ഒരു കാലത്ത് ബോളിവുഡിലെ തിളങ്ങുന്ന താരമായിരുന്നു സണ്ണി ഡിയോൾ. ഒരിടവേളയ്ക്കു ശേഷം വീണ്ടും സിനിമയിൽ സജീവമാകുന്ന താരത്തിന്റെ സമീപകാലത്തെ ഏറ്റവുംവലിയ ഹിറ്റ് ചിത്രമാണ് ഗദർ 2. ബോളിവുഡിലെ തന്നെ ഈ വര്‍ഷത്തെ അത്ഭുത ഹിറ്റാണ് ഗദര്‍ 2 എന്നും പറയാം.
90 കളിലെ കരുത്തുറ്റ നായകനായിരുന്ന സണ്ണിയുടെ തിരിച്ചുവരവാണ് ചിത്രമെന്നും കരുതിയാൽ തെറ്റില്ല.ഇപ്പോഴിതാ പുതിയ കളക്ഷൻ റിപ്പോർട്ടുകൾ പുറത്തുവരുമ്പോൾ ആരാധകർക്ക് ആവേശമാണ്. പുതിയ കണക്കനുസരിച്ച് ചിത്രം 500 കോടി ക്ലബിലേക്ക് എത്തിയിരിക്കുന്നു.
റിലീസിന്‍റെ 24-ാം ദിവസമായിരുന്ന ഞായറാഴ്ച 7.80 കോടി നേടിയതോടെയാണ് ഇത് സാധ്യമായത്. ഇതോടെ ഇന്ത്യന്‍ ബോക്സ് ഓഫീസില്‍ ഏറ്റവും വേഗത്തില്‍ 500 കോടി നേടുന്ന ഹിന്ദി ചിത്രം ആയിരിക്കുകയാണ് ഗദര്‍ 2. പഠാനെയും ബാഹുബലി 2 നെയുമാണ് ചിത്രം പിന്നിലാക്കിയത്. പഠാന്‍ 28 ദിവസം കൊണ്ടും ബാഹുബലി 2 ഹിന്ദി പതിപ്പ് 34 ദിവസം കൊണ്ടുമാണ് ഇന്ത്യന്‍ ബോക്സ് ഓഫീസില്‍ 500 കോടി കടന്നത്.
1947 ഇന്ത്യ പാക് വിഭജന കാലത്ത് നടക്കുന്ന പ്രണയകഥയായിരുന്നു 2001ല്‍ ഇറങ്ങിയ ഗദര്‍. താര സിംഗ്, സക്കീന എന്നിവരുടെ അന്ന് വിജയിച്ച പ്രണയത്തിന് 22 വര്‍ഷത്തിനിപ്പുറം 1971 ലെ ഇന്ത്യ-പാക് യുദ്ധകാലത്ത് എന്ത് സംഭവിച്ചു എന്നതാണ് ഗദര്‍ 2വിന്‍റെ കഥ. അമീഷ പട്ടേലാണ് ചിത്രത്തിൽ നായിക.
Read more
മനീഷ് വാധ്വയും ഗൌരവ് ചോപ്രയും മറ്റ് രണ്ട് പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. അനില്‍ ശര്‍മ്മയാണ് സംവിധാനം. പിരീഡ് ആക്ഷന്‍ ഡ്രാമ വിഭാഗത്തില്‍ പെടുന്ന ചിത്രമാണിത്. 80 കോടി ബജറ്റിലാണ് ചിത്രം നിർമ്മിച്ചത്.കളക്ഷന്‍ വച്ച് നോക്കിയാല്‍ ഹിന്ദി സിനിമയിലെ അടുത്തകാലത്ത് ഇറങ്ങിയ ഏറ്റവും വലിയ വിജയമാണ് ചിത്രം എന്ന് കാണാം.
