ഏകദിന ലോകകപ്പിനിടെ ഇന്ത്യന് ആരാധകരില്നിന്നുമുണ്ടായ മോശം അനുഭവം ചൂണ്ടിക്കാട്ടി ഐസിസിയ്ക്ക് പരാതി നല്കിയ പാകിസ്ഥാന് ക്രിക്കറ്റ് ബോര്ഡിനെ വിമര്ശിച്ച് ഇന്ത്യന് മുന് താരം ഇര്ഫാന് പത്താന്. പാകിസ്ഥാനില് വെച്ച് ഇന്ത്യന് താരങ്ങള്ക്ക് നേരെ നടന്ന മോശം പെരുമാറ്റങ്ങളുടെ വാര്ത്തകള് പങ്കുവെച്ചാണ് പത്താന്റെ പ്രതികരണം.
പെഷവാറില് പാകിസ്ഥാനെതിരെ കളിക്കുമ്പോള് കാണികളിലൊരാള് തനിക്ക് നേരെ ഇരുമ്പാണി എറിഞ്ഞുവെന്നും അത് തന്റെ മുഖത്ത് കൊണ്ടുവെന്നും ഇര്ഫാന് പറഞ്ഞു. അതൊരു പ്രശ്നമായി ഇന്ത്യ ഉയര്ത്തിയിരുന്നില്ല. പാകിസ്ഥാനില് കളിക്കുമ്പോള് സച്ചിനും അജിത്ത് അഗാര്ക്കറിനും സമാന അനുഭവങ്ങള് ഉണ്ടായിട്ടുണ്ടെന്നും അന്നത്തെ വാര്ത്തകളടക്കം പങ്കുവെച്ച് പത്താന് എക്സില് കുറിച്ചു.
ഇന്ത്യക്കെതിരായ മല്സരത്തില് സ്റ്റേഡിയത്തിലെ കാണികളുടെ ഭാഗത്തു നിന്നും മോശം പെരുമാറ്റം തങ്ങള്ക്കു നേരിട്ടെന്നും മതിയായ പിന്തുണ ലഭിച്ചില്ലെന്നും ചൂണ്ടിക്കാട്ടി പിസിബി ഇന്ത്യയ്ക്കെതിരെ ഐസിസിയ്ക്ക് പരാതി നല്കിയിരുന്നു. എന്നാല് പിസിബി ഉദ്ദേശിച്ചപോലെ നീക്കം ഫലം കണ്ടിട്ടില്ല.
പിസിബിയുടെ പരാതിയുടെ പേരില് ഇന്ത്യക്കെതിരേ ഐസിസി നടപടി സ്വീകരിക്കാന് സാധ്യത കുറവാണെന്നാണ് പിടിഐ റിപ്പോര്ട്ട് ചെയ്തു. പെരുമാറ്റച്ചട്ടമെന്നതില് വ്യക്തികള് മാത്രമേ ഉള്പ്പെടുകയുള്ളൂവെന്നും ഒരുകൂട്ടം ആളുകള് ഇതിന്റെ പരിധിയില് വരില്ലെന്നതുമാണ് ഇതിന്റെ കാരണമായി ചൂണ്ടിക്കാട്ടപ്പെടുന്നത്.