സന്തോഷ് ട്രോഫി കിരീടത്തിൽ കേരളം മുത്തമിടാൻ നിർണായ പങ്കുവഹിച്ച മിഡ്ഫീൽഡർ റാഷിദിന് വീടും സ്ഥലവും നൽകാൻ തീരുമാനിച്ചതായി കൽപ്പറ്റ എം.എൽ.എ ടി.സിദ്ദീഖ്. റാഷിദിനേയും ഉമ്മയേയും കുടുംബാംഗങ്ങളേയും കണ്ട് അഭിനന്ദം അറിയിച്ചതിന് പിറകെയായിരുന്നു എം.എൽ.എയുടെ പ്രഖ്യാപനം. ഫെയ്‌സ്ബുക്ക് കുറിപ്പിലൂടെയാണ് ടി. സിദ്ദീഖ് ഈകാര്യം അറിയിച്ചിരിക്കുന്നത്.
മിഡ്‌ഫീൽഡിൽ കേരള മുന്നേറ്റങ്ങൾക്ക് നായകനോട് ഒപ്പം അതി നിർണായകമായ പങ്ക് വഹിച്ച താരമായിരുന്നു റാഷിദ്. സ്വന്തമായി വീടും സ്ഥലവും ഇല്ലാതിരുന്ന റാഷിദിന്റെ തകർപ്പൻ പ്രകടനം കണ്ട എം.എൽ.എവീടും സ്ഥലവും കൊടുക്കാൻ തീരുമാനിക്കുക ആയിരുന്നു.
ടി സിദ്ദീഖിന്റെ ഫേസ് ബുക്ക് പോസ്റ്റ്;
സന്തോഷ് ട്രോഫി ഫൈനലിൽ കേരളം ബംഗാളിനെ തകർത്ത്‌ കിരീടത്തിൽ മുത്തമിട്ടപ്പോൾ അതി നിർണ്ണായകമായ ഗോൾ നേടിയ സഫ്‌നാദും മറ്റൊരു താരം റാഷിദും കൽപ്പറ്റ മണ്ഡലത്തിൽ നിന്നുള്ള അഭിമാന താരങ്ങളാണ്.
ഇന്ന് പെരുന്നാൾ നമസ്കാരം കഴിഞ്ഞ്‌ നേരെ പോയത്‌ കളി കഴിഞ്ഞ്‌ പെരുന്നാളിനു വീട്ടിലെത്തിയ റാഷിദിനെ കാണാനാണ്. റാഷിദിനേയും ഉമ്മയേയും കുടുംബാംഗങ്ങളേയും കണ്ട് അഭിനന്ദിച്ചു. അപ്പോഴാണറിഞ്ഞത്‌ റാഷിദിനു സ്വന്തമായി സ്ഥലമോ വീടോ ഇല്ല എന്നത്‌. നമ്മുടെ അഭിമാനം വാനോളമുയർത്തിയ പ്രിയ താരത്തിനു സ്ഥലവും വീടും നൽകാൻ തീരുമാനിച്ച്‌ അവരെ അറിയിച്ചു. വയനാട്ടിലെ വളർന്ന് വരുന്ന തലമുറയ്ക്ക്‌ ആവേശം പകർന്ന റാഷിദിനു ഇനിയും ഉയരങ്ങൾ കീഴടക്കാൻ കഴിയട്ടെ എന്നാശംസിക്കുന്നു.
Read more
താരങ്ങൾക്ക്‌ കൽപ്പറ്റയിൽ വൻ സ്വീകരണം ഒരുക്കാനും തീരുമാനിച്ചു.
