ഇപ്പോൾ നടക്കുന്ന ബോർഡർ ഗവാസ്കർ ട്രോഫിയിൽ തന്റെ ആദ്യ അരങ്ങേറ്റ മത്സരം നടത്തിയിരിക്കുകയാണ് യുവ താരം നിതീഷ് കുമാർ റെഡ്‌ഡി. ആദ്യ മത്സരത്തിൽ തന്നെ ടീമിന്റെ ടോപ് സ്കോററായതും താരം തന്നെയാണ്. 59 പന്തിൽ 6 ഫോറുകളും, ഒരു സിക്സുമടക്കം 41 റൺസ് ആണ് നിതീഷ് നേടിയത്.
വിരാട് കോഹ്‌ലിയുടെ കൈയിൽ നിന്നാണ് നിതീഷിന് ക്യാപ് ലഭിച്ചത്. ആ ഒരു നിമിഷത്തെ കുറിച്ച് ഒന്നാം ദിനം അവസാനിച്ചപ്പോൾ അദ്ദേഹം സംസാരിച്ചു.
നിതീഷ് കുമാർ റെഡ്‌ഡി പറയുന്നത് ഇങ്ങനെ:
“ഇന്ത്യൻ ടീമിൽ അരങ്ങേറുകയെന്നത് ഏറ്റവും മികച്ച അനുഭവമാണ്. ഏറെക്കാലമായി ഞാൻ ഇന്ത്യൻ ടീമിൽ കളിക്കുന്നതിനായി ആഗ്രഹിച്ചു. വിരാട് കോഹ്‍ലിയിൽ നിന്ന് ഇന്ത്യൻ ക്യാപ് ലഭിച്ചതിൽ അതിലേറെ സന്തോഷമുണ്ട്. ഞാൻ ക്രിക്കറ്റ് കളിച്ച് തുടങ്ങിയപ്പോൾ മുതൽ ഇഷ്ടതാരം വിരാട് കോഹ്ലിയാണ്. അദ്ദേഹം കാരണമാണ് ഞാൻ ഇപ്പോൾ ഇവിടെ നിൽക്കുന്നത്”
മത്സരത്തിന് മുമ്പ് ഗംഭീർ നൽകിയ ഉപദേശത്തെക്കുറിച്ചും നിതീഷ് പറഞ്ഞു.
“പെർത്തിനെക്കുറിച്ച് ഞാൻ ഒരുപാട് കേട്ടിട്ടുണ്ട്. അവസാന പരിശീലന സെഷനിൽ ഞാൻ ഗംഭീറുമായി പിച്ചിനെക്കുറിച്ച് സംസാരിച്ചു. ബൗൺസറുകളും കൃത്യതയാർന്ന പന്തുകളും വന്നാൽ അത് നേരിടണം. രാജ്യത്തിന് വേണ്ടി ഒരു ബുള്ളറ്റ് നേരിടുകയാണെന്ന് കരുതണം. ഗംഭീറിന്റെ ആ ഉപദേശം എനിക്ക് ഗുണം ചെയ്തു. കളത്തിൽ ഞാൻ രാജ്യത്തിന് വേണ്ടി ബുള്ളറ്റുകൾ നേരിടുകയാണെന്ന് കരുതിയാണ് കളിച്ചത്” നിതീഷ് കുമാർ റെഡ്‌ഡി പറഞ്ഞു.