‘ബാഹുബലി’ക്ക് പിന്നാലെ എത്തിയ പ്രഭാസ് സിനിമകള്‍ മിക്കതും തിയേറ്ററില്‍ ഫ്‌ലോപ്പ് ആയിരുന്നു. ബാഹുബലിക്ക് ശേഷം പാന്‍ ഇന്ത്യന്‍ താരമായി പ്രഭാസിന്റെ സിനിമകള്‍ക്കായി ഏറെ പ്രതീക്ഷയോടെയാണ് ആരാധകര്‍ കാത്തിരുന്നത്. എന്നാല്‍ സിനിമകള്‍ ദുരന്തമായതോടെ വരാനിരിക്കുന്ന ‘സലാര്‍’ സിനിമയ്ക്കായി അമിത പ്രതീക്ഷയാണ് ആരാധകര്‍ക്ക്.
സലാര്‍ സിനിമയുടെ പ്രമോഷനിടെ പ്രഭാസ് പറഞ്ഞ വാക്കുകളാണ് ഇപ്പോള്‍ ചര്‍ച്ചയാകുന്നത്. പ്രശാന്ത് നീല്‍ ചിത്രം ‘കെജിഎഫ്’ പുറത്തിറങ്ങിയതിന് പിന്നാലെ അത്തരത്തിലുള്ള സിനിമകളിലാണ് പ്രഭാസ് അഭിനയിക്കേണ്ടിയിരുന്നത് എന്നൊരു ചര്‍ച്ച ഉര്‍ന്നിരുന്നു. ഇത് തന്നോടും പലരും പറഞ്ഞിരുന്നതായാണ് പ്രഭാസ് ഇപ്പോള്‍ വെളിപ്പെടുത്തിയിരിക്കുന്നത്.
”ഞാന്‍ പോകുന്നിടത്ത് എല്ലാം ആളുകള്‍ കെജിഎഫിനെ കുറിച്ച് സംസാരിക്കുന്നുണ്ടായിരുന്നു. എന്നാല്‍ ഞാന്‍ ആ സിനിമ ഇതുവരെ കണ്ടിട്ടില്ല. പിന്നീടാണ് ഞാന്‍ പ്രശാന്തിനെ പരിചയപ്പെടുന്നത്. എന്നാല്‍ ഞങ്ങള്‍ രണ്ടുപേരും കുറച്ച് നാണക്കാരായതിനാല്‍ പലതും സംസാരിച്ചെങ്കിലും ഒന്നിച്ച് സിനിമയെ ചെയ്യുന്നതിനെ കുറിച്ച് മിണ്ടിയില്ല.”
”പിന്നീടാണ് സലാറിനായി എന്നെ സമീപിച്ചത്. അപ്പോഴേക്കും ഞാന്‍ മറ്റ് പ്രോജക്ടുകളുമായി തിരക്കിലായി. ഇത് ചെയ്യാന്‍ പറ്റില്ല എന്ന് പറഞ്ഞ് ഒഴിയാന്‍ ഞാന്‍ ആലോചിച്ചിരുന്നു. പക്ഷെ നോ പറഞ്ഞെന്ന് എന്റെ ആരാധകര്‍ അറിഞ്ഞാല്‍ എന്നെ കൊല്ലുമെന്ന് തോന്നി. നാഗ് അശ്വിന്‍ഡ ചിത്രം ‘കല്‍ക്കി 2898 എഡി’യുടെ തിരക്കിലായിട്ടും ഞാന്‍ സലാര്‍ ചെയ്യാമെന്നേറ്റു.”
Read more
”ആദ്യം 45 ദിവസമായിരുന്നു അവര്‍ ചോദിച്ചതെങ്കിലും 102 ദിവസം എടുത്താണ് ഞാന്‍ ഷൂട്ടിംഗ് തീര്‍ത്തത്” എന്നാണ് പ്രഭാസ് പറയുന്നത്. അതേസമയം, ഡിസംബര്‍ 22ന് ആണ് സലാര്‍ റിലീസിനൊരുങ്ങുന്നത്. സമീപകാലത്ത് ഏറെ പ്രീ റിലീസ് ഹൈപ്പ് ലഭിച്ച ചിത്രം കൂടിയാണ് ഹോംബാലെ ഫിലിംസ് നിര്‍മ്മിക്കുന്ന സലാര്‍.
