‘ഉദ്ഘാടനം സ്റ്റാര്‍’ എന്നാണ് നടി ഹണി റോസിനെ സോഷ്യല്‍ മീഡിയ വിശേഷിപ്പിക്കുന്നത്. കേരളത്തിലും തെലങ്കാനയിലും മാത്രമല്ല, അങ്ങ് അയര്‍ലന്റില്‍ വരെ ഉദ്ഘാടനം ചെയ്യാനെത്തി ഹണി റോസ് ശ്രദ്ധ നേടിയിട്ടുണ്ട്. താരം എത്തുന്ന ഓരോ ഉദ്ഘാടനങ്ങള്‍ക്കും ആരാധകര്‍ കൂടാറുമുണ്ട്. അതിനൊപ്പം തന്നെ ഒരുപാട് ബോഡി ഷെയ്മിംഗ് കമന്റുകളും താരം നേരിടാറുണ്ട്.
ട്രോളുകള്‍ ആസ്വദിക്കാറുണ്ട് എന്ന് തുറന്നു പറഞ്ഞിട്ടുള്ള താരമാണ് ഹണി റോസ്. ‘റേച്ചല്‍’ എന്ന തന്റെ പുതിയ സിനിമയുടെ പ്രമോഷന്റെ ഭാഗമായി ഹണി റോസ് പറഞ്ഞ കാര്യങ്ങളാണ് ഇപ്പോള്‍ ശ്രദ്ധ നേടിക്കൊണ്ടിരിക്കുന്നത്. ”രസകരമായ ട്രോളുകളൊക്കെ അതേ വൈബോടെ ഞാന്‍ ആസ്വദിക്കാറുണ്ട്.”
”റേച്ചലിന്റെ പോസ്റ്റര്‍ ഇറങ്ങിയപ്പോള്‍ കണ്ട രസകരമായ കമന്റ് ഇങ്ങനെയായിരുന്നു, ‘ഞാനാദ്യം വിചാരിച്ചു ഇറച്ചിക്കട ഉദ്ഘാടനം ആയിരിക്കുമെന്ന്’ എന്ന്. ഇതേപോലെയുള്ള രസകരമായ ട്രോളുകള്‍ കണ്ട് പൊട്ടിച്ചിരിച്ചിട്ടുണ്ട്. അതുപോലെ അയര്‍ലന്റില്‍ പോയ സമയത്ത് ഗതാഗതമന്ത്രി ജാക്ക് ചാംബേഴ്സ് പങ്കുവച്ച സെല്‍ഫി വൈറലായി മാറി.”
”അല്ല മലയാളികള്‍ വൈറലാക്കി മാറ്റി എന്ന് വേണം പറയാന്‍. അവിടെ ഞാന്‍ പത്ത് ദിവസം ഉണ്ടായിരുന്നു. അദ്ദേഹം പങ്കുവച്ച പോസ്റ്റ് പിറ്റേ ദിവസം നോക്കുമ്പോള്‍ താഴെ മൊത്തം മലയാളം കമെന്റുകള്‍. ‘ഹായ് ജാക്കേട്ടാ സുഖാണോ’ എന്ന് ചോദിച്ചാണ് തുടങ്ങുന്നത്.”
”മോളുടെ കല്യാണം വിളിക്കാന്‍ വന്നവരും’ മറ്റുമായി ആ പോസ്റ്റിന് താഴെ മലയാളികളെക്കൊണ്ട് നിറഞ്ഞു. ഇതിന് പുറമേ നല്ല കൂടിയ കമന്റ്‌സും ഉണ്ടായിരുന്നു. അതായിരുന്നു എന്റെ ടെന്‍ഷന്‍. മിനിസ്റ്റര്‍ എങ്ങാനും ട്രാന്‍സ്ലേറ്റ് ചെയ്ത് നോക്കിയാല്‍ അയര്‍ലന്റില്‍ നിന്ന് തിരിച്ച് പോരാന്‍ പറ്റാതാവുമോ എന്ന് ഭയന്നിരുന്നു” എന്നാണ് ഹണി റോസ് മാതൃഭൂമി ഡോട്ട് കോമിന് നല്‍കിയ അഭിമുഖത്തില്‍ പറയുന്നത്.
