നിലയക്കുള്ള സമര പരിപാടിയെ കുറിച്ച് അറിയിച്ചത്.
പിണറായിയുടെ ഭരണത്തില്‍ ജനം മടുത്തിരിക്കുകയാണ്. യുഡിഎഫ് ഇത് ഗൗരവമായി ഏറ്റെടുക്കണം. മുഖ്യമന്ത്രി അഴിമതിയ്ക്ക് പുതിയ വഴി വെട്ടി തുറന്നിരിക്കുകയാണ്. കേരളീയര്‍ മണ്ടന്മാരാണെന്ന ധാരണയാണ് മുഖ്യമന്ത്രിയ്‌ക്കെന്നും ഷിബു ബേബി ജോണ്‍ പറഞ്ഞു. സര്‍ക്കാരിനെതിരെ നിരവധി ആരോപണങ്ങള്‍ ഉയര്‍ന്നുവന്നിട്ടും വേണ്ട വിധത്തില്‍ അവയില്‍ പ്രതികരിക്കാന്‍ യുഡിഎഫ് തയ്യാറായില്ലെന്ന വിമര്‍ശനമാണ് ആര്‍എസ്പിയുടെ നിലപാടിലൂടെ വ്യക്തമാക്കുന്നത്.
Read more
ജനങ്ങള്‍ പിണറായി സര്‍ക്കാരിനെക്കൊണ്ട് വലഞ്ഞിരിക്കുകയാണെന്നും ജനകീയ വിഷയങ്ങളില്‍ ജനങ്ങള്‍ക്ക് വേണ്ടി മുന്‍പന്തിയില്‍ നിന്ന് യുഡിഎഫ് പോരാടണമെന്നും ആര്‍എസ്പി ആവശ്യപ്പെട്ടു. യുഡിഎഫിന്റെ ഒരു ഘടകകക്ഷി പരസ്യമായി പ്രതിപക്ഷത്തിന്റെ പ്രവര്‍ത്തനം മെച്ചപ്പെടുത്തണമെന്ന് ആവശ്യപ്പെടുന്നത് കോണ്‍ഗ്രസിനുള്ള മുന്നറിയിപ്പ് കൂടിയാണ്.
