കൊച്ചിയില്‍ വീണ്ടും ട്രാന്‍സ്‌ജെന്‍ഡര്‍ ആത്മഹത്യ. കൊല്ലം സ്വദേശിനിയായ ശ്രദ്ധയെയാണ് എറണാകുളം പോണേക്കരയിലെ വീട്ടില്‍ ആത്മഹത്യ ചെയ്ത നിലയില്‍ കണ്ടെത്തിയത്. ഇന്‍ക്വസ്റ്റ് നടപടികള്‍ക്ക് ശേഷം ബന്ധുക്കള്‍ക്ക് മൃതദേഹം വിട്ടുകൊടുക്കും.
മൂന്നു ട്രാന്‍സ്‌ജെന്‍ഡേഴ്‌സാണ് പോണേക്കരയില്‍ വീട്ടില്‍ താമസിക്കുന്നത്. കഴിഞ്ഞ ദിവസം രാത്രി എട്ടു മണിയോടെ സുഹൃത്തുക്കള്‍ പുറത്തു പോകുകയായിരുന്നു. തിരിച്ചെത്തിയപ്പോള്‍ വാതിലുകള്‍ അടച്ച നിലയില്‍ കാണുകയും, പിന്നീട് ജനല്‍ തുറന്നു നോക്കിയപ്പോഴാണ് ആത്മഹത്യ ചെയ്ത നിലയില്‍ കണ്ടെത്തുകയും ചെയ്തത്. പുലര്‍ച്ചെ മൂന്നുമണിയോടെയാണ് സംഭവം സുഹൃത്തുക്കള്‍ കണ്ടത്.
Read more
വീട്ടില്‍ പോകണമെന്നടക്കം പറഞ്ഞിരുന്നെന്നും, ഫോണ്‍ തല്ലിപ്പൊട്ടിച്ച നിലയിലാണെന്നും സുഹൃത്തുക്കള്‍ പറയുന്നു. ഹോര്‍മോണ്‍ ട്രീറ്റ്‌മെന്റിന്റെ മരുന്നു കഴിക്കുന്നതുമായി ബന്ധപ്പെട്ട് മാനസിക സമ്മര്‍ദ്ദത്തിലായിരുന്നു ശ്രദ്ധയെന്നും സുഹൃത്തുക്കള്‍ പറയുന്നു. മൂന്നു വര്‍ഷത്തോളമായി ശ്രദ്ധ കൊച്ചിയിലെത്തിയിട്ട്. ഹോര്‍മോണ്‍ ട്രീറ്റ്‌മെന്റ് നടത്തി വരികയായിരുന്നു. എളമക്കര പൊലീസ് സ്റ്റേഷന്‍ പരിധിയിലാണ് സംഭവം.
