കോളേജ് പഠനം പൂർത്തിയാക്കിയതിന് ശേഷം താൻ അനുഭവിച്ച ബുദ്ധിമുട്ടുകൾ പങ്കുവച്ച് നടൻ അമിതാഭ് ബച്ചൻ. പഠനം പൂർത്തിയാക്കിയിട്ടും ഒരു ജോലി ലഭിക്കാൻ ഏറെ ബുദ്ധിമുട്ടേണ്ടി വന്നു എന്നാണ് താരം പറഞ്ഞത്. പഠിച്ച കാര്യങ്ങളൊന്നും പിന്നീടുള്ള തന്റെ ജീവിതത്തിൽ പ്രയോജനപ്പെട്ടില്ല എന്നും പഠിച്ചതൊന്നും തനിക്ക് ഓർമയില്ലെന്നും ബിഗ് ബി തന്റെ ടെലിഷൻ ഷോ ആയ കെബിസിയിൽ പറഞ്ഞു.
ബച്ചന്റെ ഷോയിലെത്തിയ ബി.ടെക് എഞ്ചിനിയറിങ് ബിരുദധാരിയായ റിഷി എന്ന യുവാവ് തന്റെ പഠനം കഴിഞ്ഞെന്നും നിലവിൽ ജോലി അന്വേഷിക്കുകയാണെന്നും താരത്തോട് പറഞ്ഞു. എഞ്ചിനീയർമാർക്ക് ഇന്നത്തെ കാലത്ത് ജോലി കിട്ടാൻ ബുദ്ധിമുട്ടാണെന്ന തരത്തിൽ റിഷി ബച്ചനോട് പറഞ്ഞപ്പോൾ ജോലി ഇല്ലെന്ന് അറിഞ്ഞിട്ടും എന്തിനാണ് അത് പഠിച്ചതെന്ന മറുചോദ്യമാണ് താരം അനുഭവിച്ച ബുദ്ധിമുട്ടുകൾ പറയാൻ കാരണമായത്.
‘ എന്തു സംഭവിക്കും എന്ന് എനിക്ക് പോലും അറിയില്ലായിരുന്നു. ഞാൻ ബിഎസ്‌സിയാണ് പഠിച്ചത്. അതിന് ശേഷം എനിക്കൊരു ഐഡിയയും ഇല്ലായിരുന്നു. ഒന്നും സംഭവിച്ചതുമില്ല. ഞാൻ എവിടെയൊക്കെയോ പോയി. പക്ഷെ ബിഎസ്‌സിയോ ഒന്നും ഉപകാരപ്പെട്ടില്ല. ഇന്നുവരെ ഞാൻ പഠിച്ച ഒരു കാര്യവും എനിക്കറിയില്ല’ എന്നാണ് ബച്ചൻ പറഞ്ഞത്.
