ഇന്ത്യന്‍ നായകന്‍ വിരാട് കോഹ്ലിയുടെ വിവാഹമാണ് ക്രിക്കറ്റ് ലോകത്തെ പുതിയ വിശേഷം. ഏറെ രഹസ്യമായി നടത്തപ്പെടുന്ന ഈ വിവാഹത്തെ സംബന്ധിച്ച് അതിനാല്‍ തന്നെ ഊഹാപോഹങ്ങളും ശക്തമാണ്. കോഹ്ലിയുടെയും താരസുന്ദരി അനുഷ്‌ക്കയുടേയും വിവാഹത്തിന് ക്രിക്കറ്റ് ലോകത്ത് നിന്നും രണ്ട് പേരെ മാത്രം ക്ഷണിച്ചിട്ടുളളുവെന്നതാണ് പുതിയ ഗോസിപ്പ്.
ക്രിക്കറ്റ് ഇതിഹാസം സച്ചിന്‍ ടെന്‍ഡുല്‍ക്കറും, വെടിക്കെട്ട് ബാറ്റ്സ്മാനും കൊഹ്ലിയുടെ ഉറ്റസുഹൃത്തുമായ യുവരാജ് സിങ്ങിനുമാണ് ഈ ക്ഷണം ലഭിച്ചിരിക്കുന്നതെന്നാണ് റിപ്പോര്‍ട്ടുകള്‍.
ഇന്ത്യ-ലങ്ക പരമ്പര നടക്കുന്നതിനാലാണ് മറ്റു ക്രിക്കറ്റ് താരങ്ങള്‍ വിവാഹത്തില്‍ നിന്ന് വിട്ടു നില്‍ക്കുന്നത്. തികച്ചും സ്വകാര്യമായി നടക്കുന്ന ചടങ്ങാകും ഈ താരവിവാഹം എന്നാണ് വാര്‍ത്തകള്‍. അതുകൊണ്ട് തന്നെ ഇവരുമായി ഏറ്റവും അടുത്ത ബന്ധുക്കളും, സുഹൃത്തുക്കളും മാത്രമാകും ലോകം ഉറ്റുനോക്കുന്ന ഈ താരവിവാഹത്തില്‍ പങ്കെടുക്കുക.
Read more
മാസങ്ങള്‍ക്കു മുമ്പ് ഇരുവരുടെയും കുടുംബാംഗങ്ങള്‍ ഒത്തു ചേര്‍ന്ന് വിവാഹത്തിനായുള്ള പദ്ധതികള്‍ ഒരുക്കിയെന്നാണ് സൂചനകള്‍. അനുഷ്‌ക ക്ഷണിച്ചിരിക്കുന്നത് ഏറ്റവും അടുപ്പമുള്ളവരെ മാത്രമാണ്. അനുഷ്‌കയുടെ ആദ്യ ഹീറോ ആയ ഷാരൂഖ് ഖാന്‍, ആദിത്യ ചോപ്ര, മനീഷ് ശര്‍മ്മ, ആമിര്‍ ഖാന്‍ എന്നിവര്‍ മാത്രമാണ് ചടങ്ങിന് ക്ഷണമുള്ളതെന്നും റിപ്പോര്‍ട്ടുകളുണ്ട്.
