അൽഫോൺസ് പുത്രന്റെ ‘പ്രേമം’ എന്ന സിനിമയിലൂടെ ശ്രദ്ധേയനായ താരമാണ് അൽത്താഫ് സലിം. പിന്നീട് ഗോൾഡ്, പാച്ചുവും അത്ഭുത വിളക്കും, പ്രേമലു എന്നീ ചിത്രങ്ങളിലും മികച്ച വേഷങ്ങൾ കൈകാര്യം ചെയ്തു. അൽത്താഫ് സംവിധാനം ചെയ്ത ‘ഞണ്ടുകളുടെ നാട്ടിൽ ഒരിടവേള’ എന്ന ചിത്രം ഏറെ പ്രേക്ഷക- നിരൂപക പ്രശംസകൾ നേടിയ ചിത്രം കൂടിയാണ്. ഫഹദ് ഫാസിൽ നായകനാവുന്ന ‘ഓടും കുതിര ചാടും കുതിര’യാണ് അൽത്താഫ് സലിം സംവിധാനം ചെയ്യുന്ന അടുത്ത സിനിമ.
അൽത്താഫ് സലിം ആദ്യമായി നായകനാവുന്ന ചിത്രം ‘മന്ദാകിനി’. അനാർക്കലിയാണ് ചിത്രത്തിൽ നായികയായെത്തുന്നത്. ഒരു കല്ല്യാണവും അതിനോടനുബന്ധിച്ച് അരങ്ങേറുന്ന രസകരമായ സംഭവ വികാസങ്ങളുമാണ് നവാഗതനായ വിനോദ് ലീല സംവിധാനം ചെയ്യുന്ന മന്ദാകിനിയുടെ പ്രമേയം.
ഇപ്പോഴിതാ ചിത്രത്തെ കുറിച്ച് സംസാരിക്കുകയാണ് അൽത്താഫ് സലിം. വടക്കുനോക്കിയന്ത്രം തുടങ്ങുന്ന അതേ ഫോർമാറ്റിലാണ് മന്ദാകിനിയും തുടങ്ങുന്നത് എന്നാണ് അൽത്താഫ് പറയുന്നത്. കൂടാതെ എല്ലാത്തരം പ്രേക്ഷകർക്കും കണക്ട് ആവുന്ന തരത്തിലുള്ള ചിത്രമാണിതെന്നും അൽത്താഫ് പറയുന്നു.
“ഒരു സംഭവത്തെ ചുറ്റിപറ്റി ഒരു ദിവസം നടക്കുന്ന കഥയാണ് മന്ദാകിനി. തമാശയോടൊപ്പം ചെറിയ ട്രാവലും മന്ദാകിനിയുടെ ഭാഗമാണ്. എല്ലാവർക്കും കാണാൻ പറ്റുന്നൊരു സിനിമയാണിത്.
ഈ സിനിമയിൽ എല്ലാവരെയും റെപ്രെസെന്റ്റ്റ് ചെയ്യുന്ന ആരെങ്കിലും ഉണ്ടാകും. അത് കാരണം മൊത്തം പ്രേക്ഷകരെയും ഈ സിനിമ ടാർജറ്റ് ചെയ്യുന്നുണ്ട്.
ടീനേജ്, യൂത്ത് പ്രേക്ഷകരെ മാത്രമല്ല ജനറൽ ഓടിയൻസിന് കൂടി വേണ്ടിയുള്ള സിനിമയാണ് മന്ദാകിനി.
വടക്കുനോക്കിയന്ത്രം തുടങ്ങുന്ന അതേ ഫോർമാറ്റിലാണ് ഈ സിനിമയും തുടങ്ങുന്നത്. വടക്കുനോക്കിയന്ത്രത്തിലെ അതേ മീറ്ററിലെ നായകനാണ് മന്ദാകിനിയിലേതും. കല്യാണം അടുത്തെത്തി പക്ഷേ അയാൾ കൺഫ്യൂസ്‌ഡ് ആണ്. പ്രിപ്പയേർഡ് ആകാത്ത ഒരു കല്യാണത്തിന് നായകൻ ഒരുങ്ങുന്നതും തുടർന്നുള്ള കോമഡികളാണ് സിനിമയുടെ ബാക്കി.
പാച്ചുവും അത്ഭുതവിളക്കിനും ശേഷമാണ് അഭിനയം ഇഷ്ടപ്പെട്ട് തുടങ്ങിയത്. പ്രേമലു ഒക്കെ കഴിഞ്ഞപ്പോഴേക്കും നല്ല ഫ്ലെക്സിബിൽ ആയി. അതുവരെ വേണോ വേണ്ടയോ എന്ന് ചിന്തിച്ചിരുന്നു. ഫഹദ് ഫാസിൽ ടേക്കിൽ ഒരുപാട് ഇബ്രോവൈസേഷൻ നടത്തും. ഡയലോഗ് പറഞ്ഞിട്ട് റിയാക്ഷന് വേണ്ടി ഒരു രണ്ട് സെക്കൻഡ് വേറെ ഇട്ടിട്ടുണ്ടാകും പക്ഷെ അത് റിഹേഴ്‌സലിൽ ഉണ്ടാകില്ല ടേക്കിൽ വരും. അദ്ദേഹത്തിന്റെ കൂടെ അഭിനയിക്കുമ്പോൾ നമ്മളൊന്ന് അലേർട്ട് ആയിരിക്കണം.” എന്നാണ് ദി ക്യു സ്റ്റുഡിയോക്ക് നൽകിയ അഭിമുഖത്തിൽ അൽത്താഫ് സലിം പറഞ്ഞത്.
മെയ് 24നാണ് ചിത്രം പ്രദർശനത്തിനെത്തുന്നത്. ഗണപതി, വിനീത് തട്ടിൽ, അശ്വതി ശ്രീകാന്ത്, അജയ് വാസുദേവ്, ജാഫർ ഇടുക്കി, ജൂഡ് അന്താണി ജോസഫ്, ജിയോ ബേബി തുടങ്ങീ നിരവധി താരങ്ങളാണ് ചിത്രത്തിൽ അണിനിരക്കുന്നത്.
