മോഹന്‍ലാല്‍-ലിജോ ജോസ് പെല്ലിശേരി ചിത്രം ‘മലൈകോട്ടൈ വാലിബനെ’ കുറിച്ച് പല തരത്തിലുള്ള അഭ്യൂഹങ്ങള്‍ സോഷ്യല്‍ മീഡിയയില്‍ പ്രചരിക്കാറുണ്ട്. ചിത്രത്തെ കുറിച്ച് കൂടുതല്‍ വിവരങ്ങള്‍ പുറത്തു വിടാത്തതിനാല്‍ ഏറെ ആകാംഷയോടെയാണ് ചിത്രത്തിനായി ആരാധകര്‍ കാത്തിരിക്കുന്നത്.
എന്നാല്‍ തങ്ങളും സിനിമയുടെ ഭാഗമാണെന്ന് താരങ്ങള്‍ സോഷ്യല്‍ മീഡിയയിലൂടെ അറിയിക്കാറുണ്ട്. രണ്ട് യുവതാരങ്ങള്‍ കൂടി ചിത്രത്തില്‍ അഭിനയിക്കുന്ന വിവരമാണ് ഇപ്പോള്‍ പുറത്തു വന്നിരിക്കുന്നത്. മലയാളി നടന്‍ മനോജ് മോസസ്, ബംഗാളി നടി കഥ നന്ദി എന്നിവരും ചിത്രത്തില്‍ അഭിനയിക്കുന്നുണ്ട്.
കഴിഞ്ഞ ദിവസം പിറന്നാള്‍ ആഘോഷിച്ച മനോജ് മോസസിന് ആശംസകള്‍ നേര്‍ന്ന് വാലിബന്‍ ടീം ലൊക്കേഷനില്‍ ജന്മദിനാഘോഷം സംഘടിപ്പിച്ചിരുന്നു. മോഹന്‍ലാലിന്റെയും ലിജോയുടെയുമൊക്കെ സാന്നിധ്യത്തില്‍ പിറന്നാള്‍ കേക്ക് മുറിക്കുന്ന തന്റെ വീഡിയോ മനോജ് തന്നെയാണ് ഇന്‍സ്റ്റഗ്രാമിലൂടെ പങ്കുവച്ചിരിക്കുന്നത്.
View this post on Instagram
ബംഗാളി നടി കഥ നന്ദിയും ഇക്കൂട്ടത്തിലുണ്ട്. ഇവര്‍ കൂടാതെ മറാഠി നടി സൊണാലി കുല്‍ക്കര്‍ണി, ഹരീഷ് പേരടി, ഹരിപ്രശാന്ത് വര്‍മ്മ, മണികണ്ഠന്‍ ആചാരി, സുചിത്ര നായര്‍ എന്നിവരാണ് ചിത്രത്തിലെ മറ്റ് അഭിനേതാക്കള്‍. ജനുവരി 18 ന് രാജസ്ഥാനിലാണ് സിനിമയുടെ ചിത്രീകരണം ആരംഭിച്ചത്.
Read more
രാജസ്ഥാനില്‍ തന്നെയാണ് സിനിമയുടെ പൂര്‍ണ്ണമായ ചിത്രീകരണം. ചിത്രത്തിന്റെ ഒഫീഷ്യല്‍ അപ്‌ഡേറ്റുകള്‍ വൈകാതെ പുറത്തെത്തുമെന്നാണ് കരുതപ്പെടുന്നത്. ജോണ്‍ മേരി ക്രിയേറ്റീവ് ലിമിറ്റഡിന്റെ ബാനറില്‍ ഷിബു ബേബി ജോണും മാക്സ് ലാബ് സിനിമാസ്, ആമേന്‍ മൂവി മോണാസ്ട്രി, സെഞ്ച്വറി ഫിലിംസ് എന്നിവര്‍ ചേര്‍ന്നാണ് നിര്‍മാണം.
