കഴിഞ്ഞ 25 വർഷമായി ഇന്ത്യയിൽ ഏറ്റവുമധികം വിറ്റഴിക്കപ്പെടുന്ന കാറുകളിലൊന്നാണ് മാരുതി സുസുക്കി വാഗൺ ആർ . 1999-ലാണ് ഇത് ആദ്യമായി ഇന്ത്യൻ വിപണിയിൽ അവതരിപ്പിച്ചത്. നിലവിൽ, ഫാക്ടറിയിൽ ഘടിപ്പിച്ച CNG പതിപ്പിനൊപ്പം 1L കെ-സീരീസ് പെട്രോൾ എഞ്ചിനുമായി ഹാച്ച്ബാക്കിൻ്റെ മൂന്നാം-തലമുറ മോഡൽ രാജ്യത്ത് വിൽപ്പനയ്‌ക്കുണ്ട്. പുതിയ തലമുറ മാരുതി സുസുക്കി വാഗൺ ആർ ഫുൾ ഹൈബ്രിഡ് സംവിധാനത്തോടെ അവതരിപ്പിക്കുമെന്ന ജാപ്പനീസ് മാധ്യമങ്ങളിൽ നിന്നുള്ള ഏറ്റവും പുതിയ റിപ്പോർട്ടുകൾ ആണ് ഇപ്പോൾ പുറത്തു വരുന്നത്. ഈ റിപ്പോർട്ട് ശരിയാണെന്ന് തെളിഞ്ഞാൽ സമ്പൂർണ ഹൈബ്രിഡ് സംവിധാനമുള്ള ആദ്യത്തെ ചെറുകാറായി വാഗൺ ആർ മാറും.
ജപ്പാൻ-സ്പെക്ക് വാഗൺ ആർ ഫുൾ-ഹൈബ്രിഡിൻ്റെ പുതിയ-ജെൻ പതിപ്പിൽ 666 സിസി 3-സിലിണ്ടർ പെട്രോൾ എഞ്ചിനും ഒരു ഇലക്ട്രിക് മോട്ടോറും ഉണ്ടായിരിക്കാൻ സാധ്യതയുണ്ട്. പെട്രോൾ എഞ്ചിൻ 53 ബിഎച്ച്പി കരുത്തും 58 എൻഎം പീക്ക് ടോർക്കും വികസിപ്പിക്കുമ്പോൾ, ഇലക്ട്രിക് മോട്ടോർ 10 ബിഎച്ച്പി കരുത്തും 29.5 എൻഎം ടോർക്കും നൽകും. ഈ ഫുൾ-ഹൈബ്രിഡ് പവർട്രെയിൻ സജ്ജീകരണം ഒരു eCVT ഗിയർബോക്സുമായി ജോടിയാക്കും. അളവുകൾ നോക്കുകയാണെങ്കിൽ ജാപ്പനീസ് വിപണിയിലെ പുതിയ തലമുറ വാഗൺ ആർ ഫുൾ-ഹൈബ്രിഡ് മോഡലിന് 3,395 എംഎം നീളവും 1,475 എംഎം വീതിയും 1,650 എംഎം ഉയരവും ഉണ്ടായിരിക്കും. യഥാക്രമം 2,460 എംഎം, 850 കിലോഗ്രാം ആയിരിക്കും വീൽബേസും കർബ് ഭാരവും. അടുത്ത തലമുറ വാഗൺ ആറിന് ഹിംഗഡ് ഡോറുകളുടെ സ്ഥാനത്ത് സ്ലൈഡിംഗ് ഡോറുകളാണ് ഉണ്ടാവുക.
ശക്തമായ ഹൈബ്രിഡ് പവർട്രെയിൻ സജ്ജീകരണത്തോടെയാണ് മാരുതി സുസുക്കി നിലവിൽ ഗ്രാൻഡ് വിറ്റാര എസ്‌യുവി വാഗ്ദാനം ചെയ്യുന്നത്. ഇത് 27.97 kmpl എന്ന സെഗ്‌മെൻ്റിലെ മികച്ച മൈലേജ് നൽകുന്നു. ഇത് ഇതിനകം തന്നെ വാഗൺ R ഓട്ടോമാറ്റിക് (AGS) ഇന്ധനക്ഷമതയായ 25.19kmpl നേക്കാൾ കൂടുതലാണ്. നാലാം തലമുറ മാരുതി വാഗൺ ആറിന് ഒരു ഫുൾ-ഹൈബ്രിഡ് സിസ്റ്റം ലഭിക്കുകയാണെങ്കിൽ, ലിറ്ററിന് 30ന് മേലെ കിലോമീറ്റർ മൈലേജ് എളുപ്പത്തിൽ നേടാനാകുമെന്നാണ് പ്രതീക്ഷിക്കുന്നത്. കിലോഗ്രാമിന് 33.47 കി.മീ എന്ന സിഎൻജി പതിപ്പിൻ്റെ ഇന്ധനക്ഷമതയെ പോലും മറികടക്കാൻ ഇതിന് കഴിയും.
സാധാരണ ഐസിഇ മോഡലുകളെ അപേക്ഷിച്ച് ഫുൾ ഹൈബ്രിഡ് വാഹനങ്ങൾ ചെലവേറിയതാണെന്നത് രഹസ്യമായ ഒരു കാര്യമല്ല. മാരുതി സുസുക്കി വാഗൺ ആറിന് 5.55 ലക്ഷം രൂപയാണ് പ്രാരംഭ വില വരുന്നത്. കൂടാതെ ഒരു ഫുൾ-ഹൈബ്രിഡ് സിസ്റ്റം ചേർക്കുന്നത് ഹാച്ചിൻ്റെ മൊത്തത്തിലുള്ള വില ഗണ്യമായി ഉയർത്തും. എന്നിരുന്നാലും, ഫുൾ-ഹൈബ്രിഡ് വാഗൺ ആറിന് താങ്ങാനാവുന്ന വില ഉണ്ടായിരിക്കുമെന്നാണ് കരുതുന്നത്. ജപ്പാനിലേക്ക് പോകുന്ന വാഗൺ R ഫുൾ-ഹൈബ്രിഡിൻ്റെ വില 1.3 ദശലക്ഷം യെൻ (ഏകദേശം 7.22 ലക്ഷം) രൂപയാണ്.
വാഗൺ ആർ ഫുൾ-ഹൈബ്രിഡിൻ്റെ റേഞ്ച്- ടോപ്പിംഗ് വേരിയൻ്റുകൾക്ക് 1.9 ദശലക്ഷം യെൻ (ഏകദേശം 10.55 ലക്ഷം രൂപ) ആണ് വില വരുന്നത്. വാഗൺ ആർ ലൈനപ്പിൻ്റെ ടോപ്പ് എൻഡ് വേരിയൻ്റായ ZXI+ AGS-ന് 7.21 ലക്ഷം രൂപയും CNG ട്രിമ്മുകൾക്ക് 6.45- 6.90 ലക്ഷം രൂപയുമാണ് വില. അതുകൊണ്ട് തന്നെ, വിലയിലെ വർദ്ധനവ് വളരെ വലുതായിരിക്കുമെന്ന് പ്രതീക്ഷിക്കുന്നില്ല, മാത്രമല്ല ഇത് താങ്ങാനാവുന്ന ഫാമിലി കാറായി തുടരുകയും ചെയ്യും.
