2021- ല്‍ ഏറ്റവും കൂടുതല്‍ പ്രേക്ഷകരുടെ മികച്ച റേറ്റിംഗ് നേടിയ ചിത്രങ്ങള്‍ ഏതൊക്കെയെന്ന ലിസ്റ്റ് ഇന്റര്‍നെറ്റ് മൂവി ഡാറ്റ ബേസ് പുറത്തു വിട്ടിരിക്കുകയാണ്. ഏറ്റവും കൂടുതല്‍ റേറ്റിംഗ് നേടി ഈ ലിസ്റ്റില്‍ മുന്നില്‍ നില്‍ക്കുന്നത് മോഹന്‍ലാല്‍ നായകനായ ദൃശ്യം 2 ആണ്.
ആശീര്‍വാദ് സിനിമാസ് നിര്‍മ്മിച്ച ഈ ജീത്തു ജോസഫ് ചിത്രം ആഗോള തലത്തില്‍ വരെ വമ്പന്‍ തരംഗമായി മാറി. 8.6 ആണ് ഈ ചിത്രത്തിന് ലഭിച്ച റേറ്റിംഗ് പോയിന്റ്. ഇതേ റേറ്റിംഗ് പോയിന്റ് ലഭിച്ച ടോവിനോ തോമസ്- ബേസില്‍ ജോസഫ് ചിത്രമായ മിന്നല്‍ മുരളി ആണ് ഈ ലിസ്റ്റിലെ രണ്ടാം സ്ഥാനത്തു ഉള്ളത്. ദൃശ്യം 2 ആമസോണ്‍ പ്രൈം റിലീസ് ആയിരുന്നു എങ്കില്‍ മിന്നല്‍ മുരളി നെറ്റ്ഫ്‌ളിക്‌സില്‍ ആണ് എത്തിയത്.
നവാഗതനായ ചിദംബരം ഒരുക്കിയ ബേസില്‍ ജോസഫ് ചിത്രം ജാനേമന്‍ മൂന്നാം സ്ഥാനത്തും ജിയോ ബേബി ഒരുക്കിയ ദി ഗ്രേറ്റ് ഇന്ത്യന്‍ കിച്ചന്‍ നാലാം സ്ഥാനത്തുമാണ് എത്തിയത്. 8.5 ആണ് ജാനേമന്‍ നേടിയ റേറ്റിംഗ് എങ്കില്‍ 8.3 ആണ് ദി ഗ്രേറ്റ് ഇന്ത്യ കിച്ചന്‍ നേടിയെടുത്തത്. ജാനേമന്‍ തിയേറ്ററിലും ദി ഗ്രേറ്റ് ഇന്ത്യന്‍ കിച്ചന്‍ ഒടിടിയിലുമാണ് റിലീസ് ചെയ്തത്.
8.2 റേറ്റിംഗ് പോയിന്റുകള്‍ നേടി ഓപ്പറേഷന്‍ ജാവ, മാലിക് എന്നിവ അഞ്ചും ആറും സ്ഥാനം നേടിയെടുത്തു. നവാഗതനായ തരുണ്‍ മൂര്‍ത്തി ഒരുക്കിയ ഓപ്പറേഷന്‍ ജാവ തീയേറ്ററിലും മഹേഷ് നാരായണന്‍ ഒരുക്കിയ ഫഹദ് ഫാസില്‍ ചിത്രം മാലിക് ആമസോണ്‍ പ്രൈം റിലീസ് ആയുമാണ് വന്നത്. നായാട്ട്, ജോജി, തിങ്കളാഴ്ച നിശ്ചയം എന്നിവയാണ് ഏഴും എട്ടും ഒന്‍പതും സ്ഥാനം നേടിയ ചിത്രങ്ങള്‍.
മാര്‍ട്ടിന്‍ പ്രക്കാട്ട് ചിത്രം നായാട്ടു തിയേറ്റര്‍ റിലീസ് ആയിരുന്നു എങ്കില്‍, ഫഹദ്- ദിലീഷ് പോത്തന്‍ ടീമിന്റെ ജോജി ആമസോണ്‍ പ്രൈം റിലീസ് ആയും സെന്ന ഹെഗ്ഡെ എന്ന നവാഗതന്‍ ഒരുക്കിയ തിങ്കളാഴ്ച നിശ്ചയം സോണി ലൈവിലും ആണ് വന്നത്. സജിന്‍ ബാബു ഒരുക്കിയ ബിരിയാണി ആണ് ഈ ലിസ്റ്റില്‍ പത്താം സ്ഥാനത്തു ഉള്ളത്. ഇത് കൂടാതെ കുറച്ചു ദിവസം മുന്‍പ് റിലീസ് ചെയ്ത ജോജു ജോര്‍ജ്- അഹമ്മദ് കബീര്‍ ചിത്രം മധുരവും ഈ ലിസ്റ്റില്‍ വൈകാതെ ഇടം പിടിക്കും എന്നാണ് പ്രതീക്ഷ. മികച്ച പ്രേക്ഷക പ്രതികരണമാണ് ഈ ചിത്രം നേടിയെടുക്കുന്നത്. റോജിന്‍ തോമസ് ഒരുക്കിയ ഇന്ദ്രന്‍സ് ചിത്രം ഹോമും ഗംഭീര പ്രേക്ഷക പ്രതികരണം നേടിയ മലയാള ചിത്രമാണ്. മധുരവും ഹോമും ഒറ്റിറ്റി റിലീസ് ആയാണ് എത്തിയത്.
Read more
