നാടകത്തില്‍ നിന്നും സിനിമയിലേക്കും സീരിയലിലേക്കും എത്തിയ താരമാണ് സിനി പ്രസാദ്. ഭ്രമരം, കറുത്തപക്ഷികള്‍ തുടങ്ങി സൂപ്പര്‍ താരങ്ങളുടെ ചിത്രത്തിലടക്കം സിനി അഭിനയിച്ചിട്ടുണ്ട്. എന്നാല്‍ മലയാള സിനിമയില്‍ താന്‍ കോസ്റ്റിയൂമില്‍ ടൈപ്പ് കാസ്റ്റ് ചെയ്യപ്പെട്ടിട്ടുണ്ട് എന്നാണ് സിനിമ ഇപ്പോള്‍ തുറന്നു പറഞ്ഞിരിക്കുന്നത്. തനിക്ക് സംഭവിച്ച ദുരനുഭവത്തെ കുറിച്ചും നടി പറയുന്നുണ്ട്.
കലാഭവന്‍ മണിച്ചേട്ടനൊപ്പം നന്മ എന്നൊരു സിനിമയില്‍ അഭിനയിച്ചിരുന്നു. അതിലും എന്റെ വേഷം കൈലിയും ബ്ലൗസും തോര്‍ത്തുമാണ്. അത് ഭയങ്കര ഹിറ്റായിരുന്നു. എനിക്ക് മുണ്ടും ബ്ലൗസും ചേരുമെന്ന് കരുതിയിട്ടാണോ എന്താണെന്ന് അറിയില്ല രണ്ട്-മൂന്ന് സിനിമകളില്‍ ആ ഒരു കോസ്റ്റ്യൂം തന്നിട്ടുണ്ട്. മുണ്ടും ബ്ലൗസും തന്നതിന് ശേഷം തോര്‍ത്ത് ഇടാതെ ക്യാമറയുടെ മുന്നിലേക്ക് വരാന്‍ പറഞ്ഞ അനുഭവം ഉണ്ടായിട്ടുണ്ട്.
എനിക്ക് താല്‍പര്യമില്ലെങ്കിലും അങ്ങനെ വരാനാണ് ആവശ്യപ്പെട്ടത്. പിന്നെ നന്മ സിനിമയില്‍ തോര്‍ത്തിട്ടിട്ട് തന്നെ അഭിനയിച്ചിരുന്നു. എന്നാല്‍ അതിലൊരു സീനില്‍ ദുരനുഭവം ഉണ്ടായി. ഒരു പുഴയുടെ സൈഡില്‍ നിന്നാണ് ചിത്രീകരണം നടക്കുന്നത്. ഇന്ദ്രന്‍സ് ഏട്ടന്റെ കഥാപാത്രം എന്നെ തിരക്കി വീട്ടിലേക്ക് വരികയാണ്. ഈ സമയത്ത് ഞാന്‍ പുഴയുടെ സൈഡില്‍ ഇരുന്ന് അലക്കുകയാണ്.
ക്യാമറയൊക്കെ അക്കരെയും ഇക്കരെയുമായി സെറ്റ് ചെയ്തിട്ടുണ്ട്. ആക്ഷന്‍ എന്നു പറഞ്ഞതും എന്റെ ശരീരത്ത് ഉണ്ടായിരുന്ന തോര്‍ത്ത് ആരോ ഒരാള്‍ വലിച്ചെടുത്തോണ്ട് പോയി. അസിസ്റ്റന്റ് ഡയറക്ടര്‍ അങ്ങനെ ആരോ ആയിരുന്നു. ആ സമയത്ത് എനിക്ക് ഒന്നും പറയാന്‍ പറ്റിയില്ല. ഞാന്‍ ചെയ്തു കൊണ്ടിരുന്ന ജോലി അങ്ങനെ ചെയ്യുന്നത് പോലെ ഇരുന്നിട്ട് അഭിനയിച്ചു. ആ ഷോട്ടില്‍ ദൂരെ ആയിരുന്നു ക്യാമറ ഉണ്ടായിരുന്നത്.
അതുകൊണ്ട് കുഴപ്പമില്ലെന്ന് ഞാനും കരുതി. തോര്‍ത്ത് വലിച്ചെടുത്തോണ്ട് പോയ സമയത്ത് ഞാന്‍ പ്രതികരിച്ചിരുന്നില്ല. ഒരു ആര്‍ട്ടിസ്റ്റ് ആവുമ്പോള്‍ ഇത് ചെയ്യാന്‍ ബാധ്യസ്ഥയാണല്ലോ. ആ സീന്‍ വന്നപ്പോള്‍ വൃത്തികേട് ഒന്നുമില്ലായിരുന്നു. വളരെ ക്ലോസ് ആയിട്ടാണ് ആ ഷോട്ട് എടുത്തു വച്ചേക്കുന്നത്. അതുകൊണ്ട് എനിക്ക് ദേഷ്യം ഒന്നും തോന്നിയില്ല എന്നാണ് മൂവി വേള്‍ഡ്് മീഡിയക്ക് നല്‍കിയ അഭിമുഖത്തില്‍ സിനിമ പറയുന്നത്.
