ഡൽഹിയിൽ അക്രമത്തിന് പ്രേരിപ്പിച്ച വിദ്വേഷ പ്രസംഗങ്ങൾക്കെതിരായ നടപടികളെ കുറിച്ച് സത്യവാങ്മൂലം നൽകാൻ ഡൽഹി ഹൈക്കോടതി കേന്ദ്രത്തിന് ഒരു മാസത്തെ സമയം നൽകി. വിദ്വേഷ പ്രസംഗങ്ങളുടെ വീഡിയോകൾ പരിശോധിച്ച് മറുപടി സമർപ്പിക്കാൻ ഹൈക്കോടതി ഡൽഹി പൊലീസിനും നാല് ആഴ്ച സമയം നൽകി. ബിജെപി നേതാക്കൾക്കെതിരെ എഫ്‌ഐആർ ആവശ്യപ്പെടുന്ന അപേക്ഷകർക്ക് ഇതിനു ശേഷം മറുപടി നൽകാൻ രണ്ടാഴ്ചത്തെ സമയം ലഭിക്കും. അടുത്ത വാദം ഏപ്രിൽ 13- നാണ്.
കേസിൽ ഹൈക്കോടതി ഇന്ന് വാദം പുനരാരംഭിച്ചപ്പോൾ, ഡൽഹി പൊലീസിനും കേന്ദ്ര സർക്കാരിനും വേണ്ടി ഹാജരായ സോളിസിറ്റർ ജനറൽ തുഷാർ മെഹ്‌റ, വിദ്വേഷ പ്രസംഗങ്ങൾ തിരഞ്ഞെടുക്കാൻ ഹർജിക്കാർക്ക് കഴിയില്ലെന്ന് പറഞ്ഞു. ഇക്കാര്യത്തിൽ എഫ്‌ഐആർ സമർപ്പിക്കാൻ കൂടുതൽ സമയം ആവശ്യപ്പെടുകയും ചെയ്തു.
“ഹർജിക്കാർ മൂന്ന് വിദ്വേഷ പ്രസംഗങ്ങൾ തിരഞ്ഞെടുത്തു. ഒരു ഹർജിയിൽ, ഹർജിക്കാരന് പ്രസംഗങ്ങൾ തിരഞ്ഞെടുക്കാനാവില്ലെന്ന് ഞാൻ ചൂണ്ടിക്കാട്ടി. ഞങ്ങൾക്ക് ലഭിച്ച മൂന്നെണ്ണം ഒഴികെയുള്ള ധാരാളം പ്രസംഗങ്ങൾ ഞങ്ങൾ ചൂണ്ടിക്കാട്ടി. പ്രസംഗങ്ങളിൽ നമ്മൾക്ക് തിരഞ്ഞെടുപ്പ് നടത്താനാവില്ല,” സോളിസിറ്റർ ജനറൽ കോടതിയോട് പറഞ്ഞു.
നിലവിലെ സാഹചര്യത്തിൽ എഫ്‌ഐആർ ഫയൽ ചെയ്യാൻ കഴിയില്ലെന്നും ഉചിതമായ സമയത്ത് പൊലീസ് നടപടിയെടുക്കും എന്നും അദ്ദേഹം പറഞ്ഞു.
Read more
ഡൽഹി കലാപത്തിന് പ്രേരകമായ എല്ലാ വിദ്വേഷ പ്രസംഗങ്ങളിലും എഫ്‌ഐആർ ഫയൽ ചെയ്യണമെന്ന് ഡൽഹി പൊലീസിനോട് ഹൈക്കോടതി ഇന്നലെ ആവശ്യപ്പെട്ടിരുന്നു. കപിൽ മിശ്ര, അനുരാഗ് താക്കൂർ, അഭയ് വർമ്മ, പർവേഷ് വർമ്മ എന്നീ നാല് ബിജെപി നേതാക്കളുടെ വിദ്വേഷ പ്രസംഗങ്ങളുടെ വീഡിയോകൾ തുറന്ന കോടതിയിൽ പ്ലേ ചെയ്തതിനെ തുടർന്നായിരുന്നു കോടതിയുടെ ഉത്തരവ്. എന്നാൽ ബി.ജെ.പി നേതാക്കള്‍ക്കെതിരെ കേസെടുക്കണമെന്ന് നിര്‍ദേശിച്ചതിന് തൊട്ടു പിന്നാലെ ഹര്‍ജി പരിഗണിച്ച ന്യായാധിപന്‍ ജസ്റ്റിസ് മുരളീധറിനു രാത്രിയോടെ സ്ഥലംമാറ്റ ഉത്തരവ് വന്നിരുന്നു. പഞ്ചാബ്-ഹരിയാന ഹൈക്കോടതിയിലേക്കാണ് ഇദ്ദേഹത്തെ സ്ഥലം മാറ്റിയത്. ഇതിന് മുമ്പ് കേസ് തന്നെ ജസ്റ്റിസ് മുരളീധറിന്റെ ബെഞ്ചില്‍ നിന്നും മാറ്റിയിരുന്നു. ചീഫ് ജസ്റ്റിസ് ഡി എൻ പട്ടേൽ, ജസ്റ്റിസ് സി ഹരിശങ്കർ എന്നിവരുടെ ബെഞ്ചാണ് ഇന്ന് കേസ് പരിഗണിച്ചത്.
