അഹമ്മദാബാദില്‍ ഇന്നലെ നടന്ന ഇന്ത്യ-പാക്കിസ്ഥാന്‍ ലോകകപ്പ് ക്രിക്കറ്റ് മത്സരത്തിനിടെ മൂന്നൂറിലധികം കാണികള്‍ ആശുപത്രയില്‍ ചികിത്സതേടിയെന്ന് റിപ്പോര്‍ട്ട്. കനത്ത ചൂട് മൂലമുള്ള നിര്‍ജലീകരണം മൂലമാണ് ഏറെപ്പേര്‍ക്കും ചികിത്സ വേണ്ടി വന്നത്. കാല്‍ വഴുതി വീണവരും തലചുറ്റിയും മയങ്ങിയും വീണവരും ചികിത്സ തേടിയിട്ടുണ്ട്. ഭൂരിപക്ഷം പേരെയും പ്രാഥമിക ചികിത്സ നല്‍കി വിട്ടയച്ചു. ഗ്രൗണ്ടിനുള്ളില്‍ വിപുലമായ താല്‍ക്കാലിക ആശുപത്രി സജ്ജീകരണങ്ങള്‍ ഒരുക്കിയിരുന്നു. ഇവിടെയാണ് ഭൂരിപക്ഷം പേരും ചികിത്സ തേടിയത്.
അതേസമയം, അഹമ്മദാബാദ്, നരേന്ദ്ര മോദി സ്റ്റേഡിയത്തില് ഏഴ് വിക്കറ്റിനായിരുന്നു ഇന്ത്യയുടെ ജയം. ടോസ് നഷ്ടപ്പെട്ട് ബാറ്റിംഗിനെത്തിയ പാകിസ്ഥാന് 42.5 ഓവറില്‍ 191 റണ്‍സിന് എല്ലാവരും പുറത്തായിരുന്നു. മറുപടി ബാറ്റിംഗില്‍ ഇന്ത്യ 30.3 ഓവറില്‍ മൂന്ന് വിക്കറ്റ് മാത്രം നഷ്ടത്തില്‍ ലക്ഷ്യം മറികടന്നു.
86 റണ്‍സ് നേടി രോഹിത്ത് ശര്‍മ്മയാണ് ഇന്ത്യന്‍ വിജയത്തിന്റ് ശില്‍പി. 36 പന്തില്‍നിന്ന് അര്‍ധ സെഞ്ചുറി നേടിയ രോഹിത്ത്.66 പന്തില്‍ 86 റണ്‍സ് നേടി. 6 ?ഫോറും 6 സിക്‌സും അടങ്ങുന്നതാണ് രോഹത്തിന്റ് ഈന്നിംഗ്‌സ്. ഇന്ത്യ എട്ടാം തവണയാണ് ഏകദിന ലോകകപ്പില്‍ പാകിസ്ഥാനെ തോല്‍പ്പിക്കുന്നത്. ഒരിക്കല്‍ പോലും പാകിസ്ഥാന് ജയിക്കാനായിട്ടില്ല.
മൂന്നാം ഓവറില്‍ ശുഭ്മാന്‍ ഗില്ലിന്റെ (16) വിക്കറ്റ് ഇന്ത്യക്ക് നഷ്ടമായി. പിന്നാലെ ക്രീസിലെത്തിയത് വിരാട് കോലി (16). കോലി പെട്ടന്ന് മടങ്ങിയെങ്കിലും രോഹിത്തിനൊപ്പം 56 റണ്‍സ് കൂട്ടിചേര്‍ത്തിരുന്നു. ഹസന്‍ അലിയുടെ പന്തില്‍ മുഹമ്മദ് നവാസിന് ക്യാച്ച് നല്‍കിയാണ് കോലി മടങ്ങുന്നത്. തുടര്‍ന്ന് ശ്രേയസിനൊപ്പം 77 റണ്‍സ് ചേര്‍ത്താണ് രോഹിത് മടങ്ങുന്നത്. ഷഹീന്‍ അഫ്രീദിയുടെ പന്തില്‍ ഇഫ്തിഖര്‍ അഹമ്മദിനാണ് രോഹിത് ക്യാച്ച് നല്‍കിയത്. കെ എല്‍ രാഹുലിനെ (19) കൂട്ടുപിടിച്ച് ശ്രേയസ് (53) ടീമിനെ വിജയത്തിലേക്ക് നയിച്ചു.
ആദ്യം ബാറ്റു് ചെയ്ത പാകിസ്ഥാന്42.5 ഓവറില്‍ 191 റണ്‍സിന് പുറത്തായി. 50 റണ്‍സ് നേടിയ ക്യാപ്റ്റന്‍ ബാബര്‍ അസമാണ് പാകിസ്ഥാന്റെ ടോപ് സ്‌കോറര്‍. മുഹുമ്മദ് റിസ്വാന്‍ 49 റണ്‍സ് നേടി. ഏഴ് ഓവറില്‍ 19 റണ്‍സ് മാത്രം വഴങ്ങി രണ്ട് വിക്കറ്റെടുത്ത ജസ്പ്രിത് ബുമ്രയാണ് പാകിസ്ഥാനെ പ്രതിരോധത്തിലാക്കിയത്. മുഹമ്മദ് സിറാജ്, രവീന്ദ്ര ജഡേജ, ഹാര്‍ദിക് പാണ്ഡ്യ, കുല്‍ദീപ് യാദവ് എന്നിവര്‍ക്കും രണ്ട് വിക്കറ്റ് വീതമുണ്ട്.
