സംസ്ഥാനത്ത് വീണ്ടും ചാത്തനും ചാത്തന്‍ സേവയും ‘ട്രന്‍ഡ്’ ആയി മാറുന്നതിനൊപ്പം ഇതിന്റെ പിന്നാമ്പുറങ്ങളില്‍ നടക്കുന്ന അനുബന്ധ കുറ്റകൃത്യങ്ങളും വര്‍ദ്ധിക്കുകയാണ്. കൊച്ചിയില്‍ ചാത്തന്‍ സേവയുടെ മറവില്‍ വീട്ടമ്മയെ പീഡിപ്പിച്ച കേസില്‍ മന്ത്രവാദി അറസ്റ്റില്‍. തൃശൂര്‍ സ്വദേശി പ്രഭാതാണ് കൊച്ചിയില്‍ പിടിയിലായത്.
വെണ്ണലയിലെ കേന്ദ്രത്തിലാണ് ജൂണ്‍ മാസത്തില്‍ സംഭവം നടന്നത്. സോഷ്യല്‍ മീഡിയയിലൂടെയുള്ള പരസ്യം കണ്ടാണ് വീട്ടമ്മ മന്ത്രവാദിയെ ബന്ധപ്പെട്ടത്. കുടുംബ പ്രശ്‌നങ്ങള്‍ പരിഹരിക്കുകയായിരുന്നു വീട്ടമ്മയുടെ ലക്ഷ്യം. ഇതേ തുടര്‍ന്ന് വീട്ടമ്മയോട് പ്രത്യേക പൂജ നടത്തണമെന്ന് പ്രതി പ്രഭാത് ആവശ്യപ്പെട്ടു.
പിന്നാലെ തൃശൂരിലെ കേന്ദ്രത്തില്‍ വച്ച് മെയ് മാസത്തില്‍ പൂജ നടത്തിയിരുന്നു. എന്നാല്‍ പൂജയില്‍ ഫലപ്രാപ്തിയുണ്ടായില്ലെന്ന് അറിയിച്ചാണ് വീട്ടമ്മയെ മന്ത്രവാദി പ്രഭാത് കൊച്ചിയിലേക്ക് വിളിച്ചുവരുത്തി പീഡിപ്പിച്ചത്. വിവരം പുറത്ത് പറഞ്ഞാല്‍ കൊലപ്പെടുത്തുമെന്ന് പ്രതി വീട്ടമ്മയെ ഭീഷണിപ്പെടുത്തിയതായും പരാതിയില്‍ പറയുന്നു.
Read more
പാലാരിവട്ടം പൊലീസ് കേസെടുത്ത് നടത്തിയ അന്വേഷണത്തിലാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ ജുഡീഷ്യല്‍ കസ്റ്റഡിയില്‍ വിട്ടു. പ്രതിയെ കാക്കനാട് ജില്ലാ ജയിലിലേക്ക് മാറ്റിയിട്ടുണ്ട്.
