പ്രതിപക്ഷനേതാവ് വിഡി സതീശന് എതിരെ വിമര്‍ശനവുമായി കോട്ടയം ഡിസിസി പ്രസിഡന്റ് നാട്ടകം സുരേഷ്. വിഡി സതീശന് കോട്ടയത്ത് വരുന്നതും പോകുന്നതും അറിയിക്കാറില്ല. ജില്ലയില്‍ നടക്കുന്ന പരിപാടികളില്‍ പങ്കെടുക്കാന്‍ എത്തുമ്പോള്‍ മുന്‍ പ്രതിപക്ഷ നേതാക്കള്‍ അതത് ഡിസിസികളെ അറിയിക്കാറുണ്ടെന്നും അദ്ദേഹം പറഞ്ഞു. സില്‍വര്‍ലൈന്‍ വിരുദ്ധ പ്രതിഷേധത്തിന്റെ ഭാഗമായി കഴിഞ്ഞ ദിവസം സംഘടിപ്പിച്ച പരിപാടിയില്‍ പങ്കെടുക്കാതിരുന്നതിനെ കുറിച്ച് പ്രതികരിക്കുകയായിരുന്നു സുരേഷ്.
പ്രതിഷേധത്തിന്റ ബാനറില്‍ തന്റെ ചിത്രം ഇല്ലാതിരിക്കുകയും വേണ്ടത്ര പരിഗണന ലഭിക്കാതിരിക്കുകയും ചെയ്തതിനെ തുടര്‍ന്നാണ് സുരേഷ് പരിപാടിയില്‍ പങ്കെടുക്കാതിരുന്നത് എന്ന് ആക്ഷേപങ്ങള്‍ ഉയര്‍ന്നതിനെ തുടര്‍ന്നാണ് അദ്ദേഹത്തിന്റെ പ്രതികരണം.
Read more
യു.ഡി.എഫ് യോഗത്തില്‍ പങ്കെടുക്കാതിരുന്നതിന് രാഷ്ട്രീയ കാരണങ്ങളുണ്ട്. അത് പാര്‍ട്ടി വേദിയില്‍ പറയും. ഫ്‌ളക്‌സില്‍ പടം വന്നാല്‍ കുളിരുകോരുന്ന ആളല്ല താന്‍. ഡിസിസി പ്രസിഡന്റ് എന്ന പദവിയുടെ മഹത്വം ഉയര്‍ത്തിപ്പിടിക്കുകയാണ് ലക്ഷ്യമെന്നും നാട്ടകം സുരേഷ് പറഞ്ഞു. നിലവില്‍ പരാതി നല്‍കേണ്ടതായ പ്രശ്‌നങ്ങളൊന്നുമില്ലെന്നും അദ്ദേഹം വ്യക്തമാക്കി.
