ഇരുപത് വര്‍ഷം നിരന്തരമായി പങ്കാളിയില്‍ നിന്ന് നേരിട്ട പീഡനങ്ങളുടെ സിസിടിവി ദൃശ്യങ്ങള്‍ ഡോക്യുമെന്ററിയിലൂടെ പ്രദര്‍ശിപ്പിക്കുകയാണ് ലണ്ടനിലെ ചാനല്‍ ഫൈവ്. ഡോക്യുമെന്ററിയുടെ സംപ്രേഷണ അനുമതിയ്ക്കായി ആറ് മാസമായി നടക്കുന്ന നിയമപോരാട്ടങ്ങള്‍ക്കൊടുവിലാണ് തിങ്കളാഴ്ച പ്രദര്‍ശനത്തിനെത്തുന്നത്.
പങ്കാളിയില്‍ നിന്ന് സ്ത്രീയ്ക്ക് നേരിടുന്ന ദൃശ്യങ്ങളാണ് ഡോക്യുമെന്ററിയില്‍ പ്രദര്‍ശിപ്പിക്കുന്നതെന്ന് കരുതിയെങ്കില്‍ തെറ്റി. റിച്ചാര്‍ഡ് എന്ന യുവാവ് ഭാര്യയില്‍ നിന്ന് നേരിട്ട പീഡനങ്ങളാണ് ഡോക്യുമെന്ററിയില്‍ ഉള്‍പ്പെടുത്തിയിരിക്കുന്നത്. ഷെറി സ്‌പെന്‍സര്‍ അസഭ്യം പറയുകയും കത്തി വീശി ഭയപ്പെടുത്തുകയും മര്‍ദ്ദിക്കുകയും ചെയ്യുന്നതിന്റെ ദൃശ്യങ്ങളാണ് ഡോക്യുമെന്ററിയുടെ ഉള്ളടക്കം.
വൈന്‍കുപ്പികൊണ്ട് യുവാവിന്റെ തലയ്ക്കടിക്കുന്നതും യുവാവിനെ കൊലപ്പെടുത്തുമെന്ന് ഭയപ്പെടുത്തുന്നതും ദൃശ്യങ്ങളില്‍ വ്യക്തമാണ്. മൈ വൈഫ്, മൈ അബ്യൂസര്‍: ദി സീക്രട്ട് ഫുട്ടേജ് എന്നാണ് ചാനല്‍ ഫൈവ് പ്രദര്‍ശനത്തിനെത്തിക്കുന്ന ഡോക്യുമെന്ററിയ്ക്ക് പേര് നല്‍കിയിരിക്കുന്നത്. ഈസ്റ്റ് യോര്‍ക്ക്‌ഷെയറിലെ ബബ്‌വിത്തിലെ വീട്ടിലാണ് റിച്ചാര്‍ഡിന് പീഡനങ്ങള്‍ നേരിടേണ്ടി വന്നത്.
Read more
കുട്ടികളെ നിരീക്ഷിക്കാന്‍ സ്ഥാപിച്ച ക്യാമറകളിലാണ് ദൃശ്യങ്ങള്‍ പതിഞ്ഞത്. പൊലീസ് അന്വേഷണത്തില്‍ തന്റെ ഭര്‍ത്താവ് സ്ഥിരമായി തന്നെ ആക്രമിക്കുന്ന വ്യക്തിയാണെന്ന് ഷെറി സ്‌പെന്‍സര്‍ പറഞ്ഞിരുന്നു. ഇതേ തുടര്‍ന്ന് സിസിടിവി ദൃശ്യങ്ങള്‍ കാണിച്ച് പൊലീസ് നടത്തിയ ചോദ്യം ചെയ്യലിലാണ് യുവതി കുറ്റസമ്മതം നടത്തിയത്. പൊലീസ് കേസെടുത്തതിന് പിന്നാലെ ഷെറിയെ ഹള്‍ക്രൗണ്‍ കോടതി നാല് വര്‍ഷത്തെ തടവിന് വിധിച്ചിട്ടുണ്ട്.
