താന്‍ കഞ്ചാവ് ആണെന്ന തെറ്റിദ്ധാരണ ആളുകള്‍ക്കുണ്ടെന്ന് സംവിധായകന്‍ അനുരാഗ് കശ്യപ്. തന്നെ സൈക്കോപാത്ത്, കഞ്ചാവ്, മയക്കുമരുന്ന് എന്ന് പറഞ്ഞ് പലരും ട്രോളാറുണ്ട്. എന്നാല്‍ തനിക്ക് കഞ്ചാവ് അലര്‍ജിയാണെന്ന് ആര്‍ക്കും അറിയില്ല എന്നാണ് അനുരാഗ് കശ്യപ് പറയുന്നത്. തനിക്ക് ഒരു ആരാധകന്‍ കഞ്ചാവ് സമ്മാനിച്ചതിനെ കുറിച്ച് പറഞ്ഞാണ് അനുരാഗ് സംസാരിച്ചത്.

”ഗ്യാങ്‌സ് ഓഫ് വസീപൂര്‍, രാമന്‍ രാഘവ് എന്നീ സിനിമകള്‍ ഒരുക്കിയതു കൊണ്ട് ഞാനൊരു സൈക്കോപാത്ത് ആണെന്നാണ് പലരും തെറ്റിദ്ധരിച്ചിരിക്കുന്നത്. ആദ്യം എന്നെ കാണുന്നത് ആളുകള്‍ക്ക് ഭയമായിരുന്നു. പക്ഷെ ഞാനുമായി ഇടപഴകി കഴിഞ്ഞാല്‍ അവര്‍ ചിന്തിച്ചതില്‍ നിന്നും നേരെ വിപരീതമാണ് ഞാന്‍ എന്ന് അവര്‍ക്ക് മനസിലാകും.”

”പലരും വിചാരിക്കുന്നത് ഞാന്‍ പുകവലിക്കും എന്നാണ്. കഞ്ചാവ്, മയക്കുമരുന്ന് എന്നൊക്കെ പറഞ്ഞ് പലരും എന്നെ ട്രോളാറുണ്ട്. പക്ഷെ എനിക്ക് അതൊക്കെ അലര്‍ജിയാണെന്ന കാര്യം അവര്‍ക്ക് അറിയില്ല. എന്റെ അടുത്ത് നിന്ന് ആരെങ്കിലും പുക വലിച്ചാല്‍ എനിക്ക് അപ്പോള്‍ തന്നെ ആസ്മ വരും.”

”ഒരിക്കല്‍ ടൊറന്റൊ ഫെസ്റ്റിവലില്‍ പങ്കെടുത്തപ്പോള്‍ ഒരാള്‍ വന്ന് ‘നിങ്ങള്‍ക്ക് ഞാന്‍ നല്ലൊരു സമ്മാനം കൊണ്ടുവന്നിട്ടുണ്ട്’ എന്ന് പറഞ്ഞ് ഒരു ബാഗ് തന്നു. അതില്‍ പൂക്കള്‍ ഉണ്ടായിരുന്നു. എനിക്ക് അതിനോട് അലര്‍ജിയാണ്. ബാഗില്‍ എന്താണെന്ന് ഞാന്‍ ചോദിച്ചപ്പോള്‍ ‘നിങ്ങള്‍ക്ക് ഇഷ്ടമുള്ള സാധനമാണത്’ എന്നാണ് അയാള്‍ പറഞ്ഞത്.”

”ബാഗിനുള്ളില്‍ കഞ്ചാവ് ആയിരുന്നു ഉണ്ടായിരുന്നത്. നിങ്ങള്‍ക്ക് എന്തെങ്കിലും കുഴപ്പമുണ്ടോ, അത് എന്റടുത്ത് നിന്നും മാറ്റു എന്ന് ഞാന്‍ പറഞ്ഞു. ആ സംഭവം എന്നെ കുറിച്ചുള്ള തെറ്റിദ്ധാരണയുടെ ഫലമാണ്” എന്നാണ് അനുരാഗ് കശ്യപ് ഒരു പോഡ്കാസ്റ്റിനോട് സംസാരിക്കവെ പറഞ്ഞത്.